Kuchli beshlik sharhi: Londonda derbi, Italiyada grandlar jangi, “Real” va “Barsa” safarda

2026-09-04 16:42:01 / Kiritdi: BestMaster O'qilgan: 976

Yevropaning kuchli besh chempionatida yangi mavsumning dastlabki turlari davom etmoqda.

Bu hafta Angliyada “Arsenal” va “Chelsi” o'rtasidagi London derbisi markaziy o'yinga aylansa, Italiyada bir turning o'zida ikkita katta to'qnashuv o'tkaziladi.

Ispaniyada “Real” va “Barselona”ni oson bo'lmagan safarlar kutmoqda, Germaniyada “Bavariya” Bundesligaga qaytgan “Shalke” mehmoni bo'ladi. Fransiyada esa hali g'alaba qozonmagan PSJ peshqadam “Monako”ni qabul qiladi.

Premer-liganing 3-turida asosiy e'tibor “Arsenal” va “Chelsi” o'rtasidagi London derbisiga qaratiladi. Ikki jamoa ham chempionatni ikki g'alaba bilan boshladi, shu bois “Emireyts”dagi uchrashuv ular uchun mavsumdagi dastlabki jiddiy sinovlardan biri bo'ladi.

“Arsenal” dastlabki ikki uchrashuvda maksimal olti ochko oldi va o'z darvozasidan gol ham o'tkazmadi. “Chelsi”ning starti esa boshqacharoq - jamoa ikki o'yinda ettita gol urdi, shu bilan birga oltita gol o'tkazib yubordi. Shu jihatdan derbida ikki xil uslub to'qnashadi: “Arsenal”ning tartibli va muvozanatli o'yiniga “Chelsi”ning ochiq va hujumkor futboli qarshi turadi.

“Manchester Siti” o'z maydonida “Koventri”ni qabul qiladi. Kuchlar nisbati bo'yicha mezbonlar yaqqol favorit va chempionlik uchun kurashda bunday uchrashuvlarda ochko yo'qotmaslik muhim.

“Manchester Yunayted” “Everton” mehmoni bo'lsa, “Liverpul” “Ipsvich” maydoniga safar qiladi. “Tottenxem”ni esa “Nottingem Forest”ga qarshi mehmondagi o'yin kutmoqda.

3-tur taqvimi:

“Ipsvich” - “Liverpul” 4 sentyabr, 00:00

“Nyukasl” - “Bornmut” 5 sentyabr, 16:30

“Brentford” - “Sanderlend” 5 sentyabr, 19:00

“Brayton” - “Lids” 5 sentyabr, 19:00

“Fulxem” - “Kristal Pelas” 5 sentyabr, 19:00

“Manchester Siti” - “Koventri” 5 sentyabr, 19:00

“Nottingem Forest” - “Tottenxem” 5 sentyabr, 19:00

“Xall Siti” - “Aston Villa” 5 sentyabr, 21:30

“Everton” - “Manchester Yunayted” 6 sentyabr, 18:00

“Arsenal” - “Chelsi” 6 sentyabr, 20:30

La Liganing 4-turi “Betis” va “Real” uchrashuvi bilan boshlanadi. Madridliklar mavsumni mag'lubiyatsiz boshladi, ammo Sevilyadagi o'yin jamoa uchun chempionatdagi dastlabki jiddiy safar sinovlaridan biri bo'ladi.

“Betis” o'z maydonida noqulay raqib bo'la oladi. Shu bois “Real” uchun Sevilyada uch ochko olish chempionlik poygasining boshida muhim natija bo'ladi. Mezbonlar madridliklarga to'pni erkin nazorat qilish imkonini bermaslikka va o'yinni imkon qadar teng kurashda olib borishga harakat qiladi.

“Barselona” esa “Valensiya” mehmoni bo'ladi. Kataloniyaliklar mavsumni sermahsul boshladi va dastlabki uch turdan keyin yuqori suratda ketmoqda. Endi ularni “Mestalya”da ancha murakkab o'yin kutmoqda.

Qog'ozda “Barselona” favorit, ammo “Mestalya”dagi uchrashuvlar kataloniyaliklar uchun har doim ham oson kechavermaydi. “Valensiya”ning vazifasi raqibga to'pni erkin nazorat qilish va o'zi istagan suratda o'ynash imkonini bermaslik bo'ladi.

Yana bir e'tiborli uchrashuv Bilbaoda o'tadi. “Atletik” o'z maydonida “Atletiko”ni qabul qiladi. “San-Mames”dagi safar madridliklar uchun ham turning jiddiy sinovlaridan biri bo'ladi.

4-tur taqvimi:

“Betis” - “Real” 4 sentyabr, 00:00

“Atletik” - “Atletiko” 5 sentyabr, 19:15

“Rayo Valekano” - “Rasing” 5 sentyabr, 21:30

“Vilyarreal” - “Deportivo” 5 sentyabr, 00:00

“Valensiya” - “Barselona” 6 sentyabr, 19:15

“Alaves” - “Osasuna” 6 sentyabr, 21:30

“Malaga” - “Levante” 6 sentyabr, 21:30

“Espanol” - “Sevilya” 6 sentyabr, 00:00

“Xetafe” - “Selta” 7 sentyabr, 22:00

“Elche” - “Real Sosedad” 7 sentyabr, 00:30

Bu hafta kuchli beshlikdagi eng qiziq afishalardan biri Italiyada. A Seriyaning 3-turida bir kun oralig'ida “Inter” - “Napoli” va “Yuventus” - “Milan” uchrashuvlari o'tkaziladi.

