Superliga. "Lokomotiv" - "Andijon" o'yinida jangovar durang qayd etildi

2026-07-22 22:00:02 / Kiritdi: BestMaster  O'qilgan: 3396

"Lokomotiv" hamda "Andijon" o'rtasida o'tkaziladigan Superliganing 13-tur bahsi yakunlandi.

O'zbekiston Superligasi. 13-tur

"Lokomotiv" - "Andijon" 3:3

Bosh hakam: Firdavs NorsafarovYordamchi hakamlar: Mahmud Turdiev, Feruz DostonovZaxira hakami: Shodiyor ShodiboevVAR: Akobirxo'ja ShukurullaevAVAR: Umidjon RahimjonovNazoratchi: Baxtiyor TagaevKomissar: Muhammad Sodiq Sodiq-Ohunov

Gollar: 1:0 – 43, Abdulloh Yo'ldoshev (Suhrob Nurulloev); 2:0 – 53, Sardor Mirzaev (Diyorjon Turopov); 2:1 – 68, Aleksandre Androkinashvili (Mahmudjon Mahamadjonov); 2:2 – 72, Dragan Cheran (Humoyunmirzo Iminov); 3:2 – 79, Nikolay Ivanov; 3:3 – 89, Hamidullo Karimov (Aleksandre Androkinashvili)

"Lokomotiv": 1. Aleksey Kozlov, 9. Suhrob Nurulloev, 10. Shodiyor Shodiboev (99. Jasurbek Yaxshiboev, 83), 11. Temurxo'ja Abduxoliqov, 17. Sardor Mirzaev, 18. Aleksandr Kucherenko, 23. Diyorjon Turopov, 26. Abdulloh Yo'ldoshev, 28. Shuhrat Muhammadiev, 33. Oleg Zoteev, 45. Yovan Nishich (14. Nikolay Ivanov, 75)

Zaxira: 12. Nikita Shevchenko, 5. Anzur Ismailov, 7. Quvonchbek Abraev, 8. Bilol Tupliev, 21. Ilya Yelichich, 22. Sunnatilla Poyonov, 61. Nurlan Ibraimov.

"Andijon": 1. Eldor Adhamov, 5. Abdulvohid G'ulomov (10. Dragan Cheran, 46), 6. Aleksandre Androkinashvili, 7. Po'latxo'ja Xoldorxonov, 11. Humoyunmirzo Iminov, 15. Nemanya Chalasan, 20. Islom To'xtaxo'jaev, 22. Usmonali Ismonaliev, 26. Muhammadkarim Toirov (2. Odilbek Abdumajidov, 90+5), 28. Bekzod Sulaymonov (70. Hamidullo Karimov, 89), 77. Mahmudjon Mahamadjonov.

Zaxira: 21. Nematulloh Rustamjonov, 14. Abdurahmon Komilov, 47. Diyorbek Madaminov, 49. Zulfiqor Akbarov, 87. Jamshidbek Ko'paysinov, 88. Shohjahon Yorqinboev.

Ogohlantirishlar: Po'latxo'ja Xoldorxonov (20), Oleg Zoteev (71)

90+5' UCHRASHUV TUGADI! HAQIQIY FUTBOL TRILLERI!

Hakamning final xushtagi chalindi. "Lokomotiv" va "Andijon" jamoalari o'rtasidagi keskin va gollarga boy kechgan bellashuv 3:3 hisobidagi durang bilan yakunlandi!

Ikkinchi bo'limda muxlislar haqiqiy drama guvohi bo'lishdi: tomonlar navbatma-navbat oldinga chiqib, oxirgi daqiqalargacha keskin kurash olib borishdi. Jangovor va ajoyib o'yin uchun ikkala jamoaga ham tashakkur!

90' Ikkinchi bo'limga 5 daqiqa vaqt qo'shib berildi!

Hakam besh daqiqalik qo'shimcha vaqt ajratdi. Bu trillyerda g'olib nomi aniqlanadimi yoki jamoalar ochkolarni bo'lishib olishadimi? Ikkala jamoa ham maydonda bor kuchini berib kurashmoqda, oxirgi soniyalar juda issiq kechadi!

