Jamoliddin Rahmatullaev: "Juda alamli mag'lubiyatga uchradik"
/ Kiritdi: BestMaster O'qilgan: 3698
Proliga 19-turidan o'rin olgan "Respublika FA" – "FarDU" uchrashuvidan so'ng "Respublika FA" bosh murabbiyi Jamoliddin Rahmatullaev matbuot anjumanida ishtirok etdi.
- O'yin haqida fikringiz?
- Juda alamli mag'lubiyatga uchradik. Chiroyli o'ynab yutqazib qo'ydik. Biz hatto durangga rozi bo'lmasligimiz mumkin edi. Raqib deryali bir-biriga o'xshash gollar kiritdi. Futbolchilarimizning yakka kurashlarga, uzun to'p uzatishlarga to'liq tayyor emasliklari bugun ko'rinib qoldi. Lekin pozicion hujum va himoyada ajoyib o'yin ko'rsatdik.
- Jamoangiz so'nggi soniyada to'p o'tkazib mag'lub bo'ldi va shunda orqa tribunadagi muxlislardan turli gap-so'zlar bo'ldi. Siz esa ular bilan tortishib ketdingiz. Professional murabbiy uchun bu kabi holatlarga e'tibor berish qanchalik to'g'ri?
- Endi futbol juda hissiyotlarga boy o'yin. O'yin payti stressli holatlar ko'p bo'ladi. Baribir bu ham ruhiyatga ta’sir qiladi. To'g'ri aytdingiz, murabbiy har qanday vaziyatda o'zini qo'lga ola bilishi kerak. Men imkon qadar jamoam yaxshi o'yin ko'rsatayotgan mahal futbolchilar ruhiyatini tushirmaslikka harakat qilaman. Orqada turgan muxlislardan biri jamoam shaniga haqoratli so'zlarni yog'dirgani uchun to'g'risi, men ham chidab tura olmadim. Chunki shogirdlarim bu o'yin bilan haqoratga loyiq emasdilar.
- Hatto o'yin oxirlarida ham "FarDU" imkoniyatni boy berayotgandi, biroq kambek amalga oshirib mag'lubiyatni g'alabaga aylantirdi.
- Darhaqiqat "FarDU" yaxshi jamoa. Ayniqsa ikkinchi davrada jismoniy tomondan yaxshigina kuchaydi. Biz buni bilardik, shuni bilib ham yakkakurashlarda yutqazib mag'lub bo'lganimiz alam qilyapti. Raqibimiz kurashuvchan va oxirgi daqiqagacha kurashyapti. Qolaversa "FarDU"ni muxlislar juda yaxshi qo'llab turishdi.
- O'yinning borishiga qarab siz amalga oshirgan o'zgarishlar jamoa o'yinini kuchaytirdi deb ayta olmaymiz.
- To'g'ri ta'kidladingiz, buni sezibsiz. Zaxiradan tushganlar bugun afsuski o'yinni kuchaytira olishmadi. Bir tomondan to'g'ri tushunish kerak, zaxiradan tushganlar o'yin amaliyoti kam futbolchilar edi va ular birdaniga o'yinni kuchaytirib yuborishga hali erta.
- Murabbiylar o'zaro janggida bugun yutqazganingizni tan olasizmi?
- (kulib) Agar bu sizni xursand qilsa, ha tan olaman. Chunki chindan ham yutqazdik. Biz natijaga ko'ra mag'lub bo'ldik. Lekin shogirdlarim ko'rsatgan o'yindan faxr tuydim. Hali 20 yoshgacha to'lmagan yigitlar shunday harakat qilib ko'pchilikni xursand etishdi. Tarkibida oliy ligani ko'rgan futbolchilarga qarshi tengma-teng kurash olib bordik.
Teglar: jamoliddin, rahmatullaev, juda, alamli, maglubiyatga, uchradik,
← OldingaOrqaga →
Bosh sahifaga
514