Ivan Boshkovich: "Amalda doimiy safarda o'ynashimizga to'g'ri kelmoqda"
/ Kiritdi: BestMaster O'qilgan: 1232
Superliganing 23-turi doirasida "Paxtakor" - "Bunyodkor" (3:1) uchrashuvidan keyin mehmonlar bosh murabbiyi Ivan Boshkovich matbuot anjumanida qatnashdi.
– O'yin haqida o'z fikrlariningizni bildirib o'tsangiz…
– Barchaga xayrli kech. O'yin haqida gapiradigan bo'lsam, eng avvalo, natijadan qoniqmadim. Biroq jamoamning o'yin sifatiga kelsak, ko'plab kamchiliklar bo'lishiga qaramay, ijobiy jihatlar ham ko'zga tashlandi – xususan, ikkinchi bo'limda. Birinchi bo'limning dastlabki 20 daqiqasida o'yin tempini nazorat qildik deb o'ylayman. Raqibda ham vaziyatlar yuzaga keldi, biroq o'yin biz rejalashtirgan va kutgan ssenariy asosida kechdi. Faqatgina to'pni olib qo'yganimizda, ayniqsa maydon markazida, bu vaziyatlardan umuman foydalana olmadik, hatto darvoza tomon zarba ham bera olmadik. Yuqori pressingdan so'ng to'pni olib qo'yishimiz kerak bo'lgan vaziyatlarning birida gol o'tkazib yubordik. Birinchi bo'limda ikkinchi to'plar uchun kurashda sustkashlikka yo'l qo'ydik, ammo tanaffusda buni to'g'riladik. Yigitlar maydonga chiqib, sifatliroq o'yin ko'rsatishdi, ko'rsatmalarga amal qilishdi va o'yin burilishini o'zgartira olganliklaridan xursandman. Biz kiritgan goldan to o'tkazib yuborilgan golgacha bo'lgan 15–20 daqiqalik oraliq o'yindagi eng yaxshi davrimiz bo'ldi. Biz oxirigacha harakat qildik, o'zgarishlar qildik, hisobni tenglashtirishga urindik, ammo uddalay olmadik. O'tkazib yuborilgan so'nggi gol umumiy 3:1 hisobidagi manzarani o'zgartirib yuborishi mumkinligi achinarli, albatta. Shunga qaramay, bugun kuchli raqibga qarshi munosib qarshilik ko'rsatib, jang qildik deb hisoblayman. Meni quvontirgan yana bir jihat shuki, bugun ikkita legioner maydonga tushib, jamoaga kuch qo'shdi. Ular so'nggi ettita o'yinda Superligada qolishimiz uchun zarur bo'lgan ochkolarni jamg'arishda yordam berishiga ishonaman.
– Siz "Bunyodkor"ga kelganingizdan so'ng, jamoa balansini biroz o'zgartirdingiz. Men jamoaning ko'plab o'yinlarini kuzatib boraman. Avvallari jamoa ko'plab vaziyatlar yaratar, biroq ulardan foydalanish ko'rsatkichi past edi. Umuman olganda, hammamizda ham bu ko'rsatkich past. Sizning kelishingiz bilan jamoa ko'p vaziyatlar yaratishni to'xtatgandek tuyuldi. Bugun, shaxsiy fikrimcha, "Paxtakor" sizlarni mutlaq ustunlik bilan mag'lub etdi. Sizlarda bitta gol va atigi ikkita vaziyat bo'ldi xolos. Jamoa balansini asosan himoyada ishonchli o'ynash va yaratilgan kam sonli vaziyatlardan unumli foydalanishga yo'naltirdingizmi?
– Bugungi o'yinda yaqqol va yorqin vaziyatlar ko'p bo'lmaganiga qo'shilaman. Ammo ustida ishlashimiz kerak bo'lgan jihatlar talaygina. Bugun raqib "Paxtakor"ga qarshi rejamizni yaxshi yo'qqa chiqara oldi. Markazda to'pni olib qo'ygan holatlarimizda, ular tezkor qarshi hujumga aylanib ketishi mumkin edi. Men vaziyatni shunday ko'rdim. Uchinchi zonaga uzatilgan paslar va son jihatdan ustunlik yuzaga kelgan vaziyatlarda raqib darvozasiga zarba berish imkoniyatidan foydalana olmadik. Bu bizdagi asosiy muammo va uning ustida ishlashimiz zarur. Buni to'g'irlasa bo'ladi, chunki mahorat etarli, faqat bugun bizga to'g'ri qaror qabul qilish va diqqatni jamlash yetishmadi. Yuqori puls holatida to'g'ri va sifatli qaror qabul qilish qiyinlashadi, ammo yigitlar umumiy rejaga sodiq qolishdi deb o'ylayman. Biz xohlagan ssenariy yuzaga keldi, lekin vaziyatlardan unumli foydalana olmadik. To'g'ri ta'kidladingiz, ochiq vaziyatlar ko'p bo'lmadi, lekin ularni yuz foizlik golli holatga aylantirishimiz mumkin edi.
– Yana bir savol. Ikkita yosh futbolchi – yaqinda O'zbekiston milliy terma jamoasida debyut qilgan 16 yoshli Muhammad Hakimov va uchrashuvni boshidan oxirigacha xatosiz o'tkazgan 19 yoshli To'lqinbekov haqida so'ramoqchi edim. Ular terma jamoadan qanday kayfiyatda qaytishdi? Jismoniy emas, ko'proq ruhiy holati va o'ziga bo'lgan ishonchini nazarda tutyapman.