“Inter” chempionatni ikki g'alaba bilan boshladi va “Napoli”ga qarshi o'yinga maksimal natija bilan yetib keldi. Neapolliklar esa o'tgan turda “Komo”ga 1:2 hisobida yutqazib, mavsumda ilk bor ochko yo'qotdi.

Shu bois “San-Siro”dagi uchrashuv ayniqsa “Napoli” uchun muhim. Yana bir mag'lubiyat asosiy raqiblardan biri bilan oradagi farqning mavsum boshidayoq oshishiga olib keladi. “Inter” esa to'g'ridan-to'g'ri raqibini mag'lub etib, chempionatdagi muvaffaqiyatli startini davom ettirish imkoniyatiga ega.

Bir kundan keyin e'tibor Turinga ko'chadi. “Yuventus” “Milan”ni qabul qiladi. Ikki jamoa ham dastlabki ikki turni g'alaba bilan yakunlagani uchun bu bahs faqat katta nomlar to'qnashuvi emas, balki peshqadamlar guruhidagi muhim o'yin ham bo'ladi.

Bundan tashqari, “Roma” - “Atalanta” uchrashuvi ham turning e'tiborli bahslaridan. Umuman, bu turda yuqori o'rinlarga da'vogarlarning bir nechtasi o'zaro to'qnashadi va uning natijalari chempionat boshidagi kuchlar nisbati haqida dastlabki tasavvurni berishi mumkin.

3-tur taqvimi:

“Jenoa” - “Komo” 4 sentyabr, 23:45

“Fiorentina” - “Torino” 5 sentyabr, 18:00

“Inter” - “Napoli” 5 sentyabr, 21:00

“Roma” - “Atalanta” 5 sentyabr, 23:45

“Frozinone” - “Veneciya” 6 sentyabr, 18:00

“Parma” - “Monca” 6 sentyabr, 18:00

“Bolonya” - “Sassuolo” 6 sentyabr, 21:00

“Yuventus” - “Milan” 6 sentyabr, 23:45

“Kalyari” - “Lechche” 7 sentyabr, 21:30

“Udineze” - “Lacio” 7 sentyabr, 23:45

Bundesligada chempionat endi ikkinchi turga kirib kelmoqda. “Bavariya” yangi mavsumni “Shtutgart” ustidan yirik - 5:1 hisobidagi g'alaba bilan boshladi va birinchi o'yindayoq yaxshi formada ekanini ko'rsatdi.

Endi Kompani jamoasi Bundesligaga qaytgan “Shalke” mehmoni bo'ladi. Gelzenkirxenliklar uchun bu alohida o'yin - elitaga qaytganidan keyingi dastlabki uy uchrashuvida ular “Bavariya”ga qarshi maydonga tushadi.

Kuchlar nisbati myunxenliklar tomonida, ammo “Shalke”ning o'z maydonidagi muhiti uchrashuvga qo'shimcha qiziqish beradi. “Bavariya” uchun esa vazifa aniq - birinchi turdagi suratni saqlash va chempionat boshidayoq keraksiz ochko yo'qotmaslik.

“Borussiya Dortmund” “Xoffenxaym” mehmoni bo'ladi. “Bayer” o'z maydonida “Union”ni qabul qilsa, “Leyptsig” Bremenda “Verder” bilan o'ynaydi.

2-tur taqvimi:

“Shtutgart” - “Kyoln” 4 sentyabr, 23:30

“Borussiya Myonxengladbax” - “Elversberg” 5 sentyabr, 18:30

“Bayer” - “Union” 5 sentyabr, 18:30

“Xoffenxaym” - “Borussiya Dortmund” 5 sentyabr, 18:30

“Paderborn” - “Frayburg” 5 sentyabr, 18:30

“Verder” - “Leyptsig” 5 sentyabr, 18:30

“Shalke” - “Bavariya” 5 sentyabr, 21:30

“Gamburg” - “Maync” 6 sentyabr, 18:30

“Ayntraxt” - “Augsburg” 6 sentyabr, 20:30

Fransiya 1 Ligasida turning markaziy o'yini Parijda o'tadi. PSJ chempionatning dastlabki ikki uchrashuvida g'alaba qozona olmadi va endi mavsumni ikki g'alaba bilan boshlagan “Monako”ni qabul qiladi.

Mavsum endi boshlangan bo'lsa-da, ikki jamoaning starti bu uchrashuvga qo'shimcha ahamiyat bermoqda. Parijliklar uchinchi turga mavsumdagi ilk g'alabasini izlab kirib kelayotgan bo'lsa, “Monako” aksincha, maksimal natija bilan Parijga boradi.

Shu bois bosim ko'proq PSJ tomonida. Luis Enrike jamoasi yana ochko yo'qotsa, “Monako” bilan oradagi farq mavsumning uchinchi turidayoq sezilarli ko'rinish oladi. Mehmonlar esa yaxshi startdan keyin Parijda ham natija qayd etib, chempionat boshidagi mavqeini yanada mustahkamlash imkoniyatiga ega.

Qolaversa, bu PSJ uchun mavsumdagi dastlabki jiddiy raqiblardan biriga qarshi o'yin. Shuning uchun Parijdagi bahs nafaqat turnir jadvali, balki jamoaning hozirgi holatini baholash nuqtayi nazaridan ham muhim.

3-tur taqvimi:

“Lion” - “Oser” 4 sentyabr, 22:00

PSJ - “Monako” 4 sentyabr, 00:05

“Lans” - “Loryan” 5 sentyabr, 20:15

“Gavr” - “Brest” 5 sentyabr, 23:45

“Nicca” - “Le-Man” 5 sentyabr, 23:45

“Trua” - “Strasbur” 6 sentyabr, 18:00

“Anje” - “Renn” 6 sentyabr, 20:15

“Marsel” - “Parij” 6 sentyabr, 23:45