Argentinada 18 yoshli futbolchi uchrashuv paytida boshiga to'p tegishi oqibatida vafot etdi
/ Kiritdi: BestMaster O'qilgan: 9630
18 yoshli argentinalik futbolchi Abel Nunes o'yin vaqtida yuz bergan baxtsiz hodisadan keyin shifoxonada vafot etdi.
TyC Sports xabariga ko'ra, noxush voqea payshanba kuni AFA Juveniles C turniri doirasidagi "Eseysa" va "Deportivo Munis" yoshlar jamoalari o'rtasidagi bellashuvda sodir bo'lgan. Nunesning boshiga to'p kelib tekkan - "Eseysa" o'yinchisiga voqea joyida tibbiy yordam ko'rsatilgan, shundan so'ng uni shifoxonaga yotqizishga to'g'ri kelgan. Yakunda uchrashuv to'xtatilgan.
Shifoxonada futbolchi jarrohlik amaliyotini boshdan kechirdi, biroq uning ahvoli yaxshilanmadi. Yakshanba kuni "Eseysa" Nunesning vafot etganini ma'lum qildi.
"Bu klubimiz shu paytgacha e'lon qilgan eng og'ir xabardir. Chuqur qayg'u va cheksiz iztirob bilan butun hayoti oldinda bo'lgan, bugun esa bizni tushuntirib bo'lmas bo'shliq bilan qoldirgan yosh yigit bilan xayrlashmoqdamiz. O'yin paytida og'ir zarba olganidan so'ng, libosimizni g'urur bilan kiygan yigitning bevaqt o'limidan chuqur afsusdamiz.
Bugun futbol ikkinchi darajaga tushdi. Biz oilamizning bir qismi bo'lgan, orzu va intilishlarga to'la jamoadoshimiz bilan alam bilan vidolashmoqdamiz. 'Eseysa' nomidan ushbu og'ir damlarda uning oilasi, do'stlari, jamoadoshlari va yaqinlariga chuqur hamdardlik va dalda izhor etamiz. Joying jannatda bo'lsin. Sen hamisha oilamizning bir bo'lagi bo'lib qolasan", - deyiladi klub bayonotida.
Teglar: argentinada, yoshli, futbolchi, uchrashuv, paytida, boshiga, tegishi, oqibatida, vafot, etdi,
← OldingaOrqaga →

Bosh sahifaga
738