Xabi Alonso bilan xayrlashgan "qirollik klubi" ko'pchilik kutganidek chetdan murabbiy qidirib o'tirmadi. Jamoaning sobiq himoyachisi va shu vaqtgacha "Kastilya" jamoasini boshqarib kelayotgan Alvaro Arbeloa asosiy jamoa boshqaruvini o'z qo'liga oldi.
Klub rahbariyati Arbeloaga to'liq ishonch bildirdi va u Xabi Alonsoning o'rnini zudlik bilan egalladi. Alvaro klub tizimini ichidan juda yaxshi bilishi va Florentino Peresning sevimli kadrlaridan biri ekanligi uning foydasiga ishladi.
Arbeloa 2025 yilning iyun oyidan buyon "Kastilya"ni boshqarib kelayotgan edi. U murabbiylik faoliyatini 2020 yilda "Real" akademiyasida boshlagan. 2020-2021 yilgi mavsumda "Infantil A" jamoasi bilan liga chempioni bo'lgan bo'lsa, keyinchalik "Kadet A" va "Xuvenil A" jamoalarini boshqardi. Xususan, uning boshqaruvidagi "Xuvenil A" 2022-2023 yilgi mavsumda "trebl" qayd etdi (Liga, Ispaniya Kubogi va Chempionlar kubogi), shuningdek, 2024-2025 yilgi mavsumda ham ligada zafar quchdi.
Futbolchi sifatida Arbeloa "Real" tarixidagi eng muvaffaqiyatli davrlardan birining ishtirokchisi hisoblanadi. U 2009 yildan 2016 yilgacha qirollik klubi sharafini himoya qilib, 238 ta rasmiy o'yinda maydonga tushgan. Ushbu davr mobaynida u 8 ta sovrinni qo'lga kiritdi: 2 ta Chempionlar Ligasi, Klublar o'rtasidagi Jahon chempionati, Evropa Superkubogi, La Liga, 2 ta Ispaniya Kubogi va Ispaniya Superkubogi.
Ispaniya terma jamoasi safida esa Arbeloa 2010 yilgi Jahon chempionati hamda ikki karra Evropa chempioni (2008 va 2012) bo'lgan. U terma jamoa libosida jami 56 ta o'yin o'tkazgan.
Lewandowski_9 
Bosh sahifaga
255
13 Yanvar 2026, 10:37