Vadim Abramov: "Trampga qo'ng'iroq qilaylik..."

2026-08-04 14:57:01 / Kiritdi: BestMaster  O'qilgan: 3320

Superliganing 15-turidan o'rin olgan "Dinamo" - "Neftchi" (0:0) o'yindan keyingi matbuot anjumanida mezbonlar ustozi Vadim Abramov o'z fikrlarini bildirdi.

- Yomon o'yin bo'lmadi, menimcha, muxlislarga yoqdi - ancha qiziqarli va yorqin kechdi. Biz g'alaba uchun o'ynashga va ular bilan ochiq futbol ko'rsatishga harakat qildik, qo'limizdan kegancha o'ynadik. Lekin, ming afsuski, bu yil birinchi marta gol ura olmadik - bu biz gol ura olmagan birinchi jamoa bo'ldi. Ikkinchi tomondan, o'zimiz ham bu yil birinchi marta gol o'tkazib yubormadik, hayratlanarli (kuladi). Shunga hozir, qayta so'zlar bilan komment berish qiyin. Birinchi yarimtada 2 ta real imkoniyat bo'ldi, gol ursa bo'lardi. Ularda ham xavfli vaziyatlar bo'ldi, ikkinchi bo'limdagi uzatmada... Albatta, Oybek bugun bizni biroz xafa qildi, chunki o'sha vaziyatlarda gol urish kerak edi, u noto'g'ri qaror qabul qildi. Lekin u yosh yigit, umid qilamizki... Boshqa tomondan, bunday ob-havoda o'yinlar ketma-ket kelyapti, yana tekis joyda futbolchilarni yo'qotdik. Zaxira o'rindig'imiz shundoq ham keng emas. Bu o'yindan ko'rindiki, maydon markazidagi futbolchilarimiz unchalik tayyor emas. Shu vaqt ichida ularni tayyorlashga harakat qilamiz, keyinchalik ko'ramiz. Aksariyat muxlislarga o'yin yoqdi deb o'ylayman", - deb gap boshladi Abramov.

- Anvarjon Hojimirzaevning ahvoli qanday?

- U ham orqa mushagini tortib oldi, almashtirishni so'radi. Ko'ramiz, nima bo'ladi. Bunisi ham chiqib ketdi, unisi (Halilov) ham. Futbolchilar safdan chiqyapti, O'rozov ham ketdi. Shu sababli qo'limizda bor yigitlar bilan ularning o'rnini to'ldirishga harakat qilamiz.

- 4 kundan keyin Lokomotiv bilan o'yin bor...

- Ha, g'alati joyi shundaki, raqiblarimiz bizdan bir kun ko'proq dam oladi, Lokomotivda esa 2 kun ko'proq dam olish vaqti bo'ladi. Ustiga-bustiga biz yana Toshkentga yo'l olishimiz kerak. Shuning uchun shunday tendenciya bor, yigitlarni tiklab, tayyorlashimiz kerak.

- Dinamo muxlislari bu durangni g'alabadek nishonlashdi, chunki chempionga yutqazishmadi. Neftchi kanchalik kuchli edi? Masalan, Islom Ismoilovga savol berganimda: Bizda zaxiradan faoliyatini tugatishga yaqin qolgan Bahodir Nasimov tushyapti, ularda esa Ratino va Perica degan edim...

- Bu hech narsani anglatmaydi. Nasimov nima? Nasimov futbolchi. Agar siz yoshiga shama qilayotgan bo'lsangiz, u tajribali futbolchi va bizga foyda keltiradi deb o'ylayman. Boshqa masala - shu o'yinda shunday vaziyat yuzaga keldi. Ko'rdingiz, Xislat jarohat oldi va u erga kimnidir tushirish kerak edi. Afsuski, boshqalar almashishga tayyor emas edi. Shuning uchun Nasimov tushdi, u bizni kuchaytirishi kerak edi, shunchaki vaqt kam edi. Ishonchim komilki, u bizga yordam bera oladi.

- Juda ko'p vaziyatlar bo'ldi, 100 foizlik vaziyatlar... Siz juda jon kuydirib, hayajonlandingiz. Bunday qizg'in vaziyatlar nimaning hisobiga yuzaga kelmoqda?

