JCH. O'zbekiston mundialdagi debyutida Kolumbiyaga yutqazdi

2026-06-18 09:12:01 / Kiritdi: BestMaster  O'qilgan: 21610

Jahon chempionati 1-turidan o'rin olgan O'zbekiston – Kolumbiya uchrashuvi yakunlandi.

Jahon chempionati

1-tur

O'zbekiston – Kolumbiya 1:3

Bosh hakam: Entoni Teylor

Yordamchi hakamlar: Gari Besvik, Adam Nann

To'rtinchi hakam: Xuan Kalderon

VAR hakami: Ivan Bebek

VAR yordamchilari: Jarred Jillett: Karlos Del Serro Grande

Zaxira yordamchi hakami: Xuan Karlos Mora

O'yin direktori: Luis Kastro

FIFA komissari: Serxio Galaverna

Gollar: 0:1 – 41, Daniel Munos (Luis Dias), 1:1 – 60, Abbosbek Fayzullaev, 1:2 – 65, Luis Dias (Gustavo Puerta), 1:3 – 90+9, Xaminton Kampas (Kucho Ernandes)

O'zbekiston – 1. O'tkir Yusupov, 2. Abduqodir Husanov, 5. Rustam Ashurmatov (26. Jahongir O'rozov, 77), 6. Akmal Mozgovoy, 7. Otabek Shukurov, 11. Oston O'runov (17. Dostonbek Hamdamov, 46), 13. Sherzod Nasrullaev (4. Farruh Sayfiev, 46), 14. Eldor Shomurodov (21. Igor Sergeev, 90+3), 18. Abdulla Abdullaev, 22. Abbosbek Fayzullaev (20. Azizbek Amonov, 77), 24. Behruzjon Karimov.

Zaxira – 12. Abduvohid Ne'matov, 16. Botirali Ergashev, 3. Hojiakbar Alijonov, 8. Jamshid Iskanderov, 9. Odiljon Hamrobekov, 10. Ruslanbek Jiyanov, 15. Umar Eshmurodov, 19. Azizjon G'aniev, 23. Sherzod Esanov, 25. Avazbek O'lmasaliev.

Kolumbiya – 12. Kamilo Vargas, 2. Daniel Munos, 3. Jon Lukumi, 7. Luis Dias (26. Andres Gomes, 90+3), 10. Xames Rodriges (21. Xaminton Kampas, 72), 11. Jon Arias (5. Kevin Kastano, 90+3), 14. Gustavo Puerta (6. Richard Rios, 80), 16. Jefferson Lerma, 17. Xoan Moxika, 23. Davinson Sanches, 25. Luis Suares (19. Kucho Ernandes, 80)

Zaxira – 1. David Ospina, 24. Alvaro Montero, 4. Santyago Arias, 8. Xorxe Karraskal, 9. Jon Kordoba, 13. Yerri Mina, 15. Xuan Portilya, 18. Viller Ditta, 20. Xuan Kintero, 22. Deyver Machado.

Ogohlantirishlar – Xoan Moxika (7), Abduqodir Husanov (34)

90+12' – UCHRASHUV YAKUNLANDI!

Nihoyat, bosh hakamning yakuniy hushtagi chalindi va haqiqiy drama guvohiga aylangan ushbu bahs o'z nihoyasiga etdi. Ikkinchi bo'limga qo'shib berilgan daqiqalar gollar, xavfli vaziyatlar va darvoza to'siniga tekkan zarba bilan futbol muxlislariga katta hayajon taqdim etdi.

O'zbekiston milliy terma jamoasi kuchli raqibga qarshi munosib kurash olib bordi, ammo yakunda Kolumbiya terma jamoasi 1:3 hisobidagi g'alabani qo'lga kiritdi.

Maydonda bor kuchini berib harakat qilgan yigitlarimizga rahmat aytamiz. Keyingi bahslarda terma jamoamizga omad va g'alabalar yor bo'lishini tilaymiz!

Aziz futbol ishqibozlari, matnli translyatsiyamizni kuzatib borganingiz uchun tashakkur! Xayr, salomat bo'ling!