89' GOOOOOOL! Nimalar bo'lyapti o'zi?! "Andijon" yana hisobni tenglashtirmoqda - 3:3!

Super-zamena! Maydonga tushganiga atigi bir daqiqa bo'lgan Hamidullo Karimov qahramonga aylanmoqda! Aleksandre Androkinashvilining olisdan yo'llagan ajoyib uzatmasiga Karimov oxirigacha kurashdi. Darvozabon bilan birga-bir vaziyatga chiqib, zarba berish noqulay bo'lishiga qaramay, to'pni Aleksey Kozlovning yonidan o'tkazib, to'rga joylab qo'ydi!

Maydonda haqiqiy triller! Butun jamoa xursandchilikni nishonlamoqda!

88' "Andijon" tarkibida so'nggi o'zgarish!

Mehmonlar ustozi tavakkalga qo'l urmoqda: Bekzod Sulaymonov o'rniga maydonga Hamidullo Karimov tushirilmoqda. Andijonliklar hujum chizig'ini yanada kuchaytirib, so'nggi daqiqalarda muvozanatni tiklash uchun barcha kuchlarini oldinga tashlashmoqda!

Dramaviy yakun bizni kutmoqda!

87' Xavfli vaziyat! "Lokomotiv"dan tezkor qarshi hujum!

Zaxiradan maydonga tushgan Jasurbek Yaxshiboev "Andijon" himoyachilarining ochiq qolgan hududidan unumli foydalanib, oldinga yorib kirdi va kuchli zarba yo'lladi! To'p darvoza ustuniga tegib qaytdi! Mehmonlarni qaytgan to'p va omad qutqarib qolmoqda, "Lokomotiv" to'rtinchi golga juda yaqin keldi!

83' "Lokomotiv" safida Shodiyor Shodiboev o'rniga maydonga Jasurbek Yaxshiboev tushmoqda! Mezbonlar hujum chizig'iga tajriba va tezlik qo'shib, o'yin oxirida ustunlikni mustahkamlashni maqsad qilishgan.

O'yin finaliga oz vaqt qolmoqda, "Andijon" esa katta kuch bilan oldinga tashlanmoqda!

79' GOOOOOOL! "Lokomotiv" yana oldinga chiqmoqda - 3:2!

Zaxiradan maydonga tushganiga atigi to'rt daqiqa bo'lgan Nikolay Ivanov o'tkir burchakdan jarima zarbasini ijro etdi! Uning zarbasidan so'ng to'p raqib futbolchisiga tegib, yo'nalishini o'zgartirdi va "Andijon" darvozaboni Eldor Adhamovni chalg'itib, to'rga borib tushdi! Mezbonlar yana ustunlikni o'z qo'llariga olishdi!

75' Maydonda ehtiroslar avjida!

Oldinga katta tezlikda qochib ketayotgan Shodiyor Shodiboevni Islom To'xtaxo'jaev taktik qo'pollik evaziga to'xtatib qoldi. Hakam ikkalanmay "Andijon" himoyachisiga sariq kartochka ko'rsatdi.

"Lokomotiv" tarkibida o'zgarish: Yovan Nishich o'rniga maydonga Nikolay Ivanov tushmoqda. Mezbonlar maydon markazini yangilashmoqda!

72' GOOOOOOL! "Andijon" muvozanatni tiklamoqda - 2:2!

Standart vaziyat ish berdi! Humoyunmirzo Iminov jarima to'pini juda aniq uzatib berdi, jarima maydonchasi ichida esa zaxiradan maydonga tushgan Dragan Cheran boshi bilan ajoyib va aniq zarba yo'llab, to'pni darvozaga joylab qo'ydi! Mehmonlar ikkita to'p farqini yo'qqa chiqarishdi, o'yinda shiddat avjiga chiqmoqda!

71' O'yinda maydon qizimoqda! Oleg Zoteev raqib hujumchisi Po'latxo'ja Xoldorxonovga nisbatan qo'pollik ishlatdi va hakam tomonidan sariq kartochka bilan jazolandi.

