Suriya matbuoti O'zbekistonga qarshi o'yindan so'ng hakam va bosh murabbiyni tanqid qildi

2026-10-03 14:39:01 / Kiritdi: BestMaster  O'qilgan: 1008

Toshkentdagi "Paxtakor" stadionida o'tkazilgan O'zbekiston va Suriya milliy terma jamoalari o'rtasidagi o'rtoqlik uchrashuvi mezbonlarning 4:1 hisobidagi yirik g'alabasi bilan yakunlandi. Ushbu natija va maydondagi holat Suriya sport jamoatchiligi hamda matbuotida keskin etirozlarga sabab bo'ldi.

Suriya nashrlarining tahliliga ko'ra, ispaniyalik bosh murabbiy Xose Lana Iordaniyaga qarshi o'tgan o'yindan butunlay farqli ravishda 5-3-2 taktikasini qo'llagan. U himoyachilar Xolid Kurdog'li va Zakariya Hannan, shuningdek, yarim himoyachi Anmar Ibrohimni zaxirada qoldirib, Yohannes Dunhouni ilk bor asosiy tarkibda maydonga tushirdi. Biroq bu yangicha uslub jamoaga foyda keltirmadi: birinchi bo'limda Suriya terma jamoasi to'liq himoyalanishga majbur bo'ldi va faqatgina Mahmud Al-Asvadning harakatlari orqali xavf tug'dirishga urindi.

Uchrashuvning 27-daqiqasida va birinchi bo'limning so'nggi daqiqasida O'zbekiston terma jamoasi vakillari Suriya himoyasidagi qo'pol xatolardan unumli foydalanib, ikkita to'p kiritishga muvaffaq bo'lishdi. Ikkinchi bo'lim boshida (49-daqiqa) qanotdan uzatilgan to'pni mezbonlar hujumchisi bosh bilan darvozaga joylab, hisobni 3:0 ko'rinishiga keltirdi. Al-Halloq, Al-Mavas va Umar As-Somaning maydonga tushishi Suriyaning hujumkorligini biroz oshirgan bo'lsa-da, 90-daqiqada O'zbekiston to'rtinchi golni urdi. Oradan bir daqiqa o'tib, Mahmud Al-Mavas qaytgan to'pni darvozaga yo'llab, Suriyaning taskin beruvchi yagona goliga mualliflik qildi.

Suriya OAVlari yirik mag'lubiyatning asosiy sababkori sifatida bosh murabbiyni ko'rsatish bilan birga, uchrashuv hakamini eng yomon ishtirokchi sifatida keskin tanqid qilmoqda. Jurnalistlarning iddao qilishicha, hakam Suriyaning foydasiga ikkita yaqqol penaltini belgilamagan va O'zbekistonning to'rtinchi goli ochiqchasiga ofsayd holatidan kiritilgan. Shunday bo'lsa-da, mahalliy nashrlar murabbiyning yangi futbolchilarni sinab ko'rish huquqini etirof etib, jamoa ushbu omadsiz o'yindan to'g'ri xulosa chiqarishiga umid bildirgan.

Teglar: suriya, matbuoti, ozbekistonga, qarshi, oyindan, song, hakam, bosh, murabbiyni, tanqid, qildi,
← OldingaOrqaga →