Uning natijalariga ko'ra, birinchi turda “Metallurg” safarda “Yaypan” bilan bellashadi. Bekobodliklar ustozi Ilhom Mo'minjonov qura borasidagi fikrlarini bildirdi.
"Qura haqida gapiradigan bo'lsak, har bir raqib bilan baribir o'yin o'tkazamiz. Bizga kimga qarshi maydonga tushishning unchalik farqi yo'q. Har bir jamoa barcha raqiblar bilan ertami-kechmi ro'baro' keladi.
Yangi mavsumga har bir klub jiddiy tarzda tayyorgarlik ko'rmoqda. Tajribali murabbiylar ishlashmoqda va deyarli har bir klubda tajribali futbolchilar etarlicha topiladi. Bu yil PRO-Liga juda qiziqarli o'tishiga ishonchim komil. Oson o'yinning o'zi yo'q.
Birinchi turda safarda "Yaypan"ga qarshi o'ynaydigan bo'ldik. Bu o'z tarixiga ega bo'lgan klub. O'z vaqtida jiddiy maqsadlarni o'z oldiga qo'ygan, Superliga bahslarida qatnashgan jamoa. Hozirgi kunda tajribali murabbiy Rashid G'ofurov faoliyat olib bormoqda. Uni salohiyatli, yuqori darajadagi murabbiy deb hisoblayman. Raqibni hurmat qilgan holda tayyorgarlik ko'ramiz.
Bizning maqsadimiz aniq — Superliga yo'llanmasini qo'lga kiritish. Har bir bahsda g'alaba uchun harakat qilamiz. Shuning uchun, barcha bosh maqsad yo'lida astoydil mehnat qilmoqda”, — dedi murabbiy.
Bosh sahifaga
207