Ushbu musobaqa hisob bo'yicha 18-Osiyo chempionati hisoblanadi.
Futzal bo'yicha Osiyo chempionatida 16ta milliy terma jamoa ishtirok etadi. Hozirda turli davlatlarda saralash o'yinlari bo'lib o'tmoqda. O'zbekiston futzal terma jamoasi saralash bosqichini Qirg'izistonda o'tkazayotganidan xabaringiz bor. Nodir Eliboev shogirdlari dastlabki turni Falastinga qarshi o'tkazib, 7:1 hisobida zafar quchishdi. Shu kuni asosiy raqobatchimiz Qirg'iziston Sharqiy Timorni 9:1 hisobida mag'lub etdi.
Osiyo chempionati mezboni sifatida Indoneziya saralashdan ozod qilingan. Qolgan 15ta jamoa aynan saralash natijasida aniqlanadi. Quyida o'yinlar nechta guruhda olib borilishi hamda boshqa guruhlarda kimlar borligi haqida to'xtalib o'tamiz.
Futzal bo'yicha Osiyo chempionati saralashi 8ta guruhda va 8 mamlakatda olib borilyapti. Saralashda jami 31ta terma jamoa qatnashmoqda.
A guruhi: Quvayt (mezbon), Avstraliya, Hindiston, Mo'g'uliston.
B guruhi: Tailand (mezbon), Janubiy Koreya, Bahrayn, Bruney.
C guruhi: Tojikiston (mezbon), Yaponiya, Kambodja, Makau.
D guruhi: Saudiya Arabistoni (mezbon), Iroq, Xitoy Taypeyi, Pokiston.
E guruhi: Xitoy (mezbon), Vetnam, Livan, Gonkong.
F guruhi: Qirg'iziston (mezbon), O'zbekiston, Falastin, Sharqiy Timor.
G guruhi: Malayziya (mezbon), Eron, BAA, Bangladesh.
H guruhi: Myanma (mezbon), Afg'oniston, Maldiv.
Saralash formatiga ko'ra, har bir guruhdan guruh g'olibi (8ta jamoa) va eng yaxshi 7ta ikkinchi o'rin egalari Osiyo chempionati final bosqichiga yo'llanma oladi. Malumot uchun, D guruhidagi uchrashuvlar 18-22 oktyabr kunlari bo'lib o'tadi. Qolgan guruhlarda o'yinlar 24 sentyabr kuni tugaydi.
X.Xoliqov
Bosh sahifaga
196