Islom Ismoilov: "Asosiy tarkibning 80-90 foizi shakllandi"

Navbatdagi tayyorgarlik ishlari Farg'onada davom etadi. Jamoa bosh murabbiyi Islom Ismoilov tayyorgarlik jarayoni bilan bog'liq savollarga javob berdi.

— Turkiyaning Antalya shahrida yakuniga etgan o'quv-mashg'ulot yig'ini haqida fikr bildirsangiz.

— Turkiyadagi yig'in juda foydali o'tdi. Asosiy maqsad – jamoani yangi mavsumga jismonan va taktik jihatdan tayyorlash edi. Rejalashtirilgan mashg'ulotlar to'liq bajarildi. Iqlim va sharoit ham bizni qoniqtirdi. Eng muhimi, futbolchilar yig'in davomida faqat ishga etibor qaratishdi, intizom va xohish yuqori darajada bo'ldi. 

— Futbolchilarning jismoniy holati va tayyorgarligi bo'yicha rejalar bajarildimi?

— Ha, rejalar deyarli to'liq bajarildi. Yig'inlar boshida belgilangan yuklamalar bosqichma-bosqich oshirildi. Keyin esa o'yin ritmiga moslashtirildi. Hozir jamoa kerakli funcional holatga yaqinlashdi. Asosiy vazifa – mavsum davomida shu holatni saqlab qolish. 

— Yig'in doirasida bir nechta o'rtoqlik va nazorat uchrashuvlari o'tkazildi. Ushbu o'yinlar orqali asosiy tarkibga nomzodlar aniqlab olindimi?

— Nazorat o'yinlari biz uchun muhim kamchiliklarimizni ochib berdi. Ayrim poziciyalarda raqobat kuchaydi. Ayrim futbolchilar o'zini yaxshi tomondan ko'rsatdi. Asosiy tarkibning 80-90 foizi shakllandi, qolgan poziciyalar bo'yicha esa raqobat davom etadi. 

— Jamoa yangi taktik ko'rsatmalarni qay darajada o'zlashtirdi?

— Albatta, bir yig'inda barchasini mukammal o'zlashtirib bo'lmaydi. Lekin futbolchilar g'oyani tushunib etdi, bu eng muhimi. Hujumdan himoyaga va himoyadan hujumga o'tish tezligi ancha yaxshilandi. Endi rasmiy o'yinlar orqali buni yanada mustahkamlaymiz. 

— Birinchi tur oldidan rejalar qanday?

— Birinchi turga maksimal tayyor holatda kirishni maqsad qilganmiz. Asosiy etibor o'yin intizomi va xatolarni kamaytirishga qaratilgan. Vazifamiz – natija bilan birga barqaror va hujumkor o'yinni namoyish etish. 

— Jamoa ichidagi muhit qanday?

— Muhit yaxshi. Yoshlar va tajribali futbolchilar o'rtasida muvozanat bor. Bir-birini qo'llab-quvvatlash kuchaygan, raqobat esa sog'lom. Bu esa jamoa rivojlanishi uchun eng muhim omillardan biri. 

— Umumiy qilib aytganda, Turkiyadagi yig'inlardan ko'nglingiz to'ldimi?

— Ha, umumiy hisobda yig'indan qoniqdik. Albatta, hal qilinishi kerak bo'lgan jihatlar bor, lekin bu tabiiy jarayon. Eng muhimi, jamoa yangi g'oyalarni tushundi va mavsumni boshlashga tayyor holatga keldi.