Kuchli beshlik sharhi: Manchestyerda derbi, PSJ va “Bavariya” g'alabaga erishadimi?

2026-09-12 11:48:01 / Kiritdi: BestMaster O'qilgan: 2396

Yevropaning kuchli beshlik chempionatida navbatdagi tur o'yinlari davom etmoqda.

Angliyada haftaning asosiy afishasi - Manchester derbisi. Ispaniyada “Real” va “Barselona” navbatdagi o'yinlarini o'tkazadi, Italiyada “Lacio” va “Milan” to'qnashadi. Germaniyada esa ikki turda ham g'alaba qozongan “Elversberg” bu safar “Bavariya”ni qabul qiladi.

Premer-liganing 4-turida asosiy e'tibor “Old Trafford”ga qaratiladi. “Manchester Yunayted” o'z maydonida “Manchester Siti”ni qabul qiladi.

Maykl Kerrik jamoasi chempionatni bir tekis boshlay olmadi. “Yunayted” avval “Xall”ga 0:2 hisobida yutqazdi, keyin “Ipsvich”ni 5:2 hisobida engdi va “Everton” bilan 2:2 o'ynadi. Hafta o'rtasida esa Chempionlar ligasida “Sabah” 4:0 hisobida mag'lub etildi.

“Siti”da Pep Gvardioladan keyingi hayot hozircha yaxshi boshlandi. Enco Mareska jamoasi Premer-ligadagi uchala o'yinini ham yutib, derbiga yuz foizlik natija bilan kelmoqda. “Yunayted” uchun qo'shnisining seriyasini to'xtatishga bundan yaxshiroq payt bo'lmasa kerak.

“Arsenal” esa “Sanderlend” mehmoni bo'ladi. “Kanonirlar” chempionatda uchta o'yindan uchta g'alaba oldi, hafta o'rtasida Chempionlar ligasida “Napoli”ni 1:0 hisobida engdi. Ammo Arteta jamoasining taqvimi ancha zich - Sanderlenddagi o'yin qisqa vaqt ichidagi navbatdagi safar bo'ladi.

“Liverpul” “Enfild”da “Fulxem”ni qabul qiladi. Mersisaydliklar dastlabki ikki turda durang o'ynaganidan keyin “Ipsvich”ni 2:0 hisobida engdi, Chempionlar ligasida esa “Atletiko”dan 2:1 hisobida ustun keldi. Aleksandr Isak oxirgi ikki o'yinda uchta gol urdi. “Fulxem” esa yangi mavsumda hali ochko olgani yo'q.

“Tottenhem”ning ahvoli ham maqtanarli emas - londonliklar uch turda g'alaba qozona olmadi. Bu safar raqib “Everton”: liverpulliklar oxirgi uch o'yinda mag'lub bo'lmagan.

Premer-liga, 4-tur:

“Aston Villa” - “Nottingem Forest” - 12 sentyabr, 19:00

“Bornmut” - “Brentford” - 12 sentyabr, 19:00

“Chelsi” - “Xall Siti” - 12 sentyabr, 19:00

“Kristal Pelas” - “Ipsvich” - 12 sentyabr, 19:00

“Liverpul” - “Fulxem” - 12 sentyabr, 19:00

“Tottenxem” - “Everton” - 12 sentyabr, 21:30

“Sanderlend” - “Arsenal” - 12 sentyabr, 00:00

“Koventri” - “Brayton” - 13 sentyabr, 18:00

“Manchester Yunayted” - “Manchester Siti” - 13 sentyabr, 20:30

“Lids” - “Nyukasl” - 14 sentyabr, 00:00.

La Liganing 5-turida “Real” “Rayo Valekano”ni qabul qiladi. Bu madridliklarning to'rt kun ichida “Santyago Bernabeu”dagi ikkinchi o'yini - hafta o'rtasida Chempionlar ligasida “Inter” mag'lub etildi.

Joze Mourinyo jamoasi bu mavsum uyda hali ochko yo'qotmadi. “Bernabeu”da “Real Sosedad” va “Malaga” engildi, keyin bu ro'yxatga “Inter” ham qo'shildi. Kilian Mbappe ham mavsumni sermahsul boshladi - francuz beshta rasmiy o'yinda beshta gol urdi.

“Rayo” esa tur oldidan 14-o'rinda edi. Jamoa uyda hali mag'lub bo'lmagan, ammo safarda ochko ololmagan. Bu statistika “Real”ni yanada yaqqol favorit qilib ko'rsatadi.

“Barselona” bu safar “Levante” mehmoni bo'ladi. Kataloniyaliklar mavsum boshida yaxshi start oldi va “Real” bilan poygada hozircha har bir turning ahamiyati baland.

San-Sebastyanda ham qiziq o'yin bor. “Real Sosedad” “Atletiko”ni qabul qiladi. Tomonlar aprel oyida Ispaniya kubogi finalida uchrashgan va o'shanda basklar g'alaba qozongan edi. Endi madridliklarda o'sha mag'lubiyat uchun javob qaytarish imkoniyati bor.

La Liga, 5-tur:

“Sevilya” 1:0 “Valensiya”

“Rasing” - “Alaves” - 12 sentyabr, 17:00

“Osasuna” - “Espanol” - 12 sentyabr, 19:15

“Atletik” - “Elche” - 12 sentyabr, 21:30

“Real” - “Rayo Valekano” - 12 sentyabr, 00:00

“Selta” - “Malaga” - 13 sentyabr, 17:00

“Levante” - “Barselona” - 13 sentyabr, 19:15

“Xetafe” - “Deportivo” - 13 sentyabr, 21:30

“Real Sosedad” - “Atletiko” - 13 sentyabr, 00:00

“Vilyarreal” - “Betis” - 14 sentyabr, 00:00.

