Simone Inzagi: "Neftchi" "Al-Ittihod" va "Al-Nassr"ga qarshi o'yinlarda yaxshiroq natijaga loyiq edi"
/ Kiritdi: BestMaster O'qilgan: 1032
OCHL Elit ligasi 5-turidan o'rin olgan "Neftchi" - "Al-Hilol" o'yinidan oldingi matbuot anjmunida mehmonlar bosh murabbiyi Simone Inzagi va yarim himoyachi Muhammad Kanno ishtirok etdi.
Simone Inzagi: Ertangi bahsning nechog'lik muhim ekanini juda yaxshi anglab turibmiz. Raqib jamoa o'yinini atroflicha o'rganib chiqdik – "Neftchi" ancha shakllangan va kuchli jamoa. Ular "Al-Ittihod" hamda "Al-Nassr"ga qarshi ikkita yuqori saviyali uchrashuv o'tkazdilar; garchi mag'lubiyatga uchragan bo'lsalar-da, mazkur bahslarda bundan yaxshiroq natijaga loyiq edilar. Shu bois ertangi o'yinga nihoyatda puxta hozirlik ko'rdik.
Muhammad Kanno: Uchrashuvga imkon qadar mukammal darajada tayyorgarlik ko'rdik. Ertangi raqibimiz oson jamoa emas – ularning avvalgi o'yinlarini kuzatib, ancha murakkab va kuchli raqib ekaniga amin bo'ldik. Shu sababli raqibga munosib hurmat bilan yondashib, ushbu bahsda zimmamizdagi mas'uliyatni to'liq his etgan holda harakat qilishimiz lozim. "Al-Hilol" klubi nomi va maqomiga yarasha o'yin namoyish etamiz.
O'tgan yili Siz boshchiligingizdagi "Al-Hilol" Qarshi shahriga tashrif buyurgan, o'shanda "Nasaf" munosib qarshilik ko'rsatib, ikki bor hisobni tenglashtirgan edi. Uchrashuvdan so'ng "Nasaf"ning o'yin uslubini yuqori baholagan edingiz. Jamoangizning bugungi holatidan kelib chiqqan holda, ertangi o'yinda optimal tarkibni maydonga tushirasizmi yoki ichki chempionat bahslariga e'tibor qaratish maqsadida rotaciyani qo'llaysizmi?
Simone Inzagi: O'zbekiston futbolida doimo kuchli va raqobatbardosh jamoalar shakllanib kelishini yaxshi bilamiz. O'tgan yili bu yerda 3:2 hisobida g'alaba qozongan murakkab uchrashuvimiz buning yaqqol isbotidir. O'zbekiston milliy terma jamoasi ham do'stim Fabio Kannavaro boshchiligida izchil o'sishga erishmoqda. Joriy mavsumda Chempionlar ligasida ishtirok etayotgan ikki klub – "Neftchi" ham, "Paxtakor" ham munosib o'yin namoyish etmoqda. Shu nuqtayi nazardan, ertaga bizni ancha murakkab bahs kutib turibdi va unga to'g'ri ruhiy tayyorgarlik hamda jiddiy munosabat bilan yondashishimiz talab etiladi. Eng muhim omil aynan shudir.
Savolning ikkinchi qismi yuzasidan: avvalgi uchrashuvga nisbatan ertangi bahsda asosiy tarkibda o'zgarishlar bo'lishi kutilmoqdami?
Simone Inzagi: Bu borada bugungi mashg'ulot natijalarini ham inobatga olishim zarur. Milliy terma jamoalar ixtiyoridan ayrim muammolar bilan qaytgan futbolchilarimiz bor – xususan, Riyodda qolgan Mahzariy va Mandashni nazarda tutyapman. Bugungi mashg'ulotdan so'ng vaziyatni sinchkovlik bilan tahlil qilamiz, ertaga esa murabbiylar shtabi bilan maslahatlashgan holda uchrashuvni ilk daqiqalardan boshlaydigan tarkibni belgilaymiz.
Jamoa 20 kundan ortiq vaqt davomida rasmiy va nazorat uchrashuvlarisiz tanaffusda bo'ldi. O'yin amaliyotidagi ushbu tanaffus ertangi bahs oldidan jamoaga ijobiy ta’sir ko'rsatadimi yoki salbiy?
Safimizdagi ko'plab futbolchilar – ham mahalliy, ham xorijlik o'yinchilar milliy terma jamoalar yig'iniga jalb etilib, muntazam o'yin amaliyotiga ega bo'ldilar. Baxtimizga, terma jamoalar safida ikkitadan yuqori shiddatli uchrashuv o'tkazgan futbolchilarimiz ko'pchilikni tashkil etadi. Aynan shu jihatni inobatga olgan holda, ertangi bahsni kimlar asosiy tarkibda boshlashini va kimlar, odatdagidek, zaxiradan o'yinga qo'shilishini puxta baholab chiqishim lozim.
Savolim futbolchi Muhammad Kannoga. Yaqinda Doha shahrida O'zbekiston milliy terma jamoasiga qarshi maydonga tushdingiz. "Neftchi" o'yinini tahlil qilish jarayonida O'zbekiston terma jamoasi bilan ushbu klub o'rtasida qanday o'xshashliklarni kuzatdingiz?
