Temurxo'ja Abduxoliqov: "Gollarimni jamoaviy mehnat mahsuli deb hisoblayman"

2026-04-17 14:45:01 / Kiritdi: BestMaster  O'qilgan: 1668

“Lokomotiv” hujumchisi Temurxo'ja Abduxoliqovning ikkita goli Samaqarqandda jamoasiga uch ochko taqdim etdi.

Uning uzoqdan urgan goli ham O'zPFL, ham Championat.asia tomonidan 7-turning eng chiroyli goli deb topildi. Shu munosabat bilan klub matbuot xizmati hujumchining fikrlari bilan qiziqdi.

"Dinamo" bilan kechgan bahs haqida

- Qo'lga kiritilgan muhim g'alaba bilan barcha "Lokomotiv" muxlislarini tabriklayman. O'yin juda ajoyib kechdi. Samaqarqandda futbol o'ynaydigan ikkita jamoa o'zaro kurash olib bordi. Zerikarli futbol bizga ham yoqmaydi. Ishqibozlar qancha ko'p kelsa, biz uchun shuncha yaxshi.

Urgan gollari haqida

- Gollarimni jamoaviy mehnat mahsuli deb hisoblayman. Bu o'rinda hech kimni alohida ko'rsatmoqchi emasman. Hamma o'z ishini qildi va gollar urildi. Birinchi golda darvozabon oldinga chiqib ketganini ko'rdim va tavakkal zarba berdim. O'ylagan rejam amalga oshganidan xursandman.

Zarba berganimdan so'ng to'p havoga ko'tarilib tushdi va kirmasa kerak deb o'yladim. Chunki to'p to'g'ri bormadi, aylanib bordi, shunga kirmasa kerak, degan xayol o'tdi. Darvoza ustuniga tegsa kerak, deb o'yladim. Yaxshiyamki, gol bo'ldi. Ikkinchi golni erlatib urdim. Avvalgi o'yinlarda ham shunday zarba bergandim, lekin o'xshamagandi. Nima deysiz endi, nasib qilgani bo'ladi.

Eng chiroyli gol haqida

- Buni faoliyatimdagi eng chiroyli gol demagan bo'lardim. Avval ham muxlislarga yoqadigan gollar ko'p urganman. Lekin natija beradigan har bir gol men uchun chiroyli. 2016 yil O'zbekiston Kubogi finalida "Nasaf"ga - o'sha o'yin ham Samarqanddagi shu stadionda kechgandi - undan keyin Dubayda "Al Nasr" darvozasiga kiritgan bosh bilan gol, "Al Ittihod" darvozasiga urilgan penalti, "Sepaxon"ga uyda urgan golim - shular ham muhim gollar qatoriga kiradi.

Dastlabki 7 ta tur bo'yicha xulosa

- Bizga hujumda barqarorlik yetishmayapti. Bazi o'yinlarda vaziyatlardan foydalana olmadik. Gol ursak o'zimizga yaxshi. Mashg'ulotlarda buning ustida ishlayapmiz. Hujumni yakunlashda shaxsan o'zimda muammolar bor, shuni to'g'rilashga harakat qilyapman. Natijalarimiz bundan yaxshiroq bo'lishi mumkin edi, lekin shukur qilamiz. Nasib qilsa yo'qotilgan ochkolarni keyingi bellashuvlarda qaytarib olamiz.

Ketma-ket o'yinlar haqida

- Zo'r bo'lyapti, menga juda yoqyapti. Esingizda bo'lsa, avvallari har seshanba Osiyo chempionlar Ligasida, shanba kuni Superligada o'yinlar o'tkazardik. Juda ajoyib bo'lardi. Hozir ham har to'rtinchi-beshinchi kunda maydonga tushish zo'r bo'lyapti.

Teglar: temurxoja, abduxoliqov, gollarimni, jamoaviy, mehnat, mahsuli, hisoblayman,
← OldingaOrqaga →