- Bu o'yinga bo'lgan ruhiyat va tayyorgarlik yuqori darajada edi, yigitlar o'zlarini ko'rsatishni istashdi. Bu ham ta’sir qiladi, mahorat yetishmasligi ham. Shuning uchun bu vaziyatni izohlash qiyin, chunki bazi yigitlar murakkab vaziyatlarda gol urishadi-yu, oddiy vaziyatlarda ura olishmaydi. Abdurahmonovga o'sha vaziyatda shunchaki to'pni tepishga nima xalaqit berdi? Ortiqcha narsa qilmay tepish kerak edi, gol bo'lardi. Lekin u boshqacha qarorga keldi. To'xtovsiz o'yinlar ketayotgani ham ta’sir qilayotgandir, vaqt ko'rsatadi. Maydonda qarorni futbolchining o'zi qabul qiladi. Messini ko'rdingiz-ku, finalgacha dahshat o'ynadi, finalda esa yo'qolib qoldi. Futbol shunaqa narsa. Jamoa raqib yo'l qo'ygancha o'ynaydi. Bugun raqib shunday o'ynashga imkon berdi, biz shunday o'ynadik. Hozir tiklanib, keyingi raqib haqida o'ylash kerak.

- Hozir tarkibda muammolar borligini aytdingiz, lekin sizda hujumchi Dumbuya bor edi, qizil kartochkasi sababli... Lokomotiv bilan o'yinda tusha oladimi?

- Rasmiy ma'lumotni bilmayman... Infantinoga qo'ng'iroq qilaylik, Trampga qo'ng'iroq qilib so'rab beraman (kuladi).

- Yana bir savol. O'yin davomida bosh hakamning qarorlaridan bir necha bor norozi bo'ldingiz, lekin oxirida minnatdorchilik bildirdingiz?

- Yo'q, men shunchaki unga qizil kartochka haqida aytdim, u esa kiyinish xonasida unutib qoldiribman dedi (kuladi). Shunchaki hazilshashdik. Emociyalar - bu maydon chetida boshqacha ko'rinadi. Hakamning o'rnida bo'lish esa boshqacha. Ishimiz har xil: men jamoani tayyorlashim kerak, u hakamlik qilishi kerak. Qoidalarni oxirigacha mukammal bilmaganim uchun bazida etiroz bildiraman.

- Vadim Karlenovich, sizning jamoalaringiz uchun yarim himoya juda muhim. Siz markazni deyarli to'liq yangiladingiz. Kombinaciyalarni topa olasizmi?

- Ha, biz aynan shuning ustida ishlayapmiz. Yarim himoyachilar to'pni saqlab turishi kerak. Pley-offda o'ynaganlar biz bilan yig'inlarni to'liq o'tkazishmagan edi. Biz ularni chempionat davomida sport formasiga keltiryapmiz. Ularga jismoniy tomondan kuch yetishmayapti. Markazni boy bermaslik uchun yangi, tetik futbolchilarni tushirdik. Birinchi daqiqalarda o'xshayotgandek edi, keyin yana pasayish bo'ldi. Mening ko'proq etirozim himoyachilarga, chunki darvozabon va himoyachilar to'pni shunchaki oldinga tepib yuborishdi. Yarim himoyachilar esa to'psiz qolib, yugurishga majbur bo'lishdi.

- Yana bir vaziyat: 30-raqamli Haydarevich yaxshi o'ynayotgan edi, siz esa to'g'ri pas bera olmaydigan "taxta" To'xtasinovni tushirdingiz... Qodirqulovni esa oxirigacha maydonda ushlab turdingiz?

- Bunday o'yinda zaxiradan qo'shilib ketish juda qiyin. To'xtasinov tajribali futbolchi, xato qilgan bo'lsa ham, u majburan boshqa poziciyaga qo'yildi. Siz aytgan yarim himoyachi ochilmay, yopilib olgani uchun himoyachilar to'pni oldinga tepib yuborishga majbur bo'lishdi. Sizga ko'rinmagan nozik jihatlar bor.

- Bugun faqat Edem Nemanov o'z poziciyasida o'ynadi shekilli...

- Durang - yutqazgandan ko'ra yaxshiroq. Lekin biz g'alaba uchun maydonga tushgan edik. Barchasi keyingi o'yinlarda ko'rinadi.

Teglar: vadim, abramov, trampga, qongiroq, qilaylik,
← OldingaOrqaga →