Viktor Valdes Qozog'iston jamoasini boshqarishi mumkin

2026-08-31 11:42:01 / Kiritdi: BestMaster  O'qilgan: 2534

“Barselona” va Ispaniya terma jamoasi sobiq posboni Viktor Valdes faoliyatini Qozog'istonda davom ettirish ehtimoli bor.

Ispaniyalik mutaxassis “Qaysar” bosh murabbiyligiga nomzodlar qatoriga kirdi.

Manba bergan xabarga ko'ra, Qizilo'rda klubi rahbariyati Andrey Ferapontov ketganidan so'ng yangi bosh murabbiy qidirish bilan shug'ullanmoqda. “Qaysar”ning short-listida 5 nafar xorijlik mutaxassis bor, ular orasida Yevropa futbolida ancha tanilgan nomlar ham mavjud.

Asosiy e'tiborni Viktor Valdesning nomzodi o'ziga tortmoqda. “Barselona” sobiq darvozaboni futbolchilik faoliyatining katta qismini Kataloniya klubida o'tkazgan bo'lib, u yerda bir necha bor Ispaniya chempioni bo'lgan va uch marta Chempionlar Ligasida g'olib chiqqan. Faoliyatini yakunlagach, murabbiylik bilan shug'ullana boshladi.

Shu bilan birga, Qizilo'rdada hozircha yakuniy qaror qabul qilinmagan. Manbaning takidlashicha, klub bir vaqtning o'zida bir nechta mutaxassis bilan muzokaralar olib bormoqda va yangi bosh murabbiy borasidagi aniqlik yaqin vaqt ichida paydo bo'lishi mumkin.

Murabbiylar shtabidagi o'zgarishlar “Qaysar” uchun og'ir kechayotgan mavsum fonida ro'y bermoqda. O'tgan turda qizilo'rdalik futbolchilar Qozog'iston Premer-ligasining 24-turi doirasida “Oqjetpes”ni qabul qilib, 2:3 hisobida imkoniyatni boy berishdi.

Mazkur mag'lubiyatdan so'ng “Qaysar” 20 ochko bilan musobaqa jadvalining pastki qismidagi jamoalar orasida qolishda davom etmoqda. Chempionat yakunigacha bor-yo'g'i bir nechta tur qolgan, shu sababli klubning asosiy vazifalaridan biri Premer-ligadagi o'rnini saqlab qolish bo'ladi.

Biroq jamoa ushbu mavsumni sovrin bilan tugatishi ham mumkin. Chempionatdagi muammolarga qaramay, “Qaysar” Qozog'iston Kubogi finaliga yo'l olishga muvaffaq bo'ldi. 2026 yilning noyabr oyida bo'lib o'tadigan hal qiluvchi bahsda jamoa “Ordabasi” bilan to'qnash keladi.

Teglar: viktor, valdes, qozogiston, jamoasini, boshqarishi, mumkin,
← OldingaOrqaga →