– Juda yaxshi, lekin Muhammad o'ynamadi, u terma jamoa safida bor-yo'g'i besh-o'n daqiqa harakat qildi.
– U rekord o'rnatdi-ku.
– Ha, albatta. Aksincha, ularda ishonch yuqori deb o'ylayman, ular Superligada o'ynashga ko'nikib ulgurishgan, ayniqsa, To'lqinbekov. Ruhiy va psixologik jihatdan ular doimo tayyor holatda. Menimcha, ular uchun bu oddiy va odatiy jarayon. Terma jamoaga chaqiruvdan so'ng futbolchilar yanada kuchli motivaciya va o'ziga ishonch bilan qaytishlari kerak va bugun ular ajoyib o'yin ko'rsatishdi. Men ularning qobiliyatini, xususan, To'lqinbekovni juda yaxshi bilaman.
Bugun jamoaga barqaror o'yin namoyish etishda aynan ular yordam berishdi va biz ularga ishonamiz. Terma jamoadagi tajriba ularning ham ruhiy, ham jismoniy o'sishiga ijobiy ta’sir ko'rsatishiga ishonchim komil.
– Biroz avval legionerlar haqida to'xtalib o'tdingiz. Matia Krivokapich iyul oyidan beri ilk bor maydonga tushdi. Uni qanday qilib maydonga qaytishga ko'ndirdingiz? Boshqa tomondan, Botti umuman ko'rinmay qoldi, hattoki qaytnomada ham yo'q, holbuki avvalgi o'yinlarda maydonga tushayotgan edi.
– Bugun Krivokapich jarohatdan forig' bo'lib, zaxiradan maydonga tushdi. Botti esa so'nggi uchrashuvlarda, xuddi bugungidek, qaytnomaga kiritilmayapti. Biz bu borada ishlayapmiz. Jarohatlardan so'ng futbolchilarni tiklab, ularni optimal jismoniy holatga keltirishga harakat qilyapmiz. Botti o'yindan oldin biroz tob qochgani sababli qaytnomaga kiritilmadi. Pletnyov va Matia esa uzoq tanaffusdan so'ng maydonga qaytishdi. Ular hali yuz foiz jismoniy holatda emas, lekin biz ishda davom etamiz va nasib qilsa, ular jamoamizga yordam berishadi.
– Keyingi o'yin sizning sobiq jamoangiz – "So'g'diyona"ga qarshi kechadi. Bu o'yin siz uchun qandaydir principial ahamiyatga egami?
– Biz hammamiz professionallarmiz. Murabbiylik kasbi shuni taqozo etadi. Har bir raqibga jiddiy tayyorgarlik ko'ramiz va bu safar ham shunday bo'ladi. To'g'ri, u yerda uzoq vaqt faoliyat yuritdim, ajoyib damlarni o'tkazdik. Ammo bo'lajak o'yinga faqat va faqat g'alaba qozonish ishtiyoqi bilan yondashaman, hech qanday his-tuyg'ularsiz. Agar emociyalarga erk bersak, noto'g'ri qaror qabul qilib qo'yishimiz mumkin. Shu sababli bu o'yinga professional darajada tayyorgarlik ko'rishimiz, o'z bilim va tajribamdan foydalangan holda yigitlarni tayyorlashimiz kerak. Xudo xohlasa, bu o'yindan umidim katta.
– "Bunyodkor"ning uy uchrashuvlari stadion holati yomonligi sababli turli maydonlarda o'tkazilmoqda. Bu borada yangiliklar bormi?
– Umid qilamizki, tez orada o'z maydonimiz tiklanadi va biz u yerda o'ynay olamiz. O'z uyingda o'ynash har doimo osonroq. Kelgusi 10–15 kun ichida maydon to'liq tiklanadi degan umiddamiz. Maydon holati yaxshilanayotgani haqida ma'lumotlar bor.
– "Jar" stadionida o'ynamoqchi edingiz-ku? "Bunyodkor"da o'ynaganingizda muxlislar kam edi, ammo "Jar"da "Buxoro"ni qabul qilganingizda, muxlislar tashrifi va umuman stadion aurasi butunlay boshqacha bo'lgan edi. Hatto translyatsiya rejissyori ham buni alohida ko'rsatgandi. Xullas, "Bunyodkor" "Jar"da o'ynaganda, xuddi o'z uyida o'ynagandek taassurot qoldiradi. Hozir "Jar"ning maydoni yaroqsiz holatga kelganini nazarda tutyapsizmi?
– Bu holat bizga bog'liq emas. Biz u yerda o'ynashga harakat qildik, "Jar"da uchrashuv o'tkazishga urindik, ammo imkoni bo'lmadi. Kelgusi uchrashuvni qayerda o'tkazishimizni hozircha bilmayman. Amalda doimiy safarda o'ynashimizga to'g'ri kelmoqda. Biroq biz oxirigacha kurashamiz va bu vaziyatdan yorug' yuz bilan chiqib ketamiz.
Teglar: boshkovich, amalda, doimiy, safarda, oynashimizga, togri, kelmoqda,
← OldingaOrqaga →
Bosh sahifaga
230