Bundan roppa-rosa o'n yil avval Toshkentning "Obod" jamoasi ilk bor Superliga qadam qo'ygandi. O'sha mavsum nafaqat klub, balki o'zbek futboli uchun ham tarixiy voqea sifatida yodda qoldi chunki klub xususiy edi. Jamoani maydonga olib chiqqan bosh murabbiy esa hali 23 yoshda bo'lgan Bobur Zuhriddinov edi.
Yoshlik va jasorat uyg'unligi
1992 yilda tug'ilgan Zuhriddinov Superligada 12 ta uchrashuvda jamoaga rahbarlik qildi. Aslida jamoani Pro ligadan (avvagi Birinchi liga) Superligaga chiqishida ham Bobur Zuhriddinov hissasini qo'shgan. Bu davrda "Obod" 1 g'alaba, 2 durang va 9 mag'lubiyat qayd etdi. Natijalar ko'ngildagidek bo'lmaganiga qaramasdan, bu holat murabbiyning yoshi va tajribasini inobatga olganda o'ziga xos sinov maktabiga aylandi.
Yosh mutaxassis uchun bu davr katta bosim, katta masuliyat va muhim saboqlar davri bo'ldi. Keyinchalik klubda bosh murabbiylik vazifasini Aleksandr Mochinov, Rauf Inileev, Jafar Irismetov hamda Andrey Demchenkolar bajarishdi.
Akademiyadan yana katta futbolga
Superligadagi qisqa, ammo mazmunli tajribadan so'ng Zuhriddinov o'zini rivojlantirish yo'lini tanladi. U "Bunyodkor" akademiyasiga ko'chib o'tib, yoshlar bilan ishlash orqali bilim va ko'nikmalarini mustahkamladi.
2018 yilda esa So'g'diyona yoshlar jamoasida faoliyat olib bordi. Bu davrda u taktik va pedagogik jihatdan o'sib, murabbiy sifatida shakllanishini davom ettirdi.
Muborakdagi tajriba
Zuhriddinov faoliyatidagi keyingi muhim bosqich "Mashal" jamoasi bilan bog'liq bo'ldi. Bu erda u Dilyaver Vaniev bilan birgalikda jamoani boshqarib, o'zbek futbol muhitida o'z o'rniga ega bo'lishga harakat qildi.
Shundan so'ng mutaxassis yana "Bunyodkor"ga qaytdi. Uning rahbarligida klubning farm jamoasi Birinchilik Kubogida g'olib chiqib, Pro ligaga o'tish bahslarida ishtirok etdi.
Bugungi kun va kelajak
Ayni paytda Bobur Zuhriddinov “qaldirg'ochlar”ning asosiy jamoasida Ilyos Zeytullaevga yordam bermoqda. Avvalroq U-19 jamoada ham faoliyat yuritdi. Yosh murabbiyning hikoyasi o'zbek futbolida yangi avlod mutaxassislari uchun ilhom manbai bo'la oladi.
Yangi rekord qachon?
So'nggi yillarda klublar akademiyalariga katta etibor qaratayotganini inobatga olsak, kelgusida yana shunday yosh murabbiylarni ko'rishimiz ehtimoli yuqori. Ayniqsa, yoshlar tizimi kuchli bo'lgan, yangi shakllanayotgan jamoalarda.
Siz qanday fikrdasiz: O'zbekiston Superligasida eng yosh murabbiy rekordini yangilay oladigan yangi istedod qachon va qaysi klubda paydo bo'ladi?
Bosh sahifaga
288
18 Fevral 2026, 15:50