Andrey Shipilov: "Futbolchi ko'p gapirishni boshladimi – tamom, xayr! Menga o'z nonini oqlashni xohlaydiganlar kerak"
/ Kiritdi: BestMaster O'qilgan: 750
Superliganing 27-turidan o'rin olgan "Paxtakor" – "Qo'qon-1912" (3:1) o'yinidan so'ng mehmonlar bosh murabbiyi Andrey Shipilov matbuot anjumanida ishtirok etdi.
– O'yin haqidagi fikrlaringiz qanday?
– O'yinning boshlanishi biz xohlagandek chiqmadi. Juda tezkor gollar o'tkazib yubordik. Vaholanki, ushbu o'yinga tayyorgarlik bosqichi davomida va kiyinish xonasida yigitlarga shunday degan edim: "Yigitlar, diqqat qilinglar, o'yinning boshlanishi tezkor kechadi, maydon nam, maydonda to'p tez harakatlanadi". "Paxtakor" tezkor o'ynashga va yuqori pressing qo'llashga harakat qiladi. Men ularni ogohlantirdim, bu yerda hech qanday murakkab narsa yo'qligini, shunchaki o'z poziciyasini yo'qotmaslik kerakligini ta'kidladim. Ammo ikkita gol o'tkazib yubordik. Xudoga shukurki, bu vaziyatdan chiqib keta oldik, vaziyatni o'ngladik, bu nokdaun, yani nokaut holatidan so'ng o'zimizga keldik. Ikkinchi bo'limni o'zingiz ko'rdingiz, biz munosib harakat qildik va chiroyli gol urdik. Ammo o'zimizning autdan so'ng belgilangan bu tushunarsiz penalti... Yigitlarga aytgandimki, kichik detallar ham barcha narsaga juda katta ta’sir qiladi. Men autdan to'pni o'yinga kiritib, yana o'z jarima maydonchamizgacha olib kelib, penalti ishlab olish va 3:1 hisobida yutqazib, xayrlashish qanday bo'lishini bilmayman va tushunmayman.
– Ikkinchi bo'limda markaziy himoyachingiz jarohat oldi va siz uning o'rniga tayanch yarim himoyachisini maydonga tushirdingiz. Tayanch yarim himoyachisi esa markaziy himoyachi sifatida o'ynadi. Vaholanki, zaxirada ikkita markaziy himoyachi bor edi. Nima uchun bunday qarorga keldingiz?
– Buni faqatgina jamoa bilan 24 soat birga bo'ladigan murabbiy tushunishi mumkin. Uning his-tuyg'ularini, qarashlarini va ko'zlarini – faqat nazariy mashg'ulotlarda, trenajyor zalida va maydonda doimiy ravishda birga bo'ladigan murabbiygina his qila oladi. Faqat ugina tushunadi. Masalan, tribunada o'tirgan yoki o'yinni televizor orqali tomosha qilayotgan odam buni hech qachon tushunmaydi, aslo tushunib yetmaydi. Menga hozir odamlarning ko'zlaridagi shijoat, ularning energiyasi kerak. Men yaxshi, ijobiy energiyaga ega bo'lgan, o'zini maydonda to'liq bag'ishlaydigan va o'z nonini oqlashni xohlayotganini ko'rib turganim – ana shunday insonlar bilan ishlayman. Men har bir futbolchiga imkoniyat beryapman. Ortiqcha gapirmoqchi emasman, nolimoqchi ham emasman. Maydonda jonini berib o'ynashni xohlaydigan, klub g'oyasi, natija va o'zaro munosabatlar uchun qayg'uradigan odamlargina maydonga tushadi. Men hammaga etarlicha vaqt berdim. Hech kimni yalinib, ko'ndirish niyatim yo'q. Shuning uchun, o'zim sinovdan o'tgan deb hisoblagan futbolchilarimga ishonch bildiraman.
Murabbiylik hayoti shunday. Buni faqatgina jamoani shug'ullantiradigan inson tushunadi. Buni hatto futbolchilar ham tushunishmaydi. Men futbolchilarga ham shunday deganman: agar futbolchi ko'p gapirishni boshlasa, tamom, "aufviderzeyn", xayr! Bu qonun. Mening davrimda ham shunday edi: agar futbolchi murabbiyga aql o'rgatishni, ko'p gapirishni boshlasa yoki murabbiyning aytganlarini bajarmasa, u bilan xayrlashishardi. Biroq menda bunday sharoitlar yo'q.
Berdiev shunday derdi: "Men bir marta aytaman – agar bajarmasa, xayr". Lekin bu Berdievning darajasi. Meni ham xuddi shunday o'qitishgan. Bolalar murabbiyim nima desa, kattalar murabbiyim nima desa, men o'shani bajarardim. Men mana shu qoidalarga amal qilaman.
Teglar: andrey, shipilov, futbolchi, gapirishni, boshladimi, tamom, xayr!, menga, nonini, oqlashni, xohlaydiganlar, kerak,
← OldingaOrqaga →

Bosh sahifaga
660
9 Noyabr 2026, 12:35