90+11' – Oh, qanday vaziyat! Dramatik daqiqalar davom etmoqda! Behruz Karimov jarima maydonchasi tashqarisidan, juda uzoq masofadan kuchli va kutilmagan zarba yo'lladi. To'p raqib darvozabonining ustidan uchib o'tib, darvoza to'siniga tegib orqaga qaytdi!

Sal qoldi, juda chiroyli gol bo'lishi mumkin edi. Omad vakillarimizdan ochiqchasiga yuz o'girmoqda.

90+9' – GOL! Kolumbiya o'yinga nuqta qo'ydi – 1:3.

O'ng qanotdan jarima maydonchamiz ichiga havoda aniq uzatma amalga oshirildi. Zaxiradan maydonga tushgan Xamilton Kampas qulay poziciyada to'pni kutib oldi va bosh bilan darvozamizga aniq zarba yo'llab, gol urdi. O'tkir Yusupov bu vaziyatda jamoani qutqara olmadi.

90+7' – Attang! Dostonbek Hamdamov jarima to'pidan uzatmani amalga oshirdi, biroq to'p raqib maydonchasi ichidagi sheriklariga yetib bormadi va hech kimga tegmasdan maydonni tark etdi. Bugun standart vaziyatlardan unumli foydalana olmayotganimiz pand bermoqda.

90+7' – Vakillarimizda hisobni tenglashtirish uchun so'nggi va balki eng oxirgi imkoniyat! Jarima maydonchasi atrofida raqib futbolchisi qoidani buzdi va hakam O'zbekiston foydasiga xavfli jarima zarbasi belgiladi.

90+3' – Uchrashuvning so'nggi daqiqalarida har ikki terma jamoa tarkibida o'zgarishlar amalga oshirilmoqda.

Kolumbiya terma jamoasi bosh murabbiyi vaqtni cho'zish va himoyani kuchaytirish maqsadida bir yo'la ikkita o'zgarishga qo'l urdi: bugungi g'alaba goli muallifi Luis Dias hamda hozirgina penalti vaziyatida diqqat markazida bo'lgan Jon Arias maydonni tark etdi. Ularning o'rniga Andres Gomes va Kevin Kastano o'yinga qo'shildi.

O'zbekiston terma jamoasida ham o'zgarish: charchab qolgan sardorimiz Eldor Shomurodov o'rniga hujumni kuchaytirish uchun Igor Sergeev maydonga tushdi. Vakillarimiz bor kuchlari bilan oldinga tashlanishmoqda!

90+2' – Bahsli vaziyat! Farruh Sayfiev chap qanotdan jarima maydonchasi ichiga navbatdagi uzatmani amalga oshirdi. To'p Kolumbiya terma jamoasi a'zosi Jon Ariasning qo'liga tekkandek ko'rindi, vakillarimiz hakamga etiroz bildirishmoqda. Biroq bosh hakam Entoni Teylor o'yinni davom ettirishni so'radi va penalti yo'qligini ma'lum qildi. VAR hakamlari ham vaziyatga aralashishmadi. Vaqt esa o'tib bormoqda.

90' – Uchrashuvning asosiy vaqti tugadi. To'xtalishlar va tibbiy yordamlar hisobiga, to'rtinchi hakam ikkinchi bo'limga naqd 8 daqiqa vaqt qo'shib berilganini ko'rsatdi.

Hali imkoniyat bor, vakillarimizda hisobni tenglashtirish uchun butun boshli 8 daqiqa mavjud! Olg'a, O'zbekiston!

90' – Juda chiroyli hujum tashkil qilindi! Vakillarimiz qisqa uzatmalar bilan raqib himoyasini yorib kirib, ajoyib kombinaciya uyushtirishdi. Hujum yakunida Akmal Mozgovoy qulay poziciyadan kuchli zarba yo'lladi, biroq to'pga biroz aniqlik yetishmadi. Hisobni tenglashtirish uchun juda qulay imkoniyat boy berildi.

