Ilyos Zeytullaev: "Norxonovning jarohat olganidan biz ham xafa bo'ldik. Homiy topa olmaydigan jamoalar uchun katta xavf mavjud"
/ Kiritdi: BestMaster O'qilgan: 4310
O'zbekiston kubogi "E" guruh 2-tur doirasidagi "Qizilqum" - "Bunyodkor" (0:2) o'yinidan so'ng mehmonlar bosh murabbiyi Ilyos Zeytullaev matbuot anjumanida ishtirok etdi.
– Bugungi uchrashuv haqidagi fikrlaringiz...
– Avvalambor, yigitlarni guruhdan keyingi bosqichga chiqqani bilan tabriklamoqchiman, chunki o'yin oson kechmadi. Raqibning juda yaxshi jamoa ekanligini bilardik, shuning uchun ularni mag'lub etish qiyin bo'ldi. Birinchi bo'limda ko'proq ustunlik qildik, mazmunli futbol namoyish etdik. Ikkinchi bo'limda "Qizilqum" o'z darajasi va jismoniy ustunligini ko'rsatdi – ular haqiqatan ham juda kuchli jamoa. "Qizilqum" hujumchisi Shohro'z Norxonov haqida to'xtalib o'tmoqchiman. Unga tezroq sog'ayib ketishini tilayman. U jarohat olganida, rostini aytsam, biz ham juda xafa bo'ldik. Bu futbol, lekin umid qilamanki, u tezroq safga qaytadi. Biz esa o'z g'alabali seriyamizni davom ettirishga harakat qilyapmiz.
– Uch yildan so'ng futbol klublarini qo'llab-quvvatlash dasturi yakunlanadi. Nima deb o'ylaysiz, futbolimiz inqirozga yuz tutmaydimi?
– Juda o'rinli savol. O'ylaymanki, bunday qarorlarni qabul qilayotgan mutasaddilar, ehtimol, kelajakni ham chuqur tahlil qilishgan. Agar hozir qisqacha baho beradigan bo'lsam, albatta, mening fikrimcha, bu holat futbol darajasiga o'z ta’sirini o'tkazishi mumkin. Qay manoda? Hozir O'zbekistonda shunday darajaga etdikki, bu erga juda kuchli legionerlar kelmoqda va mahalliy chempionatda o'ynayotgan iqtidorli o'zbek futbolchilari ham bor – bu aynan moliyaviy taminot va qo'llab-quvvatlash natijasidir. Shuning uchun o'ylaymanki, homiy topa olmaydigan jamoalar uchun katta xavf mavjud – yaxshi futbolchilarning xorij, xususan, Osiyo klublariga kyetib qolish ehtimoli yuqori. Bu, albatta, ichki chempionat saviyasiga ta’sir qiladi. To'g'ri, bu vaziyat yosh futbolchilarning o'zlarini ko'rsatishiga imkon yaratadi, ammo chempionatning o'zi bundan zarar ko'rishidan biroz xavotirdaman. Lekin, yana bir bor takidlaymanki, umidim katta. Ehtimol, Prezidentimiz tomonidan tasdiqlangan ushbu uch yillik dastur davrida jamoalarga homiylar topishda ko'maklashilar, balki homiylar uchun ham bu manfaatli bo'lishiga sharoit yaratilar. Bu loyihadan o'zaro manfaat ko'rish yo'llarini chuqurroq o'rganish kerakdir. Albatta, bu mening vakolatimga kirmaydi, bu sohaning mutaxassisi emasman, ammo Yevropada uzoq yil yashagan inson sifatida, futbolimizning yanada rivojlanishini istardim. Shunday ekan, kuzatishda davom etamiz va hammasi yaxshi bo'ladi deb umid qilaman.
Teglar: ilyos, zeytullaev, norxonovning, jarohat, olganidan, xafa, boldik, homiy, topa, olmaydigan, jamoalar, uchun, katta, xavf, mavjud,
← OldingaOrqaga →

Bosh sahifaga
576
18 May 2026, 11:00