Kamoliddin Tojiev: "Vodiy derbisida ‘Navbahor’ga muxlislik qilamiz"
/ Kiritdi: BestMaster O'qilgan: 5640
"Paxtakor" bosh murabbiyi Kamoliddin Tojiev Superliga 14-tur doirasida "Bunyodkor"ga qarshi o'yindan keyin matbuot anjmunida ishtirok etib, "Neftchi" va "Navbahor" o'rtasidagi vodiy derbisida qaysi jamoani qo'llab-quvvatlashi haqida fikr bildirdi.
– O'yin haqida...
– Assalomu alaykum. O'yin haqida to'xtalsam, uchrashuvni yaxshi boshladik. Dastlabki 1-daqiqadayoq birga-bir vaziyatga chiqdik, biroq gol ura olmadik. Yaratilgan vaziyatlardan yana foydalana olmayapmiz. 1:0 – qaltis hisob. Gol o'tkazib yuborishdan qandaydir xavotir bor. Buni ko'rib chiqamiz va yaratilgan vaziyatlardan unumli foydalanishga harakat qilamiz.
– Tanaffusdan keyingi qatorasiga uchinchi o'yinda vaziyatlar etarlicha yaratilmoqda, biroq ularni amalga oshirish (realizaciya) pand beryapti. To'qson daqiqa davomida darvozaga atigi ikkita aniq zarba berilgan. Bu juda past ko'rsatkich. Muammo nimada? Chunki "Xorazm" va "Lokomotiv" jamoalariga qarshi kechgan bahslarda ham ko'plab golli vaziyatlar ko'kka sovurildi.
– Ayni shuning ustida mashg'ulotlarda ishlayapmiz. Xatolarni yigitlarga ko'rsatyapmiz va shu ustida mashq qilyapmiz. Xudo xohlasa, keyingi o'yinlarda har bir vaziyatdan unumli foydalansak, yaxshi bo'ladi. Biz ham buni tahlil qilyapmiz: har bir o'yinda etarlicha vaziyatlarimiz bor, biroq ulardan foydalana olmayapmiz. Aynan shu jihat ustida ishlayapmiz.
– Hozirgina "futbolchilarda qo'rquv bor", deb aytib o'tdingiz. Avval ham ko'p mutaxassislar ruhiy muammolar borligini takidlagan edi. O'tgan yilgi intervyularingizdan birida: "Bosh murabbiy menman, demak, psixolog ham o'zimman", – degan ekansiz. Savolim shundan iboratki, Kamoliddin Tojiev qay darajada yaxshi psixolog? Yani, shogirdlarini qay darajada ruhlantira olyapti?
– Bundan avval, yani tanaffusga qadar jamoadagi ruhiy holat yaxshi edi. Jahon chempionatiga borib keldik, tanaffus yuzaga keldi. Shundan so'ng, bilmadim, yigitlarda o'z-o'ziga bo'lgan ishonch biroz yo'qolib qoldimi... Buning ustida ham ishlayapmiz, ular bilan suhbatlashyapmiz. Xudo xohlasa, buni ham to'g'rilaymiz. Yigitlarning o'ziga bo'lgan ishonchini qaytaramiz.
– Jamoa statistikasiga e'tibor qaratadigan bo'lsak, oxirgi marotaba oktyabr oyida yirik hisobda g'alaba qozongan, yani 3:0 hisobida "Qizilqum" ustidan zafar quchgan edingiz. O'shandan beri, yani 2023 yildan buyon jamoa asosan bitta to'p farqi bilan g'alaba qozonmoqda. Hozir realizaciya borasida ishlayapmiz, dedingiz. Ishlashning o'zi kamlik qilmasmikan? Yoki yaxshiroq hujumchi kerakmi?
– Hujumchi masalasida aytadigan bo'lsam, uzog'i bilan 3-4 kunda yana bitta yangi hujumchi jamoaga qo'shiladi. Bu masala aniq bo'ldi. Endi, bilasiz, barcha jamoalar ham bizga qarshi ochiq futbol o'ynayvermaydi. Baribir shuning hisobiga ham kam golli vaziyatlar yuzaga kelmoqda. Biroq vaziyatlar bor. Agar vaziyatlar mutlaqo bo'lmaganida, xavotir o'rinli bo'lardi. Vaziyatlarimiz bor, faqat ulardan foydalanishimiz kerak. Xudo xohlasa, yaqin 3-4 kun ichida yangi o'yinchi kelib qo'shiladi.
