Ixtiyor Karimov: "Bugungi futbolni boshqa ko'rsatmaymiz"

2026-11-02 10:06:02 / Kiritdi: BestMaster  O'qilgan: 886

Proliga 25-turdan o'rin olgan "Respublika FA" – "Sho'rtan" uchrashuvidan so'ng "Sho'rtan" bosh murabbiyi Ixtiyor Karimov matbuot anjumanida ishtirok etdi.

- O'yin haqida fikringiz?

- Bugungi o'yin haqida fikrim ikki xil. Birinchi bo'limda boshqacha o'yin namoyish etishimiz kerak edi. Negadir futbolchilarimiz birinchi taymda sust harakat qilishdi. Menga esa bu narsa yoqmadi. Tanaffusdan keyin o'z o'yinimizni ko'rsatishga o'tdik, ko'proq hujumlarga chiqdik. Ikkinchi bo'limda "Sho'rtan" o'z futbolini o'ynay boshladi. Lekin natija tomonlama biz uchun qoniqarli emas.

- Raqib jamoa bosh murabbiyi sizdan oldin "Bazi jihatlar bo'yicha jamoam "Sho'rtan"dan yaxshiroq harakat qildi, men faqat yosh borasidagi tafovutni ko'rdim, o'yin tomonlama bunday bo'lmadi" deb aytib o'tdi. Siz bu fikrga nima deya olasiz?

- Men bu fikrni aytmagan bo'lardim, agar raqib bizdan kuchli bo'lganida o'z jarima maydonchamizdan tashqariga chiqa olmasdik. Bugungi o'yinda yarim himoya markazida muammo bor edi, markaz juda bo'sh o'ynadi, muammolar ham shuning natijasida keldi. Ikkinchi taymda o'yin uslubini o'zgartirganimiz foyda berdi va yaxshi futbol ko'rsatishga o'tdik. O'ylaymanki, keyingi uchrashuvlarda bugungidek harakat qilmaymiz.

- Markazga o'zingiz xohlagan futbolchini qo'ya olmadingizmi yoki o'yin davomida muammo yuzaga keldimi?

- Asosiy futbolchilarimiz Sirojiddin jarohat olgan, Nodir to'rtta sariq kartochka sabab bu o'yinni o'tkazib yubordi. Natijada himoyachilarni maydon markazida o'ynatishga majbur bo'ldik.

- O'yindagi oxirgi vaziyat bo'yicha fikringiz qanday? Bosh bilan berilgan zarba va golga juda yaqin kelingan holat.

- Qani o'sha sovuqqonlik, qani o'sha vazminlik? Futbolchilarimiz sovuqqon bo'lganida o'sha vaziyat gol bilan tugardi. Negadir ayrim jihatlarda mahorat etmayapti. Qolaversa bugun omad ham kelmadi.

- Legionerlar o'yinidan qanchalik qoniqyapsiz va yil yakunida kimlar jamoada qoladi?

- Hozir eng muhimi mavsumni chiroyli yakunlab olish. Oxirgi o'yinimizdan so'ng shu savolni bersangiz, keyin javob berishim mumkin. Shuni aytishim mumkin, gruziyalik ikki futbolchidan ko'nglim to'lyapti. Yuriy Klochkov ham kerakli futbolchi. U yaxshi o'yinchi, faqat jarohat sabab ko'p vaqt o'ynay olmadi. Uning salohiyati hali to'liq ochilgani yo'q.

- "Sho'rtan" Superligaga chiqishi uchun o'tish o'yinlarida qatnashishi kerak bo'ladi. O'tish o'yinlaridan oldin jamoanining kayfiyati qanday? Superligaga chiqish uchun ishtiyoq va ishonch bormi?

- Biz Superligaga chiqamiz deb o'z oldimizga maqsad qo'yganmiz. Lekin bugungi uchrashuv biz uchun ogohlik qo'ng'irog'i bo'ldi. O'z ishimizni boshqatdan ko'rib chiqamiz, yigitlar bilan o'tirib gaplashamiz. Maqsad qo'yilgan va hech kim bundan voz kechgani yo'q. Buni amalga oshirish uchun hammamiz birgalikda harakat qilamiz.

- Bahrom Abdurahimov qo'li singanidan keyin yakkakurashlardan o'zini olib qochyapti. Bu holat sezildimi?

- Bahrom o'zini avaylab o'ynayapti, biz ham shunga monand o'yin oxirlarida tushiryapmiz. Hammasi imkoniyatdan kelib chiqqan holda olib borilyapti. To'g'ri, bu holat sezilyapti, lekin futbolchini ham to'g'ri tushunishimiz kerak.

Teglar: ixtiyor, karimov, bugungi, futbolni, boshqa, korsatmaymiz,
← OldingaOrqaga →