O'zbekiston Kubogi 2-bosqich uchrashuvlaridan so'ng murabbiylar fikri

2026-03-27 08:39:01 / Kiritdi: BestMaster  O'qilgan: 1570

Kecha O'zbekiston Kubogida 2-bosqich bellashuvlari poyoniga etdi.

“Oq-tepa” “Sherdor” ustidan, “Havoqand” esa “Jizzax FA” ustidan penaltilar seriyasiga ko'ra g'olib chiqdi va keyingi bosqichga yo'l oldi.

Bellashuvlardan so'ng jamoalar bosh murabbiylari fikrlarini bildirdi.

Feruzbek Mahmudjonov (“Sherdor” jamoasi bosh murabbiyi):

“Oq-tepa jamoasini g'alaba bilan tabriklayman. Qiziqarli o'yinga guvoh bo'ldik. Biz penaltilar seriyasiga tayyorgarlik ko'rmagan edik. Raqibimiz esa ushbu jarayonga tayyorgarlik ko'rgan ekan. Bu narsa yaqqol sezildi.

Jamoamiz yig'ilganiga ko'p bo'lmadi. Hatto Kubok musobaqasidan 3 kun oldin jamoamizga kelganlar bo'ldi. Lekin nima bo'lganda taqdirda ham musobaqada yomon ishtirok etganimiz yo'q. O'z ustimizda ishlashda davom etamiz”.

Server Jeparov (“Oq-tepa” bosh murabbiyi):

“Yigitlarga bugungi o'yin uchun rahmat aytaman. Ko'rsatmalarimizning deyarli barchasini amalga oshirishdi. Uchrashuv nazoratimiz ostida o'tdi, deyarli 70 foiz to'p nazorati bizda bo'ldi. Raqib himoyada yaxshi harakat qildi. Ayniqsa, qanotda o'ynaydigan ikki futbolchisini alohida takidlagan bo'lardim. Biz esa aynan qanotlarni yopishga urg'u qaratdik. Albatta, xatolarsiz o'sib bo'lmaydi, bu ham ularga tajriba bo'ldi.

O'tgan yildagi kabi bu yil ham Kubokning guruh bosqichida ishtirok etishni maqsad qilganmiz. Jiddiy raqiblarga  qarshi bahslar orqali yosh futbolchilarimiz yanada toblanishadi. Bu klubimizning ham asosiy maqsadi”.

Samandar Meliboev (“Havoqand” jamoasi bosh murabbiyi):

“Bugun birinchi o'yindan ham qiziqroq o'yin guvohi bo'ldik. Bu gal ham omad bizga kulib boqdi. Raqibimiz ancha kuchli edi. Biz esa endi shakllanayotgan jamoamiz. Har bir o'yindan o'zimiz uchun tajriba yig'ib boramiz. G'alabadan xursandman.

Futbolchilarim penaltilar seriyasiga ham tayyorgarlik ko'rib borishgandi. Ammo bugun penaltilar seriyasi bo'ladi deb o'ylamagan edik. Maqsadimiz asosiy vaqtning o'zida g'alaba qozonish edi. Biroq o'yin seriyagacha cho'zildi”.

Doston Oripov ("Jizzax FA" jamoasi bosh murabbiyi):

“Juda emociyalarga boy o'yin guvohiga aylandik. G'alaba qozonish ham, mag'lub bo'lish ham mumkin edi. Afsuski, g'alaba qozona olmadik.

Biz o'yin oldidan jiddiy xatoga yo'l qo'ydik. Yani, penaltilar seriyasiga tayyorgarlik ko'rmadik va bu bizga o'yinda pand berdi. Lekin umumiy olganda jamoam o'yinidan to'liq qoniqish hosil qildim.

Teglar: ozbekiston, kubogi, 2-bosqich, uchrashuvlaridan, song, murabbiylar, fikri,
← OldingaOrqaga →