Mixail Yaremchuk: "O'tkazilgan golda O'tkir Yusupovni ayblash adolatdan emas"
/ Kiritdi: BestMaster O'qilgan: 1628
Superliga 24-turidan o'rin olgan "Navbahor" – "Paxtakor" (1:1) o'yinidan so'ng mezbonlar yordamchi murabbiyi Mixail Yaremchuk matbuot anjumanida ishtirok etdi.
– O'yin haqida...– Eng avvalo, muxlislarga minnatdorchilik bildirmoqchiman. Bugun stadionda shunchaki aql bovar qilmas muhit hukm surdi. Bu o'yinchilarimizga oldinga intilishga yordam berdi. Afsuski, bunday o'yinlarda xatoning tovoni juda yuqori bo'ladi va birinchi xatoni biz qildik. Lekin yigitlarga qoyil qolish kerak, ularga katta rahmat. Ular oxirigacha harakat qilishdi, oxirigacha kurashishdi. Bugun g'alaba qozonishni juda xohlagan edik va o'yin oxiri buning isbotidir – gol urish uchun butun kuchimiz bilan raqib darvozasi tomon tashlandik. Afsuski, o'xshamadi, ammo bu – futbol.– Penaltilar va standart vaziyatlar haqida...– Garchi mashg'ulotlarda yigitlar zarba berib, buni ijro etishayotgan bo'lsa-da, so'nggi o'yinlarda penaltilar bilan bog'liq vaziyat bizda o'xshamayapti. Bu jihat ustida ishlashda davom etamiz. Standart vaziyatlarga kelsak, bugun ham, OKMK bilan o'yinda ham standart vaziyatdan gol urdik. Buning ustida ishlayapmiz, lekin, ehtimol, raqib ham yaxshi himoyalandi va bizni o'rgandi. Shuning uchun futbolning har bir jihatida kuchayishimiz kerak, har biri ustida ishlayapmiz. Afsuski, har doim ham o'xshayvermaydi. Katta jamoalarda ham doim o'xshayvermaydi, biz ham bundan mustasno emasmiz. Ammo bu borada kuchayamiz. Bugun muxlislarni g'alaba bilan xushnud etish uchun vaziyatlar etarli edi. Yana bir bor qaytaraman, biz buning uchun barcha ishni qildik va g'alaba qozonishni xohladik. Lekin, afsuski, shunday bo'lib qoldi.– O'tkir Yusupov haqida...– O'tkir Yusupovga kelsak, uning malakasiga shubha qilishga o'rin yo'q. U yuqori saviyali darvozabon va o'z ishining ustasidir. Jahon chempionatiga chiqqanimizda uning terma jamoadagi o'yini bunga yaqqol isbotdir. Ehtimol, har bir o'yinchida, har bir darvozabonda qandaydir pasayish davrlari bo'lib turadi. Bugungi golda uni ayblash, ehtimol, adolatdan bo'lmas. Chunki O'tkir o'tkazib yuborayotgan gollar faqat uning aybi emas. Bu xatolar ketma-ketligi, gol o'tkazib yuborganimizning oqibatidir. Sababi esa undan oldinroq yuz bergan holatlarda yashiringan – nima uchun shunday o'ynadik, nima uchun shunday vaziyat yuzaga keldi. Ehtimol, boshqa o'yinlarda vaziyat boshqacharoq bo'lar, ammo yana bir bor takidlayman, biz unga shubha qilmaymiz.– Bugungi o'yindan so'ng jamoa chempionlik poygasidan chiqdimi, nima deb o'ylaysiz?– Hali o'yinlar bor. Har narsa bo'lishi mumkin. Doimo ishonish va har bir o'yinda g'alaba qozonishga intilish kerak. Muxlislar xursand bo'lishi, o'yinimiz ularni quvontirishi uchun barcha ishni qilishga harakat qilamiz va natija bo'lishi uchun kurashamiz. Natijaga erishish yo'lida barcha kuchimizni beramiz.