Biz bugun 2011 yilgi o'smirlar o'rtasidagi Jahon chempionatini yodga olamiz. Aleksey Evstafeev va Ahmadjon Musaev boshchiligidagi o'smirlar terma jamoamiz 2011 yil Meksika yashil maydonlarida o'tgan musobaqada debyutant bo'lishgan. O'smirlar toifasidagi o'sha Jahon chempionati O'zbekiston uchun birinchisi edi. Guruh bosqichida Yangi Zelandiyaga 1:4 hisobidagi mag'lubiyat bilan boshlagan vakillarimiz keyin AQSH va Chexiyani bir xil 2:1 hisoblarida taslim qilib nimchorak finalga chiqishgandi. Ha, o'shanda bu mundialda 24 ta jamoa ishtirok etgandi.
Bu bosqichda bizni Avstraliya kutib turardi. Bir yil avval Toshkentda o'tgan Osiyo chempionatida bu jamoalar yarim finalda to'qnash kelishgan va o'shanda o'smirlarimiz 2:1 hisobida g'alaba qozonishgan edi. Meksikadagi to'qnashuvda esa Evstafeev shogirdlarini to'xtatib qolishning imkoni bo'lmadi. Bahs boshlanishini anglatuvchi hushtak chalinganiga 11 daqiqa bo'lib ulgurmay jamoamiz sardori Abbosbek Mahsitaliev hisobni ochgan - 1:0. Birinchi taym oxirida yana bir to'purarimiz Timur Hakimov o'z hisobiga gol yozib qo'yadi - 2:0.
Ikkinchi taym boshida raqib hujumchisi Dilan Tombides maydon markazida Javlon Mirabdullaevga nisbatan qo'pol harakat qilgani uchun perulik bosh hakam Viktor Karrillodan qizil kartochkani qabul qilib oladi va Avstraliya taxminan 30 daqiqa 10 kishi bo'lib o'ynashga majbur bo'ladi. 66-daqiqada Davlatbek Yorbekovning jarima maydoni markaziga uzatgan to'pini avstraliyaliklar sardori Konnor Chapman o'z darvozasiga to'g'rilab qo'yadi - 3:0. Shu gol urilgach, qolgan daqiqalar shunchaki rasmiyatchilik uchun kechishini ikkala jamoa ham tushunib etgandi. 89-daqiqada Jasur Hakimov - Timur Hakimov - Davlatbek Yorbekov kombinaciyasi chiroyli gol bilan tugaydi 4:0! O'sha yil yanvar oyida Qatarda o'tgan Osiyo kubogi yarim finalida Avstraliya bizning jamoani 6:0 hisobida taslim qilgani uchun o'smirlarimiz bu g'alabamiz akalarimiz uchun qasos deb intervyu berishgandi. Aytgancha hakam tomonidan qo'shib berilgan daqiqalarda avstraliyalik Tiboy Kamara yirik mag'lubiyatga chiday olmaydi va ikkinchi sariq kartochkani olib maydonni tark etadi. Uning ortidan Avstraliya ham uyiga ketadi.
O'zbekiston esa chorak finalda Urugvayga 0:2 hisobida imkoniyatni boy beradi.
Meksika davlati bizning vaqt bilan 10 soatlik tafovutga ega bo'lgani bois O'zbekistonda uchrashuvlar tonggi vaqtda boshlanardi. Biroq shunga qaramay millionlab tomoshabinlar saharlab futbolchilarimizning o'yinlarini ko'rish uchun uyqudan voz kechishgandi. O'sha mundial o'zbekistonlik futbol muxlislari uchun haqiqiy bayramga aylanib ketgandi.
O'yinda urilgan gollarni MANA BU ERDA ko'rish mumkin.
O'ZBEKISTON - Avstraliya - 4:0
30.06.2011. Nimchorak final. Torreon, "Korona" stadioni. 8340 tomoshabin.
Bosh hakam: Viktor Karrillo (Peru)
Gollar:
1:0 - MAHSITALIEV Abbosbek, 11
2:0 - HAKIMOV Timur, 40
3:0 - CHAPMAN Konnor (avtogol), 66
4:0 - YORBEKOV Davlatbek, 89
O'ZBEKISTON: 12.XOLMURODOV G'anisher; 3.RAHMONOV Sardor; 5.MANSUROV Asiljon; 6.MAHSITALIEV Abbosbek (15.HAKIMOV Jasurbek, 84); 7.MUROTOV Azizbek; 8.SOBIRXO'JAEV Sardor; 9.XOLMURODOV Xolmurod; 11.HAKIMOV Timur (17.USMONXO'JAEV Diyor, 89); 13.DAVLATOV Bobir (20.YORBEKOV Davlatbek, 22); 14.MIRABDULLAEV Javlon; 18.UBAYDULLAEV Muhsinjon.
Avstraliya: 1.IZZO Pol; 2.MONAKO Jeyk; 3.CHAPMAN Konnor; 4.KING Tom; 5.BRAUN Korey; 7.ESPINDOLA Ernan; 8.KUPER Mitch (19.OKSBORROV Mitchell, 80); 9.TOMBIDES Dilan; 11.REMINGTON Lyuk (15.PROYA Entoni, 55); 17.MELLING Jeykob; 21.VUDKOK Rayli (13.KAMARA Tiboy, 55)
Ogohlantirishlar: BRAUN Korey, 14; YORBEKOV Davlatbek, 30; VUDKOK Rayli, 48; MAXSITALIEV Abbosbek, 65; KAMARA Tiboy, 65
Chetlatishlar: TOMBIDES Dilan, 59; KAMARA Tiboy, 90+1 (2SK).
99456004739606 
Bosh sahifaga
307
18 Noyabr 2025, 13:34