“Paxtakor-79” xotirasiga bag'ishlangan sher

2026-08-11 07:30:01 / Kiritdi: BestMaster  O'qilgan: 2794

11 avgust kuni "Paxtakor-79" fojiasiga 47 yil to'ldi.

Qushlar qoqadi qanot

Toshkentning osmonida.

Eshitilar oh-faryod

“Paxtakor” maydonida.

Qushlar qaytadi bir kun

Saflarini buzmasdan.

Ko'kka termulaman men

Umidimni uzmasdan.

Dili og'rimasin deb,

Hech kim rostin aytmaydi –

“Paxtakor” samolyoti

Endi ortga qaytmaydi.

Ko'z o'ngimda go'yoki

Qad ko'tarar tirik jon.

Yulduz futbolchi asli

Samoni aylar makon.

O'g'lonlar erta ketdi,

Shijoati so'nmasdan.

Biri yosh kuyov, biri

Chimildiqni ko'rmasdan.

Birida – mo'rg'ak o'g'il,

Burunchasi piqirlar.

Bilmaydi u... bilmaydi...

Har kuni eshik poylar.

Endi diydorlashishning 

Bo'lmaydi hech fursati.

Qo'lida padarining

Kulib turgan surati.

Otasining jamoasin

Eslab qolgan u zukko.

So'lakchasin oqizib,

Shivirlaydi: “Pa-ta-ko...”

Tilga kiradi surat:

“Yig'lamagin, jujuqcha.

Qayerda bo'lmagin, men

Hamisha yoningdaman.

Otangning ruhin shod qil,

Ko'rsat matonatingni.

Boshingni baland ko'tar,

G'oz tutgin qomatingni!..”

Mushtipari dod solar,

Bag'rida ho'l yostig'i:

“Sening o'rningga, mana,

Men o'lsam bo'lmasmidi...”

Uchayotgan qushlarga

Ona pichirlar g'amgin:

“Kulikovo dashtiga

Nolalarim etkazgin...”

Shikastlangan Isoqov

Ko'kka parishon boqar.

Ko'zlariga qo'shilib,

Oyog'idan yosh oqar.

Der: “Oyoq-ku, tuzalar,

Ammo yetishmas havo.

Qalbda qolgan chandiqqa 

Topib bo'lmaydi davo...”

...Qushlar qoqadi qanot

Toshkentning osmonida.

Eshitilar oh-faryod

“Paxtakor” maydonida.

Qushlar qaytadi bir kun 

Saflarini buzmasdan.

Ko'kka termulaman men

Umidimni uzmasdan.

Dili og'rimasin deb,

Hech kim rostin aytmaydi –

“Paxtakor” samolyoti

Endi ortga qaytmaydi.

Bugun ulg'aygan o'g'il, 

Sochlariga yoqqan qor.

Farzandiga otasin

Eslatar takror-takror.

Bobosining jamoasin 

Yod olgan jajji zukko.

So'lakchasin oqizib,

Shivirlaydi: “Pa-ta-ko...”

Ular ko'zlagan yo'lni

Avlodlari zabt etar.

Mamlakat o'g'lonlari

Dunyoni zir titratar.

Uzoqlashmaydi bizdan, 

Qalbimizda siyrati.

Aks etar yulduzlarda 

Kulib turgan surati.

Tilga kirar yulduzlar:

“Taslim bo'lma hech qachon.

Qayerda bo'lmagin, men

Hamisha yoningdaman.

Ajdodlar ruhin shod qil,

Ko'rsat matonatingni.

Boshingni baland ko'tar,

G'oz tutgin qomatingni!”

Oqil Abdubarnoev

2024 yil

Teglar: “paxtakor-79”, xotirasiga, bagishlangan, sher,
← OldingaOrqaga →