Akmal Rustamov: "Jamoamizga yangi "qon" kerak"
/ Kiritdi: BestMaster O'qilgan: 958
O'zbekiston Kubogi guruh bosqichidan o'rin olgan "Qizilqum" - "Bunyodkor" (0:2) uchrashuvidan keyin matbuot anjumani tashkil etildi.
Bunda "Qizilqum" bosh murabbiyi Akmal Rustamov ishtirok etdi.
- O'yin haqida fikringiz?
- O'yin yaxshi holat bilan boshlanmadi. O'zi shundoq ham olti nafar futbolchimiz jarohat sabab safdan chiqqan. Norxonov bilan jarohat olganlar ettita bo'ldi. Uning oyog'i singani yaxshi bo'lmadi. Hujumchimizga sog'lik tilab qolamiz. O'yinga keladigan bo'lsak, yaxshi tayyorgarlik ko'rgandik, biroq vaziyatlardan foydalana olmadik. "Bunyodkor" o'z vaziyatlaridan foydalandi, biz to'rt bor to'p kiritishga yaqin keldik. Afsuski, ikkita bir xil tarkibga ega emasmiz. Asosiy futbolchilarimizning jarohat olishi baribir ta’sir qilyapti. Yoshlarimizda harakat bor, faqat tajriba kam. Yoshlar ham bor kuch bilan harakat qilyapti, faqat futbolda klass baribir bilinib qoladi va farq qiladi. Ikkinchi davrada hamma sog'ayib safimizga qaytsa, ishimiz oldinga siljiydi deb o'ylayman.
- Jamoangizda shundoq ham hujumchilar kam. Mana endi Norxonov ham jarohat oldi. Buyog'iga muammoni qanday hal qilmoqchisiz?
- Kubokda yana bitta o'yinimiz qoldi. Shundan so'ng tatilga chiqamiz va hujumchi qidirishni boshlaymiz. Jamoamizga yangi "qon" kerak. Tartib-intizom bilan raqobat ham o'z o'rnida bo'lishi kerak. Ikkinchi davrada kuchayamiz va hammasi yaxshi bo'ladi. O'tgan yil mavsumni 9-o'rinda tugatgandik. Bu yil yuqoriroq o'rinlarni xohlaymiz. Buning uchun yaxshi futbolchilarni topamiz va yuqoriga harakat qilamiz.
Teglar: akmal, rustamov, jamoamizga, yangi, kerak,
← OldingaOrqaga →
Bosh sahifaga
371
18 May 2026, 11:02