"Buxoro" klubi Sardor Qulmatov va Muhammad Yo'ldoshev bilan shartnomani uzaytirdi.
"Jamoamiz safida himoyachi sifatida to'p surib, nafaqat mudofaa, balki hujumlarda ham faol ishtirok etib kelayotgan, o'zining jangovar ruhi va fidoyiligi bilan muxlislar mehrini qozongan tajribali futbolchi Sardor Qulmatov faoliyatini "Buxoro" safida davom ettiradi. Klub va futbolchi o'rtasidagi shartnoma yana bir yilga uzaytirildi. Sardor Qulmatov ushbu mavsumda Superliga doirasida 29 ta uchrashuvda maydonga tushib, jami 1713 daqiqa harakat qilgan. "Nasaf" darvozasiga gol urishga muvaffaq bo'ldi. Uning barqaror va professional o'yini jamoaning himoya chizig'ini mustahkamlaydi va raqiblarga qarshi ishonchli o'yin namoyish etadi.
Jamoamizning himoya qo'rg'onida o'zining ishonchli va sifatli o'yini bilan jamoamizning keyingi mavsum Superligada ishtirok etishiga munosib hissa qo'shgan tajribali himoyachi Muhammad Yo'ldoshev navbatdagi mavsumda jamoamiz safida faoliyat olib boradi. Muhammad Yo'ldoshev o'tgan mavsumda jamoamiz tarkibida 29 ta uchrashuvda maydonga tushib, jami 2170 daqiqa harakat qildi. Himoyachi bo'lishiga qaramay, u ushbu o'yinlarda 4 ta golli uzatma muallifiga aylanishga muvaffaq bo'ldi.
Ishonamizki, Sardor va Muhammad yangi mavsumda ham o'z mehnati, tajribasi va mahorati bilan jamoamiz oldiga qo'yilgan yuksak maqsadlarga erishishga katta hissa qo'shadi.
Futbolchilarimizga yangi mavsumda sog'liq, barqaror o'yin va jamoamiz bilan birgalikda yangi g'alabalar tilaymiz!", -deyiladi "Buxoro" klubi xabarida.
Bosh sahifaga
211