88' – Vakillarimizdan xavfli hujum! Dostonbek Hamdamov raqib darvozasi tomon kuchli zarba yo'lladi, biroq to'p himoyachiga tegib, rikoshet holatida maydon tashqarisiga chiqib ketdi. Bosh hakam burchakka ishora qildi. Standart vaziyatdan unumli foydalanish vaqti keldi, yigitlar!

86' – Darvozamiz oldida juda xavfli vaziyat! Kolumbiyaliklarning hujumi vaqtida Jefferson Lerma jarima maydonchamiz ichidan kuchli zarba yo'lladi. Baxtimizga, to'p darvoza ustuni yonidan o'tib ketdi.

84' – Vakillarimizda standart vaziyatdan unumli foydalanish uchun yaxshi imkoniyat yuzaga kelgandi. Otabek Shukurov jarima to'pini raqib maydonchasi ichiga uzatib berdi, biroq bu safar ham uzatma kutilganidek chiqmadi – to'p hech kimga tegmasdan maydonni tark etdi. Vaqt esa soat soniyalaridek tez o'tib bormoqda.

80' – Endi Kolumbiya terma jamoasi bosh murabbiyi ham tarkibda bir yo'la ikkita o'zgarishni amalga oshirmoqda.

O'yinning so'nggi daqiqalari yaqinlashmoqda, bahs keskin tus oldi!

77' – O'zbekiston terma jamoasi bosh murabbiyi tarkibda bir yo'la ikkita o'zgarishni amalga oshirmoqda. Himoya va hujum chizig'i yangilanmoqda:

Jarohat olgan Rustam Ashurmatov maydonni tark etdi, uning o'rniga Jahongir O'rozov o'yinga qo'shildi. Shuningdek, bugungi golimiz muallifi Abbosbek Fayzullaev ham zaxiraga olindi, uning o'rnini Azizbek Amonov egalladi. Yigitlardan yangi kuch va faollik kutib qolamiz!

76' – Maydonda to'xtalish. Himoyachimiz Rustam Ashurmatovga raqib bilan to'qnashuvdan so'ng shifokorlar tomonidan tibbiy yordam ko'rsatildi. Baxtimizga, hammasi joyida va u o'yinni davom ettirishga tayyor.

75' – Himoyachimiz Abduqodir Husanov Luis Diasni to'xtatib qoldi. Biroq hakam bu vaziyatda qoida buzildi deb topdi. Darvozamiz yaqinida xavfli standart vaziyat yuzaga kelmoqda, vakillarimizdan diqqatni maksimal darajada oshirish talab etiladi.

72' – Kolumbiya terma jamoasi tarkibida o'zgarish. Jamoa sardori va yetakchisi Xames Rodriges o'z o'rnini Xaminton Kampasga bo'shatib berdi. Mehmonlar hujum chizig'ini yangilashmoqda.

Jamoasi yutayotgan paytda almashtirilayotgan futbolchini ko'rganmisiz? U birdaniga yurishni unutib qo'yadi. Sakson yashar cholga aylanadi. Stadiondagi har bir muxlisga qarab qarsak chalib chiqadi. Lekin jamoasi yutqazayotgan bo'lsa-chi? Useyn Boltga aylanib qoladi!

69' – Bosh hakam Entoni Teylor uchrashuvdagi ikkinchi texnik tanaffus – kuling-breyk (cooling break) e'lon qildi.

Futbolchilar maydon chetida suv ichib, nafas rostlab olayotgan bir paytda, shifokorlarimiz darvozabonimiz O'tkir Yusupovga (1) tibbiy yordam ko'rsatishmoqda. Umid qilamizki, posbonimizning jarohati jiddiy emas va u o'yinni davom ettira oladi.

65' – GOL! Attang, afsuski, darvozamizdan ikkinchi to'pni olib chiqmoqdamiz. Markazda to'p yo'qotildi. Tezkor hujum natijasida Luis Dias jarima maydonimiz ichiga kirib bordi va kuchli zarba yo'lladi. Darvozabonimiz O'tkir Yusupov to'pni qaytarishga bor kuchi bilan urindi, biroq unga teggan to'p baribir qaysarlik qilib, darvoza to'ridan joy oldi. Hisob – 1:2.

