Jazoir futbol federatsiyasi Argentinaga qarshi o'yindagi hakamlik ustidan FIFAga shikoyat qildi

2026-06-20 09:54:01 / Kiritdi: BestMaster  O'qilgan: 4622

Jazoir futbol federatsiyasi JCH-2026 doirasidagi Argentina va Jazoir terma jamoalari o'rtasidagi uchrashuvda polshalik bosh hakam Shimon Marcinyak tomonidan yo'l qo'yilgan xatolar yuzasidan FIFAga rasmiy shikoyat arizasini kiritdi.

Bu haqda TSA nashri xabar bermoqda.

O'z arizasida federatsiya argentinalik futbolchilar tomonidan sodir etilgan va jazosiz qolgan ikkita jiddiy qo'pollikni alohida ko'rsatib o'tgan. Birinchi vaziyat - uchrashuvning 31-daqiqasida Argentina hujumchisi Lionel Messining Jazoir himoyachisi Ayssa Mandining boldir qismiga bergan zarbasidir. Butsa shiplari bilan ochiqchasiga zarba berilganiga qaramay, Marcinyak hatto sariq kartochka ham ko'rsatmagan.

Ikkinchi hakamlik xatosi sifatida 74-daqiqada argentinalik yarim himoyachi Aleksis Mak Alisterning jazoirlik yarim himoyachi Ibrahim Mazaning yuz qismiga tirsak bilan bergan zarbasi ko'rsatilgan. Ushbu vaziyatda Jazoir vakili maydonga yiqilgan bo'lsa-da, penalti belgilanmagan.

Eslatib o'tamiz, 17 iyun kuni bo'lib o'tgan uchrashuv 3:0 hisobida Argentina foydasiga hal bo'lgan edi. Jamoa sardori Lionel Messi 17, 60 va 76-daqiqalarda gol urib, xet-trik qayd etgan. Guruh bosqichi 1-tur natijalariga ko'ra, Argentina va Jazoir "J" guruhida mos ravishda birinchi va to'rtinchi o'rinlarni egallab turishibdi.

Teglar: jazoir, futbol, federatsiyasi, argentinaga, qarshi, oyindagi, hakamlik, ustidan, fifaga, shikoyat, qildi,
← OldingaOrqaga →