Biz afsona sifatida biladiganimiz To'lagan Isoqovning takidlashicha, SSSR oliy ligasi davrida ham (35-40 yil oldin), Aziz Haydarovning iqroriga ko'ra, u O'zbekiston chempionatida g'alaba qozonib yurgan mahallarda ham (bir necha yil oldin) bo'lgan, O'FA matbuot xizmatining xabarlariga ishonsak, o'tgan mavsumda ham bor edi.
Xabaringiz bor, 2020 yilning oxirida futbolimiz boshida turgan muhtaram tashkilot futboldagi korrupciyaga qarshi "urush ochdi". Hammamiz o'rnimizdan turib, qarsak chalib yubordik. "Barakalla, bo'larkan-ku", dedik. Ishondik, vaqti kelgan edi-da. Keyin nima bo'ldi?..
Biroz avval "Turon" jamoasi bosh murabbiyi Islombek Ismoilovning "olovli" nutqini eshitgan bo'lsangiz kerak. U to'g'ri gapirdi yoki yo'q, bilmadim. Lekin qachondir aytilishi kerak bo'lgan, kimdir aytishi kerak bo'lganlarni gapirdi. Butun "karerasi"ni o'rtaga qo'yib gapirdi. Yana takrorlayman, avval o'rtaga qo'ydi, keyin gapirdi...
Uning gaplarini muhokama qilmaymiz. Faqat u bergan savollarni ajratib olib, masullarga etkazamiz.
1. Futboldagi korrupciyani tugatish haqida o'ylayotgan, ammo aybdorlarning barchasini jazolamagan O'FAga dastlabki savol: hakamlarga kim chora ko'radi?
2. Yangi mavsum startigacha kelishilgan o'yinlarda ishtirok etgan barchaning jazolanishini vada qilgan O'FAga ikkichi savol: allaqachon 2021 yilgi mavsumning 2-turi boshlandi, yana qachongacha chidash mumkin?
3. Futbolni tozalayotgan O'FAga navbatdagi savol: shumi tozalayotgani?
4. Kelishilgan o'yinlarda ishtirok qilgan klublarni jazolamagan O'FAga oxirgi savol: shumi adolat?
Yuqorida aytdim, o'zbek futbolida kelishilgan o'yinlar har doim bo'lgan. Eng qizig'i, futbol atrofidagi kishilarning bundan har doim xabari bo'lgan. Islombek Ismoilov haq. Kimdir jurat topib, oxirigacha bormas ekan, farzandlarimiz ham shu muammo bilan kurashib yashaydi. SHu o'rinda yana bir bor O'FAga yuzlanamiz: janoblar, hammasi sizning qo'lingizda. Jurat toping, jazolang. Xalq o'z "qahramon"larini bilsin!
Bu gapni nega aytyapman? Bizdagi malumotlarga ko'ra, kelishilgan o'yinlar allaqachon aniqlab bo'lingan, ishtirokchilar ro'yxati aniq. Hatto ularda ishlagan hakamlar ham jazolandi. Lekin, o'sha hakamlarni yollagan klublar hamon jazolanmayapti. Sababi esa faqatgina O'zbekiston futbol associaciyasining mutasaddilarigagina ayon...
Muqaddam Italiyada va Turkiyada shu kabi holatlar yuzaga kelganida masul federaciyalar qanaqa yo'l tutganini bilasiz. O'zbek futbolining bugungi ahvolini tasavvur qilishingiz uchun aytaman, kelishilgan o'yinlarda qatnashgan bir nechta jamoalar O'zbekiston Superligasida ishtirokini hamon davom ettirmoqda. Futbolni tozalashni maqsad qilgan O'FA ularni nega jazolamayapti? Ochig'i, menga ham qiziq. Kutamiz. Balki, qandaydir sado chiqib qolar...
Bosh sahifaga
226