– Jamoaning deyarli yarmi O'zbekiston terma jamoasi a'zolari, yani "Paxtakor" – futbolchilaridan shakllangan. Gibrid sxemaga, yani uchta markaziy himoyachi taktikasiga o'tish rejasi bormidi? Chunki himoyada o'zingiz ham ko'rdingiz, raqib futbolchisi birga-bir vaziyatga chiqib ketyapti. Bitta o'tkir uzatma bilan birga-bir vaziyat yuzaga kelyapti. Umuman, shunaqa reja bormidi?
– Buni ko'rib chiqamiz. Yigitlar, qanday desam, biroz xato qilmaslikka harakat qilib, ehtiyotkorlikka berilib ketishyapti. Yopilishi kerak bo'lgan joylarda biroz kech qolyapmiz, shuning evaziga bunday vaziyatlar paydo bo'lmoqda.
– Bilamizki, "Paxtakor" – va "Bunyodkor" – azaldan tarixiy raqiblar hisoblanadi. 2000-yillarning oxirlarida siz ham futbolchi sifatida ushbu derbilarda ishtirok etgansiz. Futbolchilik faoliyatingizdan bu qarama-qarshiliklar haqida qanday yorqin xotiralar qolgan? Masalan, 2017 yilda aynan sizning yagona golingiz jamoaga g'alaba keltirgan edi.
– To'g'ri, u vaqtlarda derbi baribir derbi edi. Maydonga chiqib, borimizni berardik. Juda qiziqarli o'tardi. "Bunyodkor" – bilan o'yinlarda esda qolarli, qiziqarli vaziyatlar ko'p bo'lgan.
– Yana bir savolim bor, shu mavzuga oid. O'sha vaqtlarda "Paxtakor" – va "Bunyodkor" – gegemon edi, boshqalardan yaqqol ajralib turardi. Hozir esa chempionatda 3-4 ta jamoa chempionlik uchun kurash olib bormoqda. Sizningcha, chempionat uchun qaysi biri muhimroq: ikkita gegemon jamoa bo'lgani maqulmi yoki unchalik gegemon bo'lmasa-da, kuchliroq 3-4 ta jamoaning chempionlik uchun kurashganimi?
– Ikkita gegemon emas... Hozir "gegemon" deganingiz bilan, har qanday raqibga qarshi xotirjam maydonga chiqib g'alaba qozona olmaysiz. Hozir deyarli barcha jamoalarning kuchi teng. To'g'ri, 2000-yillarda "Paxtakor" – va "Bunyodkor" – boshqalardan ajralib turardi. Hozir esa, takidlayotganimdek, jamoalarning kuchi deyarli tenglashgan. Bunday holatda o'ynash ham qiziqroq.
– Hozirgi holatda "Paxtakor"ning chempionlik yo'lida "Neftchi" – bilan kurashiga baho beradigan bo'lsangiz, chetdan xolis inson sifatida "Paxtakor" – chempionlikka qanchalik haqli deb o'ylaysiz?
– Biz yonma-yon ketyapmiz, nega haqli bo'lmas ekanmiz? Maqsadimiz yo'lida oxirigacha kurashamiz.
– Mavsum boshlanishidan oldin Sanjar Quvvatovni jamoaga qaytardinglar. Nazarimda, bu zaxira darvozaboni sifatida qilingan edi, chunki Vladimir Nazarov o'tgan mavsumda Superliganing eng yaxshi darvozaboni deb topilgandi, shuningdek, Superkuboklarda ham yaxshi harakat qilgan edi. Hozir esa Sanjar Quvvatov juda zo'r harakat qilmoqda, mana, bugun ham birga-bir vaziyatlarda zarbalarni qaytardi. Savolim shundaki, futbolda "g'alaba keltirayotgan tarkib o'zgartirilmaydi" degan qoida bor. Shundan kelib chiqib, Quvvatov xato qilguncha darvozada turadimi?
– To'g'ri, "g'alaba keltirayotgan tarkib o'zgartirilmaydi", degan tushunchalar bor. Xudo xohlasa, sport formasi yaxshi bo'lsa, u oxirigacha asosiy tarkibda maydonga tushadi.
– "Paxtakor"ning turnir jadvalidagi raqobatchisi hisoblanmish "Neftchi" vodiy derbisida "Navbahor" bilan bellashadi. Ushbu o'yinda "Navbahor"ga muxlislik qilasizmi?
– Juda qiziqarli o'yin bo'ladi. Albatta, bu bahsda "Navbahor"ga muxlislik qilamiz.
Teglar: kamoliddin, tojiev, vodiy, derbisida, ‘navbahor’ga, muxlislik, qilamiz,
← OldingaOrqaga →
Bosh sahifaga
613
27 Iyul 2026, 08:33