Ilyos Qurbonov: "Raqibga nisbatan kuchliroq edik"

2026-11-02 12:45:01 / Kiritdi: BestMaster  O'qilgan: 884

Proliga 25-turidan o'rin olgan "Lochin" – "Metallurg" (1:1) uchrashuvidan so'ng "Metallurg" bosh murabbiyi Ilyos Qurbonov matbuot anjumanida ishtirok etdi.

- O'yin haqida fikringiz?

- "Lochin"ga qarshi bahsda ko'plab vaziyatlarga ega bo'ldik, faqat hujumlarni yakunlashda oqsadik. O'yin asosan jamoamiz nazorati ostida kechdi. Ko'plab vaziyatlar yaratdik, lekin sen urmasang senga urishadi deganlaridek raqib qarshi hujumdan unumli foydalandi. Birinchi taymda ikki-uch vaziyatni golga aylantira olmadik. Ikkinchi taymda ham ko'plab imkoniyatlarga ega bo'ldik. Bahs esa 1:1 hisobida yakun topdi. Ishlaydigan jihatlarimiz ko'p, muammolarni bilamiz. Endi keyingi o'yinga hozirlik ko'ramiz.

- "Metallurg" birinchi davrada "Lochin"ni 5:0 hisobida mag'lub etgandi. Balki bugungi o'yin oldidan bemalol yutamiz degan fikr bo'lgandir?

- Yo'q, bunday fikrga bormadik. Biz bu haqda o'ylamadik ham. "Lochin" qanday jamoa ekanini bilamiz, bejizga turnir jadvalining yuqori o'rinlarida borayotgani yo'q. Mavsum oxiri bo'lgani uchun futbolchilarimizda charchoq kuzatilyapti. "G'azalkent" bilan bahsda ham ko'p kuch yo'qotdik. Menimcha, biz shu o'yindan keyin yaxshi tiklana olmadik. Bu mensimaslik emas, balki charchoq bilan bog'liq.

- "Metallurg" oldiga Superligaga chiqish vazifasi qo'yilgan. Faraz qiling, "Metallurg" Superligaga qaytdi va tarkibga "Lochin" jamoasidan kimlarni chaqirgan bo'lardingiz?

- "Lochin" jamoasidagi 22-raqamli Sardorbek Saidov yaxshi harakat qilar ekan. Shu o'yinchining harakatlari ko'proq yoqdi.

- O'yindan oldingi ko'rsatmalar qanday edi?

- Biz doim g'alaba uchun maydonga chiqamiz va shu bo'yicha ko'rsatma beramiz. Bosh murabbiy bo'lganimdan beri hali yutqazmadik. Har bir bahsga maksimal natijani ko'zlab chiqamiz. Faqat charchoq borligi chatoq bo'lyapti. Shunga qaramay, bugun besh-olti marta yuz foizli vaziyat yarata oldik.

- Safar o'yiniga "Metallurg" fan klubi ham tashrif buyurdi. Muxlislarning qo'llashi qanchalik ta’sir qildi?

- Fan klubimizga alohida rahmat aytmoqchiman: shuncha yo'l bosib shu ergacha kelishdi. Qaerga bormaylik, muxlislarimiz doim biz bilan birga va jamoani qo'llab turishibdi. Fan klubimizni bemalol 12-o'yinchimiz deya olaman.

- Jamoangiz gol o'tkazgach, ichingizdan nimalar o'tdi?

- Vaziyatni o'nglay olishimizga oxirigacha ishongandim. Chunki o'yinning borishidan ustunlik asosan biz tomonda ekanligi ko'rinib turdi. Futbolchilarimiz darajasi baland deya olaman. Ko'plab vaziyatlar bo'ldi, faqat gol urish kerak edi xolos. G'alaba qozonib ketishimiz ham mumkin edi.

Teglar: ilyos, qurbonov, raqibga, nisbatan, kuchliroq, edik,
← OldingaOrqaga →