"Andijon" standart vaziyatga ega bo'lmoqda, bu mehmonlar uchun hisobni tenglashtirishga yaxshi imkoniyat!

68' GOOOOOOL! "Andijon" hisobni qisqartirmoqda - 2:1!

Aleksandre Androkinashvili markaziy zonada raqibini chiroyli harakat bilan aldab o'tdi va 18–20 metrlar atrofidan darvozaning pastki burchagini aniq nishonga oldi! Darvozabon Aleksey Kozlov bu safar jamoasini qutqara olmadi. Mehmonlar intrigani qaytarishdi, o'yin yanada shiddatli tus olmoqda!

65' O'yinda shiddat yuqori! Juda xavfli daqiqalar guvohiga aylanmoqdamiz.

Dastlab "Andijon" futbolchisi ajoyib zarba yo'lladi, ammo "Lokomotiv" posboni Aleksey Kozlov mahorat ko'rsatib, jamoasini muqarrar goldan qutqarib qoldi. Ko'p o'tmay, "Lokomotiv" qarshi hujumga o'tdi - Suhrob Nurulloev raqib jarima maydonchasida qulay imkoniyatga ega bo'lib zarba berdi, ammo to'p himoyachiga tegib, maydonni tark etdi. Burchak to'pi!

61' "Lokomotiv" yana xavf soladi! Temurxo'ja Abduxoliqov Islom To'xtaxo'jaevning kuchli bosimi va taqibiga qaramay oldinga yorib kirdi va darvoza tomon zarba berdi. To'p tashqi tomondan to'rga tegdi, juda xavfli vaziyat!

57' "Andijon"dan xavfli vaziyat! Chap qanotdan oshirilgan ajoyib uzatmaga Po'latxo'ja Xoldorxonov boshi bilan zarba yo'lladi. To'p darvoza ustuni yonidan o'tib ketdi, mehmonlar hisobni qisqartirishga juda yaqin kelishgandi!

53' GOOOOOOOOL! "Lokomotiv" hisobdagi farqni oshirmoqda - 2:0!

Shodiyor Shodiboev raqib himoyachisini ajoyib aldab o'tib, darvozaga zarba yo'lladi. Himoyachidan qaytgan to'pni Diyorjon Turopov egallab, jarima maydonchasi markaziga aniq pas uzatdi. U yerda paydo bo'lgan Sardor Mirzaev esa yaqin masofadan to'pni darvozaga joylab qo'ydi! Mezbonlar ustunlikni mustahkamlashmoqda!

51' "Andijon"dan javob hujumi! Usmonali Ismonaliev olis masofadan tavakkal qilib kuchli zarba yo'lladi, ammo to'p darvoza to'sini yuqorisidan o'tib ketdi. Mehmonlar faollikni oshirishmoqda!

47' "Lokomotiv"dan xavfli hujum! Sardor Mirzaevning ajoyib uzatmasidan so'ng Shodiyor Shodiboev to'xtatmasdan darvoza tomon zarba yo'lladi. Biroq "Andijon" posboni Eldor Adhamov o'z o'rnida ishonchli harakat qilib, to'pni egallab oldi.

46' Ikkinchi bo'lim boshlandi!

"Andijon" tarkibida tanaffusdayoq o'zgarish: Abdulvohid G'ulomov o'rniga maydonga Dragan Cheran tushdi. Mehmonlar hujum chizig'ini kuchaytirib, hisobni tenglashtirish uchun oldinga tashlanishmoqda!

45+3' Birinchi bo'lim yakunlandi!

"Lokomotiv" ketma-ket xavfli hujumlar va ustunlarga teggan zarbalardan so'ng bo'lim so'nggida baribir o'z maqsadiga erishdi. To'p nazorati va bosim mezbonlar tomonida bo'ldi. Jamoalar tanaffusga "Lokomotiv"ning kichik ustunligi bilan yo'l olishmoqda - 1:0.

