Ibrohim Shokirov: "Evropa jamoalari bilan farq katta emasdi"

"Hamma o'yinlar qiziq bo'ldi. Niyatimiz uzoqroqqa borish edi, ammo nasib qilmagan ekan", – deya gap boshladi Shokirov.

- Siz uchun eng esda qolarli o'yin qaysi bo'ldi?

- Men uchun eng esda qolarli bahs Paragvay bilan o'yin bo'ldi. Bu mening JCHdagi ilk uchrashuvim edi. Birinchi taym qiyin kechdi, biroq ikkinchi taymda o'zimizga kelib olib, 6 ta gol urdik.

- O'zbekiston Evropa jamoalariga qay darajada raqobatbardosh bo'la oldi?

- O'zingiz guvohi bo'lganingizdek, farq katta emasdi. Biz ham evropaliklar uslubiga yaqinlashishga urinyapmiz. Xudo xohlasa, yaqin orada chetda to'p tepishdan umidvorman.

- Aynan qaysi xatolar evaziga Italiyaga yutqazdik?

 - Xatolar ko'p bo'ldi. Buni batafsil aytib bera olmayman. Sal hayajon ham sezildi. Italiya baribir nomdor jamoa edi, bu tasir qildi.

- Jahon chempionatidagi ishtirok terma jamoa uchun qanchalik samarali bo'ldi deb o'ylaysiz?

- Samarali o'yin bo'ldi deb o'ylayman. Har bir bahs qiziq o'tdi. Panama bilan uchrashuvni aytmasak, har bitta o'yinda teng kurash kechdi.