Muhammad Kanno: Avval takidlaganimdek, terma jamoa sifatida ham, klub darajasida ham raqib oson emas – "Neftchi" munosib va sifatli jamoalar sirasiga kiradi. Biroq klub taktikasi milliy terma jamoa taktikasidan tubdan farq qiladi. O'sha uchrashuvdagi chetlatish bizga sezilarli bosim yuklab, o'yin jarayonini murakkablashtirdi. Shunga qaramay, inshoalloh, ertaga bosh murabbiy belgilab bergan taktik ko'rsatmalar asosida uchrashuvga to'liq tayyor bo'lamiz va o'zimizga munosib saviyadagi o'yinni namoyish etamiz.
Faoliyatingizning asosiy qismini Yevropada o'tkazgansiz. Yevropa Chempionlar ligasida yetakchi va nisbatan kuchsizroq jamoalar o'rtasidagi tafovut yaqqol sezilib turadi. Biroq Osiyodagi faoliyatingiz davomida – o'tgan yili Qarshida, bu yil esa Farg'onada, shuningdek, avvalgi mavsumlarda ham "Al-Hilol" va boshqa Saudiya klublari tarkib salohiyati jihatidan sezilarli ustunlikka ega bo'lishiga qaramay, O'zbekiston klublariga qarshi safar uchrashuvlarida doimo jiddiy qiyinchiliklarga duch kelgan. Saudiya Arabistonida o'tkazilgan bahslarda yirik hisobda g'alaba qozonish mumkin bo'lsa-da, Toshkent yoki Farg'onadagi safar o'yinlarida ko'p bor ochko yo'qotilgan. Osiyodagi ikki yillik tajribangizdan kelib chiqib, buning asosiy sababi nimada deb hisoblaysiz – bu safar mashaqqati bilan bog'liqmi?
Simone Inzagi: Shubhasiz, Yevropada ham, Osiyoda ham o'z maydoningda to'p surish har qanday jamoa uchun ancha qulay. Shu bilan birga, Osiyo futbolining umumiy saviyasi ham yuqori ekanini alohida qayd etish joiz. Shaxsan men Saudiya Arabistoni chempionati hamda Osiyo Chempionlar ligasi nihoyatda yuqori darajada ekaniga guvoh bo'ldim. Bu yerda ham, xuddi Yevropadagi kabi, g'alaba qozonish hech qachon oson kechmaydi, zero raqobatbardosh jamoalar juda ko'p. Avval takidlaganimdek, safar uchrashuvlari o'z maydonidagi bahslarga nisbatan doimo murakkabroq o'tadi.
Saudiya klublari uchun aynan safar o'yinlari bu qadar qiyin kechishining asosiy sababi nimada?
Buning omillari bir nechta bo'lishi mumkin. Asosiy sabablardan biri shundaki – agar Saudiya klublari, xususan, o'zimning "Al-Hilol" jamoam misolida gapiradigan bo'lsam – bizning nihoyatda ko'p sonli va sodiq muxlislarimiz bor. "Al-Hilol"ning ajoyib ishqibozlari o'z maydonimizdagi uchrashuvlarda jamoaga beqiyos ruhiy madad va kuchli qo'llab-quvvatlash beradilar.
Savolim milliy terma jamoa bilan bog'liq. Ma'lumki, "Al-Hilol"ning sakkiz nafar futbolchisi FIFA kunlari doirasidagi terma jamoa yig'iniga jalb etildi; ular klub safida jahon darajasidagi yulduzlar va legionerlar bilan yonma-yon to'p suradilar. Shunga qaramay, milliy chempionati yulduz futbolchilar soni bilan maqtana olmaydigan O'zbekiston terma jamoasi Saudiya Arabistoni terma jamoasi ustidan g'alaba qozondi. Garchi birgina uchrashuv orqali yakuniy xulosa chiqarish mushkul bo'lsa-da, umuman olganda, mashhur legionerlar bilan birga o'ynash mahalliy futbolchilar hamda milliy terma jamoa taraqqiyotiga qanchalik samarali ta’sir ko'rsatmoqda?
Simone Inzagi: Menga tegishli qarorlarning barchasi har bir uchrashuvga alohida yondashgan holda qabul qilinadi. Ertaga O'zbekistonda uchrashuvimiz bor va ayni damda biz uchun eng muhim bahs aynan shudir. Shu bois vaziyatni sinchkovlik bilan baholayman, milliy terma jamoalar safidan qaytgan futbolchilarning jismoniy holati va charchoq darajasini ko'zdan kechiraman, so'ngra eng maqbul tarkib yuzasidan qaror qabul qilaman. Barcha tanlovlar o'yindan o'yinga qarab amalga oshiriladi.
Teglar: simone, inzagi, neftchi, al-ittihod, al-nassrga, qarshi, oyinlarda, yaxshiroq, natijaga, loyiq,
← OldingaOrqaga →

Bosh sahifaga
411