"Andijon" 2026 yilgi mavsum startida muvaffaqiyatsizlikka uchraganining besh sababi

2026-04-13 18:12:02 / Kiritdi: BestMaster  O'qilgan: 34

2026 yilgi mavsum starti oldidan "Andijon" oldiga Superligada kamida uchinchi o'rinni egallash vazifasi qo'yilgani ma'lum bo'ldi.

Jamoani Samvel Babayan qabul qilib oldi, tajribali mahalliy o'yinchilar va nom jihatdan qiziq legionerlar bilan shartnomalar imzolandi. Biroq etti turdan so'ng "Andijon" bor-yo'g'i olti ochko jamg'arib, turnir jadvalida ayni paytda 12-o'rinni egallab turibdi. Kecha esa Samvel Babayan bosh murabbiylik lavozimini tark etgani ma'lum bo'ldi.

Xo'sh, 2026 yilgi mavsum startida "Andijon"ning muvaffaqiyatsizlikka uchrashiga nimalar sabab bo'ldi?

1-sabab: o'ta yuqori umidlar

Birinchi va, ehtimol, eng asosiy sabab – bu o'ta yuqori umidlardir. "Andijon" 2024 yil O'zbekiston kubogini qo'lga kiritganidan so'ng, klub va viloyat rahbariyati Superligadagi mavqeini mustahkamlashni maqsad qilgandi. Shu bilan birga, "Andijon" moliyaviy sharoitlar borasida mamlakatning yetakchi klublaridan hamon ortda qolayotgan edi.

O'tgan yilning oxiridayoq "Andijon" yuqori darajada o'ynagan tajribali futbolchilarni – Cheran, Golban, To'xtaxo'jaev, Turg'unboev, Boltaboev, Boakelarni o'z safiga qo'shib olayotgani ma'lum bo'ldi. Bunday futbolchilar kam pulga evaziga o'ynamasligi aniq. Championat.Asia ma'lumotlariga ko'ra, Boakening yillik maoshi 400 ming dollarni (oyiga 33 ming dollar) tashkil etadi.

Shu tariqa, moliyaviy jihatdan "Andijon" Superliga yetakchilariga yaqinlashdi. Biroq katta miqdordagi sarmoyalar deyarli har doim natijalardan yuqori umidlar kutilishiga olib keladi. Qolaversa, bu natijalar qisqa muddatda talab qilinadi. Bularning barchasi dastlabki muvaffaqiyatsizliklardan so'ng jamoaga ruhiy tomondan bosim o'tkazdi. Chunki bir narsadan umid qilishgandi, ammo mutlaqo boshqacha natijaga erishildi.

2-sabab: "agressiv" selekciya

"Andijon" qishki transfer oynasida Superliganing eng faol klubi bo'ldi. Qariyb 20 nafar futbolchi bilan shartnoma imzolandi.

Aslida, mutlaqo yangi jamoa tuzilgandi. 2025 yilgi mavsumdagi "Andijon"dan deyarli hech narsa qolmadi. O'tgan yilgi tarkibga nisbatan hozir "Andijon"da faqat sakkiz nafar futbolchi qolgan: Eldor Adhamov, Abduvohid G'ulomov, Muhammadkarim Toirov, Abdurahmon Komilov, Damir Temirov, Usmonali Ismonaliev, Doniyor Abdumannopov va Sardor Azimov. Ulardan faqat uch nafari – Temirov, Ismonaliev va Abdumannopov etarlicha o'yin amaliyotiga ega bo'lmoqda.

Bunday keskin o'zgarishlar o'z ta’sirini o'tkazmay qolmadi. Deyarli barcha shakllangan o'zaro bog'lamlar buzildi, yangilarini esa uch-to'rt oy ichida yaratish juda qiyin. "Andijon" jamoa emas, balki bir-birini deyarli tushunmaydigan o'yinchilar to'plami edi. Taqqoslash uchun: "Neftchi", "Nasaf" va "Paxtakor" tarkiblari 2-3 yil davomida shakllangan. Kimdir jamoaga kelgan, kimdir ketgan, ammo jamoa o'zagi deyarli avvalgidek saqlanib qolgan. Ularda mavsumoldi tayyorgarlik vaqtida "Andijon"dagi kabi jiddiy o'zgarishlar kuzatilmagan edi.