60. GOOOOOOOOOOOOOOOOOOOOOOOOOOOLLLLLLLLLLLLLLLLLLL!!! Abbos!!! Abbos!!! Abbos Fayzullaev!!!Hamdamov chap qanotdan boshlagan hujumni Shomurodov zarba bilan davom ettirdi, darvozabondan qaytgan to'pni Fayzullaev bosh bilan bo'sh qolgan darvozaga to'g'rilab qo'ydi!Abboslar shunday tinib-tinchimas bo'ladi: biri qozonni tuzga to'ldirsa, biri darvozani to'pga to'ldiradi.

52' – Ikkinchi bo'limda maydonga tushgan Farruh Sayfiev o'z qanotini ancha faollashtirdi. Hozirgina u chap qanotdan yana katta tezlikda oldinga o'tib, jarima maydonchasi ichiga xavfli uzatma amalga oshirdi. Biroq Kolumbiya himoyachisi to'p yo'liga g'ov bo'lib, uni qaytarib yubordi.

50' – Vakillarimizda burchak zarbasidan foydalanish uchun yaxshi imkoniyat yuzaga kelgandi. Abbosbek Fayzullaev to'pni jarima maydonchasi ichiga uzatdi, biroq uzatma biroz kuchliroq chiqdi shekilli, to'p hech kimga tegmasdan maydonni tark etdi.

46' – Bosh hakam Entoni Teylorning hushtagi yangradi. Ikkinchi bo'lim boshlandi! Tarkibimizda ikki o'zgarish: Nasrullaev o'rniga Sayfiev, O'runov o'rniga Hamdamov maydonga tushirildi.

Xabaringiz bo'lsa kerak, ayni damda yurtimizning turli nuqtalarida mazkur uchrashuv katta ekranlarda namoyish etilmoqda.

Ko'pchilik shinavanda muxlislar emociyalarga shu qadar berilib ketadiki, o'zini murabbiy sifatida tasavvur qilib yuboradi. "Sherigingga oshir! Tezroq yugur! Nega uni maydonga tushirding?" Eng qizig'i shundaki, ular bu gaplarni televizorga shunchalik baqirib aytadiki, go'yoki ekran ichidagi Kannavaro uni eshitib, "Rahmat, Abdumannon, hozir aytganingdek qilaman!" deydigandek.

45+5' – Bosh hakam Entoni Teylorning hushtagi chalinib, birinchi bo'lim yakunlanganini bildirdi. Jamoalar tanaffusga yo'l olishmoqda.

Dastlabki 45 daqiqalikdan so'ng hisob – 0:1, Kolumbiya terma jamoasi foydasiga. Vakillarimiz maydonda munosib kurash olib borishmoqda, ikkinchi bo'limda murabbiylarning ko'rsatmalari evaziga o'yinni o'z tomonimizga og'dira olamiz degan umiddamiz. Qisqa tanaffus qilamiz.

45+2' – Kolumbiyaliklarning navbatdagi xavfli qarshi hujumi. Luis Dias chap qanotda katta tezlik bilan oldinga qochib ketishga urindi. Uning xavfli yurishini qaytarish uchun Behruzjon Karimov taktik fol ishlatib, raqibni to'xtatib qolishga majbur bo'ldi.

45' – Birinchi bo'limning asosiy vaqti yakunlandi. Bosh hakam Entoni Teylor jarohatlar va to'xtalishlar uchun birinchi bo'limga 5 daqiqa vaqt qo'shib berdi. Olg'a, yigitlar, tanaffusgacha hisobni tenglashtirish uchun hali imkoniyat bor!

41' – GOL. Afsus, darvozamizdan to'p olib chiqmoqdamiz. Diasning superuzatmasidan so'ng Daniel Munos jarima maydonchamiz ichiga yorib kirdi va Yusupov darvozasini ishg'ol qildi. Hisob ochildi – 0:1. Muxlislik qilishda davom etamiz, yigitlar hali vaziyatni o'nglashlariga ishonamiz!

