Bekzod Mamatqulov: “Maqsadimiz - Osiyoda birinchi bo'lish”

2026-11-09 19:06:01 / Kiritdi: BestMaster  O'qilgan: 4658

Bugun O'zbekiston futzal federatsiyasi anjumanlar zalida O'zbekiston milliy terma jamoasining yangi bosh murabbiyi Bahodir Ahmedovni keng jamoatchilikka tanishtirish marosimi hamda matbuot anjumani bo'lib o'tdi.

Tadbirda O'zbekiston futzal federatsiyasi prezidenti Bekzod Mamatqulov ishtirok etdi.

“Bahodir Yo'ldoshboevichga ortiqcha tarif berishning hojati yo'q. U futbolchi sifatida ko'p karra mamlakat chempioni va sovrindori, O'zbekiston kubogi sohibi, Osiyo kubogi vice-chempioni hamda bronza medali sovrindori bo'lgan. Murabbiy sifatida esa milliy terma jamoamizni qita miqyosidagi musobaqalarda ikki marta shohsupaga olib borgan, Jahon chempionatida jamoamizni tarixda ilk bor pley-off bosqichiga olib chiqqan mutaxassisdir.Qolaversa, u milliy terma jamoada faoliyat yuritgan barcha xorijlik mutaxassislar bilan yonma-yon, elkama-elka ishlab, katta tajriba to'plagan. Shunday ekan, Bahodir Ahmedov bilan oldimizga ikkilanmasdan ulkan maqsad va vazifalarni qo'ymoqdamiz. Yaqin istiqboldagi maqsadimiz Osiyo Kubogini qo'lga kiritish, jahon chempionatiga yo'llanma olishdir.O'zbekiston futzal federatsiyasi o'zining strategik yo'lini belgilab olgan va o'z maqsadi yo'lida doimo oldinga intiladi, yuksak marralar sari harakatni davom ettiradi”, – dedi Bekzod Mamatqulov.

Matbuot anjumanida OAV vakillari O'FF rahbari hamda milliy terma jamoa Bosh murabbiyiga o'zlarini qiziqtirgan savollar bilan murojaat qilib, ularga atroflicha javob olishdi.

Jurnalistlar nafaqat milliy terma jamoaning kelgusi rejalari, balki mamlakat milliy chempionatini rivojlantirish, futzali taraqqiy etgan xorijiy mamlakatlar bilan hamkorlik aloqalarini kengaytirish, jahonning yetakchi terma jamoalari bilan istiqbolli o'rtoqlik uchrashuvlarini tashkil etish, terma jamoaga iqtidorli yoshlarni tayyorlash hamda mamlakat futzalining istiqboli va yaqin kelajakdagi ustuvor vazifalar yuzasidan ham batafsil ma'lumotlarga ega bo'lishdi.

Teglar: bekzod, mamatqulov, “maqsadimiz, osiyoda, birinchi, bolish”,
← OldingaOrqaga →