3-sabab: yetakchilarning yomon sport formasi

"Andijon" ijrochilarning mahorati evaziga kerakli ochkolarni bemalol "yig'ib olishi" mumkin edi. To'g'ri, jamoa shakllanib ulgurmagan, ammo tarkibda og'ir damlarda jamoani o'z ortidan ergashtira oladigan tajribali futbolchilar bor edi.

Darvozabon Rahimjon Davronov "bartaraf etilgan gollar" ko'rsatkichi bo'yicha Superligadagi eng yomon darvozabonlardan biri bo'lib turibdi (-0,74). Kamida beshta o'yin o'tkazganlar orasida faqat O'tkir Yusupov (-1,6), Edem Nemanov (-1,5) va Nikola Stoshich (-1) undan yomonroq natija qayd etgan.

Himoyachilar Nemanya Chalasan va Igor Golban ham 90 daqiqa ichida mudofaadagi muvaffaqiyatli harakatlar soni bo'yicha Superliganing eng yomon himoyachilari ro'yxatiga kiritilgan (6,8 va 5,9).

Hujum chizig'i vakillarida ham ko'rsatkichlar unchalik yuqori emas. Dragan Cheran hujumdagi muvaffaqiyatli harakatlari soni bo'yicha Superligada 94-o'rinda bormoqda (1,06). Bu ko'rsatkichga darvozaga aniq zarbalar va uzatmalar hamda muvaffaqiyatli aldab o'tishlar kiradi. "Andijon"dan ushbu statistika bo'yicha liganing eng yaxshilari qatoriga faqat Imeda Ashortiya kirgan (3,45 – 23-o'rin). Martin Boake 6 ta o'yinda darvoza tomon bor-yo'g'i 6 ta zarba yo'llagan. Bu Superliga o'yinchilari orasida 62-o'rin demakdir.

4-sabab: omadsizlik

Samvel Babayan OKMKdan uchralgan mag'lubiyatdan so'ng o'tkazilgan matbuot anjumanida jamoasiga dastlabki turlarda omad kuchli darajada yetishmaganini ta'kidladi. Qisman shunday: WyScout ma'lumotlariga ko'ra, “Andijon” “kutilayotgan ochkolar” (xG) bo'yicha 9,9 ko'rsatkich bilan ligada to'rtinchi o'rinni egallab turibdi. Aslida, jamoa hozirgidek 6 ochko emas, balki 10 ochkoga etadigan o'yin ko'rsatdi. Xuddi shu holat kutilayotgan o'tkazib yuborilgan gollar (xGA) bo'yicha ham kuzatiladi – 9 ta gol o'tkazilgan bo'lsa-da, bu ko'rsatkich 4,9 ni tashkil qilmoqda. Bu shuni anglatadiki, "Andijon" keragidan deyarli ikki baravar ko'p gol o'tkazib yuborgan. Ammo bu yerda darvozabon va himoya chizig'ining omili ham katta rol o'ynaydi. Ular bir necha bor xatoga yo'l qo'yishdi va raqibga belgilanganidan ko'proq gol urishga "yordam" berishdi. Shu bilan birga, "Andijon" kutilayotgan gollar (xG) bo'yicha Superligada 14-o'rinni egallab turibdi – 5,5. Biroq andijonliklar 8 ta gol urishga muvaffaq bo'lishgan. Yani kutilganidan ko'proq gol urishdi.

5-sabab: muxlislar omili

Bir qarashda unchalik sezilmaydigan yana bir omil – bu muxlislardir. "Andijon" ishqibozlari jamoa o'yiniga ta’sir ko'rsata olishadi. "Bobur Arena" jamoani tinimsiz oldinga chorlayotgan bir paytda himoyaviy o'yin ko'rsatish juda qiyin.

O'tgan mavsumda biz bir qator muvaffaqiyatsiz o'yinlardan so'ng "Andijon" muxlislari qanday qilib boykot e'lon qilganini ko'rgandik (o'shanda jamoani Maksim Shackix boshqarayotgan edi). Stadionga muxlislar tashrifi keskin "tushib ketdi" – 14–15 mingdan 3–4 minggacha.

"Andijon" muxlislari – klubning o'ziga xos tashrif qog'ozi bo'lib, u hatto mamlakat tashqarisida ham keng tanilmoqda. Fan-klub rahbariyat qarorlariga ham bevosita ta’sir o'tkaza oladigan haqiqiy kuchga aylangan.

Nikolay Egorichev

Teglar: andijon, 2026, yilgi, mavsum, startida, muvaffaqiyatsizlikka, uchraganining, besh, sababi,
← Bosh sahifaOrqaga →