- Vladimir, Superligadagi dastlabki g'alaba bilan tabriklayman. «Andijon»da triumfal mavsum o'tkazib, qishki transferlar oynasida "Xorazm"ga o'tdingiz. "Xorazm" taklifi qanday paydo bo'ldi? Tayyorgarlik qanday o'tdi va jamoaga moslashish jarayoni qanday kechyapti?
- Haqiqatdan ham, bu mavsum «Xorazm» uchun omadli bo'ladi deb umid qilaman. Jamoa 15 yillik tanaffusdan so'ng Superligaga qaytdi. "Xorazm" varianti, «Andijon»dan rasman ketganimdan keyin paydo bo'ldi. Ular menga taklif bilan chiqishdi. Klub direktori bilan oldin birga o'ynaganmiz. Shuningdek, bu erdagi futbolchilarning yarmi bilan birga yoki ularga qarshi o'ynaganman. O'ylashimcha, yaxshi jamoa yig'ildi. Hozircha bir-birimizni to'liq tushunishda kamchiliklar ko'zga tashlanmoqda, lekin bir-birimizga moslashish uchun bir oy vaqtimiz bo'ldi. Turkiyada va shu erda yig'in o'tkazdik. Chempionat davom etar ekan, o'yinimiz ham yaxshilanib borishiga ishonaman.
- Superliganing boshqa jamoalaridan takliflar bo'lmadimi? «Andijon»da etakchilardan biri edingiz, ustiga-ustak liganing eng yaxshi markaziy himoyachilaridan biri sifatida tanildingiz...
- Juda ham katta takliflar bo'lmadi, chunki men oxirgicha «Andijon» javobini kutdim. Klub yanvar oyining so'ngida yakuniy qarorni qabul qildi, o'sha vaqtga kelib esa ko'pchilik jamoalar tarkibini to'ldirib bo'lgan edi. Shu bois men «Xorazm»ni tanladim. Endi shu erdaman va yaxshi o'yin ko'rsatamiz deb umid qilaman.
- «Xorazm»ning yangi mavsumdagi maqsadlari qanday? Jamoa uzoq tanaffusdan so'ng Superligaga qaytdi...
- Biz yaxshi jipslashgan jamoa shakllantirishimiz va o'yinimizni yaxshilashimiz kerak. Agar mavsum so'ngida, musobaqa jadvalining o'rtasida bo'lsak, bu biz uchun yaxshi natija bo'ladi.
- Yaqinda «Xorazm» Doston Tursunov bilan shartnoma imzoladi. O'zbekiston milliy terma jamoasining sobiq himoyachisi o'tgan mavsumni Eronda o'tkazdi. Jamoaning himoya chizig'i haqida nima deya olasiz? «Xorazm» endigina Superligaga qaytganiga qaramay, markaziy himoya chizig'ini yaxshigina kuchaytirib oldi...
- Doston bilan birga o'ynayotganimdan juda xursandman. Albatta, u tajribali va kuchli futbolchi, nafaqat O'zbekiston, balki butun Osiyoda nom qozona olgan. Lekin faqat Doston emas, bizda boshqa yaxshi futbolchilar ham bor. Men bu jamoaning bir qismi bo'lganimdan xursandman va bunday futbolchilar bilan bir jamoada bo'lish quvonarli.
Abdulvosit Bektemirov suhbatlashdi
Bosh sahifaga
201