Muborakning "Mashal" futbol klubi yangi mavsum oldidan tarkibni kuchaytirish borasida navbatdagi muhim qadamni tashladi. Jamoamiz nigeriyalik tajribali markaziy hujumchi Avgustin Chidi Kvem bilan rasmiy shartnoma imzoladi.
28 yoshli forvard "gazchilar"ning oldingi chizig'ida asosiy kuchga aylanishi kutilmoqda. Bo'yi 187 santimetr bo'lgan futbolchi jismoniy tayyorgarligi, havo kurashlaridagi ustunligi va raqib jarima maydonchasidagi faolligi bilan ajralib turadi. Transfermarkt malumotlariga ko'ra, Kvemning bozor qiymati 350 ming evroga baholangan bo'lib, bu uni jamoadagi eng qimmat legionerlardan biriga aylantiradi.
Chidi Kvem professional faoliyati davomida asosan Janubiy Afrika va Vetnam chempionatlarida to'p tepgan. U Janubiy Afrika Premer-ligasida "Chippa Yunayted", "Tisi Gelaksi", va "AmaZulu" klublari sharafini himoya qilgan. Ayniqsa, "AmaZulu" safidagi o'yinlari etiborga molik bo'lib, qariyb 50 uchrashuvda 11 bor raqib darvozasini ishg'ol etgan. O'zbekistonga kelishidan oldin esa Vetnamning "Xanoy" hamda Iroqning "Al Naft" jamoalarida harakat qilgan.
Shuningdek, Muborakning "Mashal" jamoasi nigeriyalik yarim himoyachi Rafael Viashima Ayagva bilan shartnoma imzolanganini rasman elon qildi.
27 yoshli futbolchi maydon markazida barqaror o'yini, to'p bilan muomala madaniyati va jismoniy tayyorgarligi bilan ajralib turadi. U faoliyati davomida Nigeriya milliy terma jamoasi safida debyut qilgan.
Ayagva klub darajasida ham xalqaro tajriba orttirgan. Xususan, u Norvegiyaning "Lillestryom," AQSHning "Talsa" jamoalari hamda Misr va Liviya chempionatlarida ishtirok etuvchi bir qator klublar sharafini himoya qilgan.
Bosh sahifaga
208
20 Fevral 2026, 10:38