Futzal bo'yicha yangi mavsum start olmoqda!
/ Kiritdi: BestMaster O'qilgan: 1654
Bugun mamlakat XXX milliy chempionatiga qur'a tashlash marosimidan so'ng O'zbekiston futzal federatsiyasi prezidenti Bekzod Mamatqulov Oliy liga klublari mutasaddilari, direktorlari va jamoa bosh murabbiylari ishtirokida kengaytirilgan yig'ilish o'tkazdi.
Yig'ilishda yubiley - XXX milliy chempionatga tayyorgarlikning eng muhim masalalari atroflicha muhokama qilindi.
Federatsiya rahbari yangi mavsum oldidan Oliy liga ishtirokchilari yangi maqom, yangicha yondashuv va katta maqsadlar bilan chempionatga qadam qo'yayotganini ta'kidladi. Ayni paytda deyarli barcha klublarning mas'uliyati cheklangan jamiyat (MCHJ) shaklida qayta ro'yxatdan o'tkazilgani ular uchun yangi imkoniyatlar bilan birga, yanada katta mas'uliyat ham yuklashini qayd etdi.
Uchrashuv davomida klublar mutasaddilarining fikr va takliflari tinglanib, mavsum oldidan mavjud muammolar muhokama qilindi. Jamoalar tarkibi, klublarda yaratilgan shart-sharoitlar, moliyaviy va tashkiliy masalalar, shuningdek, uzoq davom etadigan chempionat bahslariga tayyorgarlik holati yuzasidan atroflicha fikr almashildi.
Bugungi islohotlar - ertangi natijalar poydevori. Shu nuqtayi nazardan, klublarning mustaqil va professional subekt sifatida shakllanishi mamlakat futzali taraqqiyotida muhim qadam sifatida baholandi.
O'FF rahbari klublarning ayni paytdagi holati va mavsumga tayyorgarligi haqida etarlicha axborotga ega ekanini ta'kidlab, barcha jamoalarni yubiley chempionatni yuqori saviyada o'tkazishga chaqirdi.
Asosiy maqsad - futzal ishqibozlariga murosasiz kurashlarga boy, qiziqarli va sifatli chempionat taqdim etish, klublar salohiyatini oshirish hamda xalqaro maydonlarda mamlakatimiz sharafini himoya etuvchi terma jamoalarga munosib zaxira tayyorlashdir, - dedi Bekzod Mamatqulov.
Shu bilan birga, klublar rahbarlari va murabbiylariga yosh futzalchilar bilan ishlashni yanada kuchaytirish, terma jamoalarga munosib o'rinbosarlar tayyorlash jarayonida faol ishtirok etish vazifasi yuklatildi.
XXX milliy chempionat - yangi tarix, yangi bosqich va yangi mas'uliyat!
Maqsad bitta - O'zbekiston futzalini yanada yuqori pog'onaga olib chiqish!
Teglar: futzal, boyicha, yangi, mavsum, start, olmoqda!,
← OldingaOrqaga →
Bosh sahifaga
485