Eron terma jamoasi futbolchisi: "O'zbekiston - kuchli jamoalar sirasiga kiradi"
/ Kiritdi: BestMaster O'qilgan: 954
Muhammad Gorbani Eron terma jamoa media xizmatiga bergan intervyusida O'zbekiston va Rossiyaga qarshi o'tkaziladigan ikkita o'rtoqlik o'yini haqida to'xtalib o'tdi.
- E'tibor bering, bu Jahon chempionati o'yinlaridan keyingi terma jamoaning birinchi yig'inidir. Futbolchilar ham asta-sekin yig'inga kelib qo'shilmoqda va o'ylashimcha, bu juda yaxshi yig'in bo'lishi mumkin. Ikkita yaxshi jamoa bilan o'ynaymiz. O'zbekiston - oxirgi vaqtlarda juda ko'p o'ynagan raqibimiz, ammo ular doimo bizga qiyinchilik tug'dirgan. Ular kuchli jamoalar sirasiga kiradi va hozir ham bu jamoaga qarshi jiddiy sinovdan o'tishimiz mumkin.
Boshqa tomondan, Rossiya ham eng kuchli jamoalardan biri va juda yaxshi futbolchilarga ega. Bu jamoa tarkibida bir nechta yaxshi legionerlar bor. Rossiya kuchli jismoniy futbol o'ynaydigan va taktik harakatlarni amalga oshirishda ham juda yaxshi bo'lgan jamoa. Biz ham murabbiylar shtabining ko'rsatmalari va terma jamoa bosh murabbiyining rejasi bilan yaxshi o'yin ko'rsatishga, ushbu ikki o'yinda kuchli ishtirok etish orqali Osiyo kubogiga tayyorgarlik yo'liga tushib olishga umid qilamiz.
Terma jamoa yarim himoyachisi o'zining hozirgi holati haqida shunday dedi:
- Xayriyatki, Jahon chempionatidan keyin holatim juda yaxshi edi. Jahon chempionatida o'ynagan o'yinimdan so'ng o'zimni juda yaxshi his qildim. JCHda o'z mamlakatim terma jamoasi sharafini himoya qila olganim men uchun yoqimli bo'ldi. Bu yo'lni davom ettirishni va inshaalloh eng yaxshi o'yinni ko'rsatish uchun shunday mashg'ulot o'tkazish va o'ynashni xohlayman. Maqsadim - asosiy tarkibdan joy olish va xoh bir daqiqa, xoh 90 daqiqa o'ynaymanmi, maydonda eng yaxshi o'yinimni ko'rsatishdir.
O'zbekiston va Rossiyaga qarshi ikkita o'yin uchun shaxsiy maqsadim - avvalo mashg'ulotlarda eng yaxshi tomonimni ko'rsatish va inshaalloh, agar loyiq bo'lsam, ushbu ikki uchrashuvda maydonga tushib, terma jamoaga foyda keltirishdir.
Futbolchi terma jamoa yig'inidagi muhit va Osiyo kubogi oldiga qo'yilgan maqsadlar haqida gapirib o'tdi:
- Bizda Jahon chempionatida katta armon bo'ldi va oxirgi o'yinda ayrim voqealar sodir bo'ldi. Hozir ushbu voqealarni unutamiz deb umid qilaman, albatta, Osiyo kubogida katta natijaga erishish uchun aynan o'sha voqealardan kuch va intilish olishimiz kerak.
U Osiyo kubogi oldidan sifatli yig'inlar va o'rtoqlik o'yinlari o'tkazish muhimligini ta'kidladi:
- Yaxshi o'rtoqlik o'yinlari terma jamoaning Osiyo kubogida munosib ishtirok etishiga yordam beradi. Federatsiya zarur tashkiliy ishlarni amalga oshirishiga va Osiyo kubogi oldidan bir nechta munosib o'rtoqlik o'yinlari o'tkazib, musobaqaga to'liq tayyorgarlik bilan kirishishimizga umid qilaman.
Gorbani terma jamoa yig'inida yosh futbolchilarning borligi va futbolchilar o'rtasidagi raqobatning ortishi haqida shunday dedi:
- Yig'inga bir nechta yangi futbolchilar qo'shildi, ular yaxshi yoshlar. Men o'zim ham shu yoshlar sirasiga kiraman. Barchamiz ahil bo'lib yaxshi harakat qilishimizga va terma jamoa bosh murabbiyining e'tiborini qozonishimizga umid qilaman. Bu raqobat terma jamoaga juda katta yordam berishi mumkin va yosh futbolchilar ham kattalarning tajribasidan foydalanishlari mumkin.
Hozir Sardor Ozmun qaytib keldi va barcha yoshlar uning tajribasidan foydalanishimiz mumkin. Barchasiga qaramay, Sardor va Mehdi Torimiy Eronning eng buyuk futbolchilari sirasiga kiradi va yillar davomida terma jamoa uchun zafarlar quchib kelishgan. Yosh futbolchilar ulardan yaxshi narsalarni o'rganishlarini va o'z futbol yo'llarida muvaffaqiyat qozonishlarini umid qilaman.
Gorbani qaysi reja terma jamoani Osiyo kubogi chempionligiga olib kelishi mumkinligi haqidagi savolga shunday javob berdi:
- Inshaalloh, murabbiylar shtabining ko'rsatmalari va butun jamoaning bir tanu bir jon bo'lishi bilan Jahon chempionatida amalga oshmagan narsani Osiyo kubogida bajaramiz. Bizda mavjud bo'lgan ushbu eronlik murabbiylar shtabi bilan bu narsa amalga oshishi mumkin deb o'ylayman.
Eslatib o'tamiz, O'zbekiston - Eron uchrashuvi 24 sentyabr kuni Farg'onada bo'lib o'tadi. Uchrashuv Toshkent vaqti bilan 19:00da start oladi.
Teglar: terma, jamoasi, futbolchisi, ozbekiston, kuchli, jamoalar, sirasiga, kiradi,
← OldingaOrqaga →
Bosh sahifaga
380