45' Birinchi bo'limga hakam tomonidan 3 daqiqa vaqt qo'shib berildi.

43' GOOOOOOL! "Lokomotiv" hisobni ochmoqda!

Suhrob Nurulloevning o'ng qanotdan etkazib bergan ajoyib uzatmasini Abdulloh Yo'ldoshev bosh bilan aniq va kuchli zarba orqali raqib darvozasiga joylab qo'ydi. Mezbonlar o'z bosimini baribir golga aylantirishdi - 1:0!

39' Yana bir o'ta xavfli vaziyat! Temurxo'ja Abduxoliqov jarima maydonchasi ichida raqib himoyachilarini ortda qoldirib, kuchli zarba yo'lladi. To'p darvoza ustuniga tegib, maydonni tark etdi. "Lokomotiv" bosimni oshirmoqda!

35' Juda xavfli vaziyat! "Lokomotiv"ning burchakdan boshlagan hujumida Suhrob Nurulloev jarima maydonchasiga to'pni oshirdi. Abdulloh Yo'ldoshev bosh bilan juda xavfli zarba yo'lladi - to'p darvoza ustuniga tegdi! Ammo uzatma paytida to'p allaqachon maydon tashqarisiga chiqib ketgani ma'lum bo'ldi.

32' "Lokomotiv" burchak to'pidan uzatmadan so'ng ketma-ket hujum tashkil etdi. Biroq yakuniy zarba noaniq chiqdi va xavf bartaraf etildi.

28' Temurxo'ja Abduxoliqov havodagi kurashda ustunlik qilib, to'pni jamoadoshiga oshirdi. Sardor Mirzaev qulay imkoniyatdan foydalanib zarba yo'lladi, biroq uning zarbasiga aniqlik yetishmadi.

27' O'yinda qisqa tanaffus (Cooling break). Havo harorati yuqori bo'lgani sababli bosh hakam futbolchilarga suv ichib olish uchun imkoniyat berdi. Murabbiylar esa shogirdlariga ko'rsatmalar berishmoqda.

20' Maydonda sariq kartochka! Po'latxo'ja Xoldorxonov Shuhrat Muhammadievga nisbatan qo'pollik ishlatgani uchun bosh hakam tomonidan ogohlantirildi.

16' "Lokomotiv"dan navbatdagi xavfli vaziyat! Chap qanotdan Oleg Zoteev jarima maydonchasi ichiga ajoyib uzatma oshirdi, Diyorjon Turapov esa akrobatik uslubda zarba yo'lladi. Ammo to'p darvoza to'sini yuqorisidan o'tib ketdi.

10' GOL! "Lokomotiv" to'p kiritdi, ammo hisob o'zgarmaydi! Qanot hakami bayroqchasini ko'tardi - Mirzaev tomon golli uzatmadan oldin Temurxo'ja Abduxoliqov to'pni qo'li bilan o'ynagan deb topdi. Gol bekor qilindi.

7' "Andijon"dan tezkor qarshi hujum! Aleksandre Androkinashvili o'ng oyoqda darvoza tomon kuchli zarba yo'lladi, ammo to'p nishondan balandlab o'tib ketdi.

7' "Lokomotiv" chap qanotdan xavfli hujum tashkil etdi! Maydon egalari futbolchisi jarima maydonchasi ichiga yorib kirib, markazga uzatmani amalga oshirdi. Baxtga qarshi, u yerda jamoadoshlaridan hech kim topilmadi - "Andijon" himoyachisi Mahmudjon Mahamadjonov xavfni bartaraf etib, to'pni autga chiqarib yubordi.

1' O'yinga start berildi! "Lokomotiv" qizil, "Andijon" esa oq rangli liboslarda maydonga tushdi. Markazdan to'p o'yinga kiritildi.

Jamoalar maydonga chiqib kelishdi. Hakamlar va futbolchilar saf tortishmoqda, uchrashuv boshlanish arafasida.

Teglar: superliga, lokomotiv, andijon, oyinida, jangovar, durang, qayd, etildi,
← OldingaOrqaga →