Otabek Narzullaev: "Qayerdadir omadimiz kelmayapti. Bu futbol, ishlashda davom etishimiz kerak"

2026-04-08 04:00:02 / Kiritdi: BestMaster  O'qilgan: 8592

Superliga 6-turidan o'rin olgan "Mashal" - "Bunyodkor" (0:1) uchrashuvidan so'ng mezbonlar bosh murabbiyi Otabek Narzullaev o'yindan keyingi matbuot anjumanida ishtirok etdi.

"Qanday o'yin bo'lganini ko'rdingiz. Futbolchilar maydonga g'alaba uchun chiqib, yaxshi harakatlanishdi. O'yin so'ngidagi penalti va mag'lubiyat. Bu futbol. Ishlashda davom etamiz", - dedi Otabek Narzullaev bahs yakunlangach.

- Murtazoev provokaciyaga uchdimi? Vaziyat haqida gapirib o'tsangiz...

- Ochig'ini aytsam, o'sha vaziyatni ko'rmay qoldim. Vaziyatning takrorini ko'rib, bir fikr bildirishim mumkin bo'ladi.

- Penaltiga etirozingiz bormi?

- Ungacha bo'lgan vaziyatda etirozim bor. Burchak zarbasida. O'sha vaziyatni takroran ko'rsak bo'lardi. Hakamlar ishiga aralashmoqchi emasman.

- Olti turdan keyin ham natija yo'qligining sababi nimada?

- Hammada bir xil vaziyat. Biz ham bahona qila olmaymiz. Qayerdadir omadimiz kelmayapti desak bo'ladi. Yaxshi mashg'ulot olib borib, har bir o'yinga tayyorgarlik ko'ryapmiz. Hech qanday kamchilik yo'q. Bilmadim, aniq nima bilan bog'liq. Qayerdadir noto'g'ri ishlayotgan bo'lishimiz mumkin. Bularni o'rganib chiqishimiz kerak. Jamoa ichidagi muhit yaxshi.

- Joriy mavsumdagi futbolchilarning harakati qanday? Maxsus datchiklar orqali futbolchilarning ko'rsatkichlarini nazorat qilib borasizlar-ku.

- Har bir mashg'ulotda kuzatib boramiz. Kim tayyor bo'lsa maydonga tushadi. O'tgan mavsum bilan solishtirganimizda o'yinimiz yaxshilangan bo'lishi mumkin, ammo pasayish bo'lmagan. Har yili tarkibini yangilayverish har doim ham yaxshilikka olib kelmaydi. Jamoaga yaxshi saviyali futbolchilarni jalb etganmiz. Hammasi yaxshi bo'ladi.

- Ko'pchilik klublar legioner futbolchilarni olib kelishadi. Ular moddiy jihatdan mahalliy futbolchilar bilan bir xil maosh olayotgan bo'lsa ham, mahalliy futbolchilardan yaxshiroq o'yin namoyish etishi kerak. Jamoaga olinayotgan legioner mahalliy futbolchidan hech qaysi jabhada ustun bo'lmasa ham klub qanday qilib u bilan shartnoma tuzaveradi? "Mashal" legionerlari haqida fikr bildirib o'tsangiz...

- Fikrlarim ijobiy. Safimizga qo'shib olgan futbolchilarimizdan ko'nglimiz to'lmoqda. Hozirgi vaqtda kimni qancha vaqtga maydonga tushirish haqida o'ylayapmiz. O'yinlar ko'p, kim tezroq keyingi o'yinga tiklanib olsa, o'sha futbolchiga ko'proq imkon beramiz.

- "Mashal" safarda o'ynashga majbur bo'lmoqda. Stadion tayyor emas. O'tgan yili ham jamoa boshqa stadionda o'ynadi. Bu mavsum yakunida ham PFL talabi bajarilmaydimi?

- Menimcha, har jabhada ish ketyapti. Tribunalar va maydon. Kecha o'rinbosarlar jamoasi o'ynadi. Stadion ideal holatda. Nasib bo'lsa, o'z maydonimizga qaytamiz. Ish sekin astalik bilan ketmoqda.

Teglar: otabek, narzullaev, qayerdadir, omadimiz, kelmayapti, futbol, ishlashda, davom, etishimiz, kerak,
← OldingaOrqaga →