JCH–2026 ishtirokchisi bo'lgan terma jamoaning 8 nafar futbolchisida doping izlari aniqlandi
/ Kiritdi: BestMaster O'qilgan: 5870
Jahon chempionati–2026da ishtirok etgan Tunis terma jamoasining 8 nafar futbolchisi topshirgan doping namunalarida klenbuterol moddasi izlari aniqlandi.
Futbolchilarning shaxsi oshkor etilmagan. Shuningdek, ularning hech biri musobaqalardan chetlatilmagan, chunki aniqlangan modda miqdori belgilangan meyordan past bo'lgan. Bu meyor Meksikada klenbuterol bilan zararlangan go'sht istemoli bilan bog'liq holatlar ko'payganidan keyin joriy etilgan. Mazkur modda ayrim holatlarda chorvachilikda noqonuniy ravishda qo'llaniladi.
Ma'lum qilinishicha, Tunis terma jamoasi Jahon chempionati davomida Meksikaning Monterrey shahrida joylashgan bo'lgan. Ijobiy natija qayd etilgan namunalarning bir qismi Niderlandiyaga qarshi guruh bosqichining so'nggi o'yinidan (1:3) 10–14 kun avval olingan.
Klenbuterol Jahon antidoping agentligi (WADA) tomonidan taqiqlangan moddalar ro'yxatiga kiritilgan bo'lib, u anabolik steroidlarga o'xshash ta’sir ko'rsatadi. U mushak massasini oshirish va yog' to'qimalarini kamaytirish xususiyatiga ega.
Tunis futbol federatsiyasi, futbolchilar va ularning klublari tekshiruv natijalari haqida xabardor qilingan. Hozirda qo'shimcha tekshiruv ishlari olib borilmoqda va dastlabki ma'lumotlarga ko'ra, futbolchilarga nisbatan jazo qo'llanilishi kutilmayapti.
Eslatib o'tamiz, Tunis terma jamoasi JCH–2026 guruh bosqichidagi barcha uchrashuvlarda mag'lub bo'lib, 2:12 to'plar nisbati bilan musobaqani tark etgan. Jamoa Yaponiyaga 0:4, Shvetsiyaga esa 1:5 hisobida imkoniyatni boy bergan. Shvetsiyadan uchralgan mag'lubiyatdan so'ng bosh murabbiy Sabri Lyamushi iste'foga chiqarilib, uning o'rnini Erve Renar egallagan edi.
Teglar: jch–2026, ishtirokchisi, bolgan, terma, jamoaning, nafar, futbolchisida, doping, izlari, aniqlandi,
← OldingaOrqaga →
Bosh sahifaga
418