Biroq bir narsa bizga taskin beradi: O'zbekiston va Kolumbiya terma jamoalari o'rtasidagi o'yinlar tarixidagi ilk gol muallifi Munos emas, Javlon Anorov hisoblanadi. Faqatning futbolning ukasi bo'lgan sport turida.

38' – Vakillarimizdan tezkor qarshi hujum! Sardorimiz Eldor Shomurodov katta tezlikda raqib darvozasi tomon qochib ketayotgan edi. Biroq Kolumbiya himoyachisi Jon Lukumi taktik qo'pollik ishlatib, Eldorni to'xtatib qoldi. Futbolchilarimiz hakamdan jazo talab qilishdi, ammo Entoni Teylor bu vaziyatda kartochka ko'rsatmaslikka qaror qildi.

34' – Abduqodir Husanov qanotda Luis Diasga qarshi juda keskin kurashga kirishdi va raqib bilan birga maydon chetidagi operatorni ham yiqitib yubordi. Bosh hakam Entoni Teylor bu qo'pollikni e'tiborsiz qoldirmadi va Husanovga sariq kartochka ko'rsatdi.

32' – Xavfli vaziyat! Darvozamiz oldida o'ta xavfli vaziyat yuzaga keldi. Kolumbiyaliklarning yulduzli futbolchisi Luis Dias chap qanotdan tezlik bilan jarima maydonchamiz ichiga yorib kirdi va chap oyoqda kuchli zarba yo'lladi. Baxtimizga, to'p darvoza ustuniga tegib, maydonga qaytdi!

30' – Eldor Shomurodovdan ajoyib harakat! Sardorimiz tezkor hujumda Kolumbiya himoyachisini chiroyli aldab o'tdi va xavfli vaziyat yuzaga keltirdi. Biroq raqibning boshqa bir himoyachisi – Jon Lukumi o'z vaqtida yordamga yetib kelib, xavfni bartaraf etdi. Vakillarimiz bosimni oshirmoqda!

30' – Kolumbiya terma jamoasi navbatdagi hujumga o'tayotgan edi, biroq ularning harakati qoida buzilishi bilan to'xtatildi. Raqib futbolchisi himoyaga yordam berayotgan Abbosbek Fayzullaevga nisbatan fol ishlatdi. To'p vakillarimizda.

23' – Bosh hakam Entoni Teylor uchrashuvda texnik tanaffus – “kuling-breyk” e'lon qildi. Futbolchilar maydon chetiga chiqib, suv ichib olishmoqda. Murabbiylar esa ushbu qisqa tanaffusdan foydalanib, o'z shogirdlariga keyingi daqiqalar uchun kerakli ko'rsatmalarni berib o'tishmoqda.

22' – Kolumbiyaliklarning navbatdagi hujumi muvaffaqiyatsiz yakunlandi. Gustavo Puerta o'ng qanotdan jarima maydonchamiz ichiga to'pni uzatgan edi, biroq uning pasi o'ta noaniq chiqdi. To'p hech kimga tegmay, maydon tashqarisiga chiqib ketdi.

18' – Kolumbiya terma jamoasi o'ng qanot orqali yana oldinga intildi. Biroq himoyachimiz Abdulla Abdullaev poziciyani to'g'ri tanlab, raqib futbolchisiga imkoniyat qoldirmadi va to'pni chiroyli tarzda maydon tashqarisiga chiqarib yubordi. Xavf bartaraf etildi.

17' – Markazda kutilmagan xato! Vakillarimizdan biri to'pni raqibga oldirib qo'ydi va Kolumbiya tezkor qarshi hujumga o'tdi. Jon Arias qulay poziciyaga chiqib borib, darvozamiz tomon xavfli zarba yo'lladi. Baxtimizga, to'p darvoza ustuni yonidan o'tib ketdi.

16' – Raqibning xavfli uzatmasidan so'ng, darvozabonimiz O'tkir Yusupov to'pni egallash uchun oldinga chiqib keldi va himoyachimiz Abduqodir Husanovbilan to'qnashib ketdi. Yusupovga maydonning o'zida tibbiy yordam ko'rsatilmoqda.

