Vadim Abramov: "Bunday maydonda gol urish qiyin"

2026-09-05 22:54:01 / Kiritdi: BestMaster  O'qilgan: 2054

Superliga 20-turdan o'rin olgan "Qo'qon-1912" – "Dinamo" uchrashuvidan so'ng samarqandliklar bosh murabbiyi Vadim Abramov matbuot anjumanida ishtirok etdi.

- O'yin haqida fikringiz?

- Bugun futbol kam ko'rdik, asosan kurash kechdi. Nafaqat raqib bilan, balki maydon bilan ham kurashishga to'g'ri keldi. Bunday maydonda gol urish qiyin. Har ikki jamoa bittadan to'p kiritishga muvaffaq bo'ldi. Yigitlarga muxlislarni xursand etishgani uchun rahmat aytsa arziydi.

- Uchrashuv boshida himoyachilaringiz bir nechta xatolarga yo'l qo'yishdi. Bu maydonga moslasha olmaganlik bilan bog'liqmi?

- Ha, shunday. Biz bu maydonga birinchi bor chiqdik va ko'nikishga harakat qildik. Shuning uchun birinchi taymda boshqacha o'yin ko'rsatdik. Bugungi o'yin futboldan ko'ra sportning boshqa turiga o'xshab ketdi.

- Yetakchi o'yinchilar yo'qligi ta’sir qildimi?

- Jamoamizning eng yaxshi o'yinchilarini terma jamoaga chaqirishdi. Terma jamoaga o'yinchi bergandan keyin klub qandaydir imtiyozga ega bo'lishi kerak, lekin bizda teskarisi jamoa kuchsizlanib qoladi. Biz ularsiz o'ynayapmiz. Hojimirzaev jarohat olgan. Amonov anchadan beri o'ynamagandi, bugun maydonga tushdi. Hozircha tayyor emasligi ko'rinib qoldi. O'rozov ketdi. Mavjud tarkib bilan o'ynayapmiz. Oxirigacha kurashamiz.

- Albatta, bunday maydonda futbol o'tkazish Liga uchun uyat bo'lsa kerak. Tarkibda yo'qotish bor, ammo yuqori o'rinlarni egallash uchun bunday o'yinlarni yutish kerak emasmi?

- To'g'ri, siz haqsiz. Lekin aytganimdek, bugun futbol kam bo'ldi. Biz deyarli qumda o'ynadik, bu boshqa sport turiga o'xshab qoldi. Endi bizni o'yindan keyingi tiklanish o'ylantiryapti. Hozir Samarqandga qaytib 10 avgust kungi bahsga hozirlik ko'ramiz. Manzilgacha yetib olishimizni hisobga olsak, bizda tayyorgarlik uchun uch kun bo'ladi, xolos.

- Mutaxassis sifatida fikringizni bilmoqchiman: O'zbekistondagi deyarli barcha maydonlarni bitta firma qilyapti. Va nima uchundir hamma maydonlarda bir vaqtda muammolar boshlandi. Keyin shaxsan PFL direktori ulardan intervyu olganida, ular maydon tayyorlangani uchun klublar pul bermagani, klublar maydonga parvarish bermayapti degan gapni aytib o'tishdi. Siz bu borada nima deysiz?

- Velosipedni boshqatdan ixtiro qilish shart emas. Men agronom emasman, qishloq xo'jaligidan ham uzoqman. Shuni aytishim mumkin, bizning sharoitda maydonlar talabga javob bermayapti. Ikkinchi yildirki hamma maydonlar kasallanib qoldi. Agar biz Samarqanddagi maydonda mashg'ulot olib borganimizda allaqachon bu maydon bilan ham xayrlashgan bo'lardik.

Hozirgi maysa bizga to'g'ri kelmayapti. Yozda har yil shunday issiq bo'lgan. Oldin quyosh yo'q payti maydonni sug'orishardi, hozir quyosh charaqlab turgan mahal suv sepishyapti. Quyosh charaqlab turgan mahal maydonni sug'orsa nima bo'ladi? Maysa bizning sharoitga mos kelmayapti. Boshqacha yo'lni sinab ko'rish kerak.

"Lokomotiv"da ishlagan paytimizda Achilbay Jumaniyazovich maydonga yaxshi qaraydigan odamni topish topshirig'ini bergandi. Men mutaxassis emasman. Koreya va Yaponiyada Jahon chempionati kechdi, ularda ham bizga o'xshagan issiq iqlim, lekin maydonlarni qarang.

Bizga ham koreyalik mutaxassislar kelib maydonni tekshirishdi. "Paxtakor" maysasidan, so'ngra "Jar" maysasidan tahlil olishdi. O'shanda bu maydonda "Bunyodkor" o'ynardi va ular Germaniyadan zo'r maysa olib kelishgandi. Ammo o'sha maysa ham dosh bera olmadi.

Keyin "Do'stlik" stadioniga borib maysani tekshirishdi, buni qarangki O'zbekiston sharoitiga juda mos kelar ekan. Ular 10 yil kafolat berib, bir mavsumda 300ta o'yin o'tkazsa bo'ladi deyishdi. Shundan so'ng o'sha maydon 15 yil xizmat qildi. Agar oxirigacha "o'ldirishmaganida" hali yana ko'p yil xizmat qilardi. Shuning uchun hamma o'z ishi bilan shug'ullangani maqul.

Teglar: vadim, abramov, bunday, maydonda, urish, qiyin,
← OldingaOrqaga →