Messining Jazoirga qarshi bahsdagi foli va hakamlar qarori tahlili
/ Kiritdi: BestMaster O'qilgan: 2926
Jahon chempionatining 1-turida Argentina Jazoirga qarshi maydonga tushdi va yirik 3-0 hisobida g'alaba qozondi. Sobiq jahon chempionlarining birinchi ochkosi Lionel Messining xet-triki evaziga qo'lga kiritildi.
O'zining 38 yoshida uchta to'p kiritib, “man of the match” sovrinini olganiga qaramay, uchrashuvdagi boshqa xatti-harakati tufayli Messi media olamda katta shovqin ko'tardi.
O'yinning 31-daqiqasida Leo Jazoir himoyachisi Aissa Mandiga qarshi qo'pollik ishlatdi. U butsisining tag qismi bilan raqibining himoyalanmagan qismi (boldiri)ni bosib oldi. Hakam bu vaziyatda hech qanday kartochka ko'rsatmadi va jarima belgilash bilan cheklandi. Bu esa ko'plab muxlislar va mashhur shaxslar o'rtasida keng muhokamalarga sabab bo'ldi.
Aslida Ronaldu va Messi kabi katta shaxslar atrofida bunday muhokamalar doim bo'lib kelgan. Ular bilan ro'y bergan har qanday bahsli vaziyatda hakamning chiqargan qarori turli konspirologik qarashlarga sabab bo'ladi. Istalgan ellikka-ellik vaziyat, Messi (yoki Ronaldu) bilan bo'ladigan bo'lsa, hakamlar qarori uchun muhokama qilinishi aniq. Agar qaror ikki yulduzning biriga foyda keltirsa (xuddi Messiga qizil berilmagani kabi), bu hakam va FIFAning futbolchi tarafga yon bosishi deb ko'riladi. Agar ularning zarariga qaror chiqarilsa, media tarafidan atayin qilingan nohaqlik sifatida talqin qilinadi.
Keling, endi vaziyatning o'ziga qaytamiz va turli xil fitna nazariyalariga chek qo'yamiz. Odatda futbolchi raqibining himoyalanmagan qismiga zarba bersa va bu zarba butsisining tag qismi bilan berilsa, aksar holatlarda o'yinchi bu ishi uchun maydondan chetlatiladi. Chunki bu usulda berilgan zarbalar raqibning butun boshli faoliyatiga chek qo'yishi va ayni damda o'tayotgan uchrashuvning tempiga salbiy ta’sir o'tkazishi mumkin. Ammo Lionel Messi istisno tariqasida maydonda qoldi va bunga ikkita katta sabab bor:
1 – Agressiya yo'qligi. Qoidabuzarlikni ijtimoiy tarmoqlarda keng tarqalgan rasmlar orqali emas, o'yinning o'zidan ko'rgan muxlis bu vaziyatga to'g'riroq baho beradi. O'yinning 31-daqiqasida temp o'rtacha va o'sha vaqtgacha to'xtalishga sabab bo'ladigan birorta jiddiy qo'pollik ishlatilmagan edi. Odatda bunday follar ikkala jamoa tarafidan ko'p qo'polliklar ishlatilib, futbolchilar orasida bolta-chopqi boshlanib ketganda sodir bo'ladi. Natijada hakam o'yinni bostirish, sovutish uchun fol qayd etgan futbolchiga qizil beradi. Sokin kechayotgan uchrashuvning birinchi bo'limida Messining ishlatgan qoidabuzarligi holat taqozosidan, avvalgi epizodlardan yig'ilib qolgan alam sababidan emas, balki to'p uchun kurashdagi ehtiyotsizlik tufayli sodir etildi, deb talqin qilindi.
2 – Vaziyat taqozosi. Qoidabuzarlik sodir bo'lganda to'p Jazoirning jarima maydoni yonida edi. Afrikaliklar bu vaqtda pozicion hujum boshlash harakatida edilar. Agarda bu istiqbolli hujumni to'xtatish bo'lganida, ehtimol, hakam boshqacharoq qaror qabul qilardi. Keskinlashtiruvchi uzatma yoki qarshi hujumdan boshqa holat bo'lgani uchun hakam bu vaziyatga engilroq baho berdi. Sokin, bir maromda o'tayotgan o'yindagi bunday vaziyat uchun qizil berib, o'yin tizginini qo'ldan chiqargisi kelmadi.
Garchi bir vaziyatni ikkinchisi bilan solishtirib hukm chiqarish har doim ham mutloq to'g'ri bo'lmasa-da, hakamlarning bunday kechirimliligi faqatgina yulduzlarga xos emasligini mana bu misollarda ham ko'rish mumkin:
Ushbu holatlarning birortasida qizil kartochka ko'rsatilmagan. Ikkala yulduz o'zining so'nggi Jahon chempionatini o'tkazayotgan bir paytda, ularning o'yinidan zavq olish o'rniga shunday epizodlardan norozi bo'lib yurgan muxlis ko'p narsa yo'qotadi. Futbolning jozibasini, asl tamini his qilish uchun kishi lug'atidan “kelishilgan”, “yon bosilgan” so'zlarini olib tashlagani maqul. Chunki shubha bilan qaralgan har qanday o'yin qarovchining nazdida shirasini yo'qotadi.
Avazbek Mirsaitov tayyorladi
Teglar: messining, jazoirga, qarshi, bahsdagi, foli, hakamlar, qarori, tahlili,
← OldingaOrqaga →
Bosh sahifaga
1271
Bugun, 20:21