14' – Behruzjon Karimov o'z qanotida juda faol va ishonchli harakat qilmoqda. Raqibning yulduzli vakillariga qarshi kechayotgan yakkakurashlarning barchasida Behruzjon ustun kelib, Kolumbiya hujumlarini chiroyli tarzda yo'qqa chiqarmoqda. Barakalla!

13' – Kolumbiya terma jamoasining o'ng qanotdan tashkil etgan navbatdagi hujumi uzilib qoldi. Daniel Munos sherigidan to'pni qabul qilib olayotgan vaziyatda yordamchi hakam bayroqchasini ko'tardi – ofsayd.

12' – Kolumbiyaliklar chap qanotdan xavfli hujum uyushtirishdi. To'p jarima maydonchasi markaziga uzatildi, biroq himoyachimiz Abdulla Abdullaev to'pga birinchi bo'lib yetib keldi va uni uzoqlashtirib, xavfni bartaraf etdi.

7' – Vakillarimizning tezkor hujumi! Abbosbek Fayzullaev o'ng qanotda chiroyli harakat bilan Xoan Moxikani ortda qoldirib, oldinga intildi. Kolumbiyalik himoyachi Abbosbekni faqat qo'pollik evaziga to'xtatishga majbur bo'ldi. Bahsdagi ilk ogohlantirish – Xoan Moxikaga sariq kartochka ko'rsatildi.

5' – Xames Rodriges jarima zarbasidan to'pni darvozamiz tomon xavfli tarzda uzatdi. Biroq darvozabonimiz O'tkir Yusupov ishonchli harakat qilib, to'pni mushtlari bilan urib yubordi va xavfni bartaraf etdi.

4' – Himoyachimiz Abduqodir Husanov raqib vingeri Xoan Moxikaga nisbatan qoidani buzdi. Entoni Teylor o'yinni to'xtatdi. Kolumbiya terma jamoasi foydasiga jarima zarbasi belgilandi.

3' – Kolumbiya terma jamoasi ilk xavfli hujumini tashkil etdi. Raqiblar o'ng qanotdan oldinga o'tishdi, biroq Daniel Munos sherigining uzatmasiga eta olmadi. To'p maydon tashqarisiga chiqib ketdi.

2' – Abbosbek Fayzullaev jarima zarbasidan to'pni raqib jarima maydonchasi ichiga uzatdi. Biroq Kolumbiya terma jamoasi himoyachisi bosh bilan ishonchli o'ynab, xavfni bartaraf etdi va to'pni qaytarib yubordi.

1' – O'yinning ilk daqiqasidayoq maydonda keskinlik. Kolumbiyalik futbolchilar sardorimiz Eldor Shomurodovga nisbatan qo'pollik ishlatishdi. Bosh hakam qoida buzilishini qayd etdi. Vakillarimiz foydasiga standart vaziyat – jarima zarbasi!

1. O'yin boshlandi. Garchi libosimizdagi brend ostida muzqaymoq ishlab chiqarilsa ham tarixning yangi sahifasidagi hisob Hasanboy Do'smatov va Yuberxen Martines o'rtasidagi jang natijasiga o'xshashini istab qolamiz.

Jamoalar yashil maydonga chiqib kelishdi. Har ikki mamlakatning davlat madhiyalari yangradi. Tribunalar va maydonda haqiqiy bayram muhiti. Hamma narsa taxt, start hushtagini kutamiz!

Assalomu alaykum, qadrli futbol ixlosmandlari! Bugun O'zbekiston futboli tarixining yangi sahifasiga qayd etiladigan o'yin guvohiga aylanamiz. Milliy terma jamoamiz Janubiy Amerikaning eng kuchli grandlaridan biri – Kolumbiyaga qarshi saf tortmoqda. Bugun stadionga yig'ilgan va ekran qarshisida turgan millionlab vatandoshlarimizning nigohi yashil maydonga qaratilgan. Futbolchilarimizdan ijobiy natija kutib qolamiz!

Teglar: ozbekiston, mundialdagi, debyutida, kolumbiyaga, yutqazdi,
← OldingaOrqaga →