Akmal Rustamov: "Ikki ochko yo'qotdik"

2026-04-29 23:45:02 / Kiritdi: BestMaster  O'qilgan: 628

Superliga 10-turdan o'rin olgan "Qizilqum" – "Xorazm" bahsi 0:0 hisobida yakun topdi.

O'yindan keyin "Qizilqum" bosh murabbiyi Akmal Rustamov matbuot anjumanida ishtirok etdi.

- O'yin haqida fikringiz?

- Og'ir bahs kechishini kutgandik. Imkoniyatlarimiz bo'ldi, lekin raqib darvozasiga yo'l topa olmadik. Taqvim nihoyatda tig'iz, o'yindan o'yinga futbolchilarni tiklash borasida qiyinchiliklar bo'lyapti. Bizda ikkita bir xil tarkib yo'q, shu bois har bir o'yindan keyin jamoani keyingi bahsga tayyorlash biz uchun eng muhim masala bo'lib turibdi. G'alaba qozonishni xohlagandik, buning uchun harakat qildik, futbolchilarga rahmat aytaman, ayniqsa qizil kartochkadan keyin yanayam jonlandik. Faqat raqib himoyasini yorib o'tishning imkoni bo'lmadi. Stadionga kelib bizni qo'llab turgan muxlislarga rahmat. Bugun ikki ochko yo'qotdik deb ayta olaman.

- Raqib juda qo'pol o'ynadi, lekin "Qizilqum" bunga javoban indamadi. Balki qo'pollikka qo'pollik bilan javob berish kerakmidi?

- "Xorazm" jamoasi kurashlarga boy harakat qilishini o'yindan oldin futbolchilarga aytgandim. Birinchi taymdan keyin ham shuni takrorladim. "Xorazm" o'ziyam futbol o'ynamaydi, birovga ham o'ynashga bermaydigan jamoa bo'lib tuyuldi menga. Buni bilardik va chindan ham shunday bo'ldi.

- Bir ochko oldingizmi yoki ikki ochko yo'qotdingizmi?

- Hozirgina aytib o'tganimdek, biz ikki ochko yo'qotdlik. Raqib bir kishi kam qolgach, to'liq himoyalandi va himoyani yorib o'tish qo'limizdan kelmadi. Biz yutishni xohlagandik, lekin o'xshamadi.

- Islom Kenjaboev nima uchun zaxiradan qo'shilyapti?

- Islom jarohati sabab bir oy muddatga safdan chiqqandi, endi o'zini tiklab o'yinlarga qaytyapti. Biz futbolchilarga 15-20 daqiqa berib sekin-asta qo'shib boramiz. Keyinroq vaqti kelganda asosiy tarkibda tushadi. Uning hozirgi holati yuz foiz yaxshi emas, 20-25 daqiqaga kuchi etadi. Oldinda mavsum uzoq, o'ylaymanki, Kenjaboev o'z gollari bilan muxlislarni hali xursand qiladi.

- May oyida start oladigan O'zbekiston Kubogida "Qizilqum" oldiga maqsad qo'yiladimi?

- Biz har bir turnirga hozirlik ko'ramiz. Kubok o'yinida Nukusga boramiz va u yerda sun'iy maydonda o'ynaymiz. Termizga boramiz, masofa uzoq. Tarkibda rotaciya bo'ladi, yoshlarga imkon beramiz, lekin Kubok musobaqasida ham kurashamiz.

Teglar: akmal, rustamov, ikki, ochko, yoqotdik,
← OldingaOrqaga →