Video  Ilyos Qurbonov: "Omadsizlik bo'laverganidan so'ng futbolchilar xato qilishga qo'rqib o'ynamoqda"

"O'yin haqida nima deyish mumkin, birinchi bo'lib gol urib oldik. Raqib qanday o'ynashini bilardik. Intensiv futbol ko'rsatadi. Rejamiz ikkinchi raqam ostida, qarshi hujumga tayanib o'ynash edi. Birinchi bo'limda qarshi hujumga chiqib ketish uchun sifat etishmadi. SHunga qaramay hisobda oldinga chiqib oldik. Tanaffusda yigitlarga kerakli ko'rsatmalar berildi. To'pni ko'proq nazorat qilishni aytdik. Afsuski, buni qila olmadik. Ikkinchi bo'limda 11 metrlik zarbadan so'ng yigitlar ruhan sinib qoldi. Jamoamizda ruhan qo'rquv bor. Xato qilishdan qo'rqishmoqda. O'yinni ko'rib tahlil qilamiz. 

- "Metallurg" tarkibida mahoratli, tajribali futbolchilar yig'ilgan. Lekin natija, o'yin bunga umuman mos emas. Oddiy misol futbolchilar 1:0 dan so'ng futbol o'ynashni unutishdi. Sifat etishmayotgani nima bilan bog'liq?

- Tarkibimizda mahoratli futbolchilar yig'ilgan. Birinchi davrada 1:0, 2:1 yuta turib yutqazgan o'yinlarimiz ko'p bo'lmoqda. 10 turning 6 tasida durang o'ynadik. Oxirgi daqiqalarda diqqat etishmayapti. Futbol shunday o'yin. Omadsizlik bo'laverganidan keyin ruhan muammolar yuzaga keladi. Qo'rqmasdan futbol o'ynay olishmayapti. Buning evaziga ko'p to'p yo'qotishmoqda. 

- "Metallurg"da jismoniy tomonlama muammo bormi? 

- Ishonchsizlik, qo'rquv oqibatida futbolchining yuragi tez uradi. Oddiy holatda ham bu narsa yuz beradi. Jamoamizda yoshi kattaroq futbolchilar ko'p. "Surxon"da yosh yigitlar, tezroq yuguradi. Yoshi kattalar hisobiga tez charchashmoqda. Lekin oldin ishlagan murabbiyimiz jismoniy tayyorlash bo'yicha yaxshi mutaxassis edi. Qo'rquv bo'lganidan keyin odam tez charchaydi, miya ishlamaydi. 

- Birinchi bo'limda ko'p vaziyatlar yaratildi. Gol urdi. Ikkinchi bo'limda jamoa buni hisobga olib yanada tempni oshirgan holda raqibni ko'mib qo'yishi mumkin edi. "Metallurg" ochko uchun o'ynab yakunda ochkosiz qoldi...

- To'g'ri, 3 ochkoni qo'ldan boy berdik. Gol urganimizzdan keyin himoyachimiz birga bir vaziyatga chiqib ketdi. O'sha vaziyatda gol urganimizda o'yinni hal qilardik. Futbolda shunday qonun bor, sen urmasang, senga urishadi. Ikkinchi bo'limda teparoqda o'ynashni aytdim. Ular bir kishi kam, qanotlardan hujum qilishimiz kerak edi. Yana aytaman, oddiy holatlarda ishonch etishmayapti. Ikkinchi golni ura olmadik. Sifat kamlik qilmoqda.