A Seriyaning 4-turida “Lacio” va “Milan” o'zaro o'ynaydi. Turning eng katta afishasi ham shu.

Mavsum endi boshlangan, shuning uchun jadvalga qarab katta xulosa chiqarishga erta. Ammo yuqori o'rinlarni ko'zlayotgan ikki jamoaning o'zaro uchrashuvi baribir alohida qiziq. Ayniqsa “Milan” uchun Rim safari chempionat boshidagi jiddiy o'yinlardan biri bo'ladi.

“Napoli” o'z maydonida “Bolonya”ni qabul qiladi. “Yuventus” “Sassuolo” mehmoni bo'lsa, “Roma” Turinda “Torino” bilan o'ynaydi. Turga “Inter” - “Udineze” uchrashuvi nuqta qo'yadi.

A Seriya, 4-tur:

“Veneciya” 2:4 “Fiorentina”

“Jenoa” - “Frozinone” - 12 sentyabr, 18:00

“Lacio” - “Milan” - 12 sentyabr, 21:00

“Atalanta” - “Kalyari” - 12 sentyabr, 23:45

“Lechche” - “Monca” - 13 sentyabr, 18:00

“Napoli” - “Bolonya” - 13 sentyabr, 21:00

“Sassuolo” - “Yuventus” - 13 sentyabr, 23:45

“Komo” - “Parma” - 14 sentyabr, 21:30

“Torino” - “Roma” - 14 sentyabr, 21:30

“Inter” - “Udineze” - 14 sentyabr, 23:45.

Bundesligada ikki turdan keyin jadvalga qarab, ko'zga ishonish qiyin. “Augsburg” ikkita g'alaba bilan birinchi o'rinda. Manuel Baum jamoasi “Shalke”ni 3:0 hisobida engdi, keyin Frankfurtda “Ayntraxt”ni 4:1 hisobida tor-mor qildi.

Endi “Augsburg” “Bayer”ni qabul qiladi. Leverkuzenliklar esa mavsumni teskari boshladi: birinchi turda Bundesliga debyutanti “Elversberg”ga yutqazdi, keyin “Union”ni 4:0 hisobida engdi. Shuning uchun Augsburgdagi o'yin ikki turdan keyingi peshqadam bilan o'ziga kelayotgan “Bayer”ning to'qnashuviga aylandi.

“Elversberg” esa birinchi sensatsiya bilan cheklanib qolmadi. Debyutant “Bayer”dan keyin “Borussiya Myonxengladbax”ni ham engdi. Eng qizig'i, jamoa 1:3 hisobida ortda borayotib, yakunda 4:3 hisobida g'alaba qozondi.

Endi ularning oldida butunlay boshqa darajadagi raqib - “Bavariya”. “Elversberg” ikki turdan keyin myunxenliklardan yuqorida turibdi. Qolaversa, bu ikki klub tarixda birinchi marta rasmiy o'yinda uchrashadi.

“Borussiya Dortmund” “Paderborn”ni qabul qiladi, “RB Leyptsig” esa “Gamburg” bilan o'ynaydi.

Bundesliga, 3-tur:

“Union” 1:3 “Shalke”

“Augsburg” - “Bayer” - 12 sentyabr, 18:30

“Borussiya Dortmund” - “Paderborn” - 12 sentyabr, 18:30

“Frayburg” - “Borussiya Myonxengladbax” - 12 sentyabr, 18:30

“Hoffenhaym” - “Shtutgart” - 12 sentyabr, 18:30

“Maync” - “Ayntraxt” - 12 sentyabr, 18:30

“Kyoln” - “Verder” - 12 sentyabr, 21:30

“RB Leyptsig” - “Gamburg” - 13 sentyabr, 18:30

“Elversberg” - “Bavariya” - 13 sentyabr, 20:30.

Liga 1’da PSJ bu safar “Brest” mehmoni bo'ladi. Parijliklar chempionatni kutilganidek boshlay olmadi. Shuning uchun “Brest” safarida PSJdan, avvalo, natija kutiladi.

Turning yana bir yaxshi afishasi - “Strasburg” - “Monako”. Monegasklar chempionatni yaxshi boshlagan, “Strasburg” esa uyda ularning seriyasini to'xtatishga urinadi.

Parijda esa PSJ emas, shaharning ikkinchi klubi maydonga tushadi. “Parij” o'z uyida “Lion”ni qabul qiladi. Liga 1ga qaytgan klub uchun bunday raqiblarga qarshi o'yinlar mavsumning eng qiziq kechalaridan bo'lishi aniq.

Liga 1, 4-tur:

“Renn” 1:0 “Marsel”

“Strasburg” - “Monako” - 12 sentyabr, 20:15

“Oser” - “Nicca” - 12 sentyabr, 23:45

“Gavr” - “Anje” - 12 sentyabr, 23:45

“Loryan” - “Tuluza” - 12 sentyabr, 23:45

“Parij” - “Lion” - 12 sentyabr, 23:45

“Lill” - “Trua” - 13 sentyabr, 18:00

“Le-Man” - “Lans” - 13 sentyabr, 20:15

“Brest” - PSJ - 13 sentyabr, 23:45.