– Menda ikkita savol bor. Asosiy tarkibda Norchaev va Kojo tandemini ko'rish mumkinmi? Shuningdek, Fernandes bilan bog'liq vaziyatga izoh bersangiz, uni anchadan beri ko'rmayapmiz...– Aleksning tizzasida jarohati bor. Unga operaciya qilishdi. Hozir u tiklanish jarayonini o'tkazadi. Umid qilamanki, tiklanish jarayoni yaxshi va tez o'tadi hamda biz uni yana maydonda ko'ramiz. Tandem bo'lishi to'la mumkin, bugun ham, o'tgan o'yinda ham Norchaev va Abdurahmonovdan foydalandik. Ular gol urishni bilishadi, gol ura olishadi. Mana shunday kombinaciyani sinab ko'rdik. Shuning uchun bunday tandemni ko'rishimiz ehtimoli yuqori. Barchasi tayyorgarlik darajasiga bog'liq bo'ladi. Biz doimo tarkibni yigitlarning qanchalik tayyorligi, qanchalik harakat qilayotgani va mashg'ulotlarda o'zlarini qanday ko'rsatayotganiga qarab tanlaymiz. Shuningdek, bizda doimo raqibning qanday o'ynashiga qarab o'yin rejasi hamda o'yinni kuchaytirish rejasi bo'ladi.– Nima uchun penaltidan oldin to'pni boshqa futbolchiga berishdi? Bu xohishga bog'liqmi?– Bu o'ziga xos bir "usul" hisoblanadi. Biz ko'rdikki, darvozabon zarba berayotgan futbolchiga ruhiy bosim o'tkazadi. Shuning uchun bizning yigitlardan biri ataylab go'yoki o'zi penalti tepmoqchi bo'lgandek to'pni qo'liga olib turdi. Keyin darvozabon o'z joyini egallagach, asosiy tepuvchi futbolchi to'pni xotirjam olib, zarba berdi.
– Demak, jamoada asosiy penalti tepuvchi bormi?– Asosiy penalti tepuvchilarimiz bor, bizda penaltini ijro eta oladigan uch-to'rt nafar futbolchi mavjud. Bu o'yin davomida kim o'zini qanday his qilayotgani, o'ziga qanchalik ishonganiga bog'liq.– Darvozabonlarga ham zarba berish imkoniyatini berasizmi?– Mashg'ulotlar so'ngida penaltilar tepamiz va hattoki darvozabonlar ham bir-biriga zarba berishadi. Shuning uchun hech narsani istisno qilib bo'lmaydi.– Shohruh Abdurahmonovning jarohati nima bo'ldi, qanchalik jiddiy?– Uning sonining orqa mushaklarida muammo bor. Jarohatning qanchalik jiddiyligini baholash uchun UZI qilish kerak. Unga faqat tezroq sog'ayishini tilaymiz va keyingi o'yinlarda bizga yordam beradi, deb umid qilamiz.– O'zbekiston kubogidagi imkoniyatlarni qanday baholaysiz?– Barchamiz umid qilyapmiz. Barchasi o'zimizga bog'liq. Biz harakat qilyapmiz, buning uchun barcha ishni qilyapmiz. Lekin, afsuski, bu – futbol. Xatolar bor va bo'ladi ham, ulardan qochib qutulib bo'lmaydi, ular hatto kundalik hayotimizda ham uchraydi. Siz bilan biz ham xato qilishimiz mumkin. Asosiysi – to'g'ri xulosa chiqarish va oldinga harakat qilish. Vazifamiz esa bitta va maksimal – har bir o'yinda g'alaba qozonish hamda muxlislar rozi bo'lishi. Chunki shunday ajoyib qo'llab-quvvatlash bo'ldi... Biz bugun ularni xursand qilishni juda xohlagan edik. Omad sizlarga. Katta rahmat.
Teglar: mixail, yaremchuk, otkazilgan, golda, otkir, yusupovni, ayblash, adolatdan, emas,
← OldingaOrqaga →
Bosh sahifaga
275