Ivan Boshkovich: "Agar bor kuchingizni maydonda qoldirsangiz, futbol sizdan qarzdor bo'lib qolmaydi"
/ Kiritdi: BestMaster O'qilgan: 3026
Superliganing 28-turidan o'rin olgan "Dinamo" – "Bunyodkor" (0:1) o'yinidan so'ng mehmonlar bosh murabbiyi Ivan Boshkovich matbuot anjumanida ishtirok etdi.
– O'yin haqida...– Juda murakkab uchrashuv bo'ldi. Biz qiyin va og'ir o'yin kutgan edik, ayniqsa psixologik jihatdan bahs juda og'ir kechdi. Hamma bu uchrashuv qanchalik muhim ekanini yaxshi anglab turgandi; men hatto buni o'zimiz uchun deyarli finalga tenglashtirdim: g'alaba qozongan taqdirda, o'tish o'yinlaridan qutulib qolish imkoniyatini saqlab qolar edik. Kuchli ishtiyoq evaziga maqsadimizga erishdik, barcha g'alabaga ishondi. O'ylaymanki, avvalgi bazi o'yinlarda yaxshiroq harakat qilganmiz, ammo natijaga erisha olmaganmiz – futbol shunaqa. Agar bor kuchingizni maydonda qoldirsangiz, futbol sizdan qarzdor bo'lib qolmaydi. Buni yigitlarga doimo takrorlab kelganman. Ularga barakalla – oxirigacha o'ynashdi va kurashishdi. Fikrimcha, raqib ham juda yaxshi o'yin namoyish etdi, biroq biz o'z vaziyatimizni kutdik va o'sha lahza keldi. Maydonda bir nechta bahsli vaziyatlar yuzaga keldi, lekin bunga ham munosib edik, deb o'ylayman: bugun omad biz tomonda bo'ldi. Endi oldinga intilib, keyingi bahsga tayyorgarlik ko'ramiz. Hozircha xavolanib ketishga haqqimiz yo'q, chunki 22-sanada bizni "Andijon"ga qarshi navbatdagi "final" kutib turibdi. Yigitlar bu vazifani ham uddalab, g'alaba qozona olishlariga ishonaman.– Gol muallifi Abdunabiev zaxiradan maydonga tushishidan avval u bilan ancha uzoq suhbatlashdingiz. Unga biror aniq ko'rsatma berdingizmi yoki zarba shunchaki o'xshab qoldimi? Balki raqibning himoyasida yoki maydon markazida qandaydir muammolarni payqagandirsiz?– Biz zaxiradan maydonga tushadigan futbolchilarga doimo umid bog'laymiz. Bundan avval ham zaxiradan o'yinga qo'shilgan o'yinchilar jamoaga yordam berib, gol urishgan. U avvalroq "Paxtakor"ga qarshi uchrashuvda ham gol urib, jamoaga yordam bergan edi. Afsuski, o'sha bahsda g'alaba qozona olmagandik, ammo bugun bu yana o'z samarasini berdi. O'ylaymanki, tajribaliroq futbolchi sifatida u mas'uliyatni o'z zimmasiga olishi lozim va men undan shuni kutgan edim. Unda biz foydalanib qolgan kuchli jihatlar bor: raqib himoya ortida katta bo'sh hududlar qoldirayotgandi, u esa tezkor va zarbasi kuchli futbolchi. Aynan shu sababli uni maydonga tushirdik. U o'z vazifasini to'liq bajarib, jamoaga uch ochkoni qo'lga kiritishda yordam berdi. Gap faqat unda emas, balki maydonga tushgan barcha yigitlarda: ular o'yinga tetiklik olib kirishdi va natijani saqlab qolish yoki raqibni yana bir bor jazolash uchun zarur bo'lgan energiya darajasini o'yin oxirigacha ushlab turishdi. 1:0 hisobi – bugungi eng muhim natija, yani g'alaba. Umid qilamanki, endi faqat oldinga harakatlanamiz.– Ehtimol, barchani qiziqtirayotgan birinchi savol: sun'iy ofsaydni mashq qilishga qancha vaqt ajratasiz?– Murabbiy sifatida o'zim bu jihat ustida alohida ishlaganim yo'q. Biz futbolchilarga doimo taktik jihatlarni tushuntirishga harakat qilamiz – raqibga himoya ortiga uzatmalar berish imkonini bermaslik va qaytgan to'plarda doimo tayyor turish lozim. Biroq buning uchun vaqt talab etiladi. Sun'iy ofsayd – juda tavakkalchilikka asoslangan taktika, shu bois O'zbekiston chempionatida hatto yuqori darajada ham undan foydalanadigan jamoalar kam, deb o'ylayman. Buni qo'llash uchun vaqt hamda uzoq vaqt birga to'p surgan futbolchilar kerak.– Bu savolni berishimga sabab – ofsayd tufayli uchta gol bekor qilindi, umuman olganda ham o'yin davomida ofsayd holatlari juda ko'p qayd etildi.– O'yin shunday kechdi. Bizning ham bir golimiz bekor qilindi – raqibda bo'lgani kabi u yerda ham juda kichik ofsayd bor edi, deb o'ylayman. Bizda bahs davomidayoq vaziyatlarni tezkorlik bilan qayta ko'rib chiqish imkonini beradigan texnologiyalar yo'q, ammo voqealar aynan shunday rivojlandi.
– Avvaldan chuqurroq himoyalanib o'ynash bo'yicha ko'rsatma berilganmidi yoki butun uchrashuv shunday o'tishini avvalboshdan tushunib turganmidingiz?– Bilasizmi, biz doimo yuqoriroqda – raqib maydonida o'ynashga va to'pni oldingi chiziqdayoq olib qo'yishga intilamiz. Biroq raqib ham futbol o'ynaydi va ular bunga yo'l qo'yishmadi: raqib to'pni juda yaxshi nazorat qildi va harakatlantirdi. Bu – texnikasi yuqori jamoa. Bundan tashqari, natijaning muhimligi futbolchilarimizga ruhiy jihatdan bilvosita ta’sir ko'rsatdi. Shu bois orqaroqqa chekinishga majbur bo'ldik, ammo yigitlar bu vazifani ham uddalashdi, deb hisoblayman: bizda qarshi hujumlar uchun ko'plab qulay vaziyatlar yuzaga keldi. Biz raqib hujumlarini yuqorida buzishga harakat qildik, biroq raqibda bizdagi kabi natija bosimi yo'q edi, shu sababli ular erkin holda o'z futbolini namoyish etishdi. Shunga qaramay, bugun ular samarali o'yin ko'rsata olishmadi. Men "Dinamo"ni yaxshi o'yin bilan yana bir bor etirof etmoqchiman – ular juda munosib harakat qilishdi.– "Dinamo" himoyasidagi ko'plab xatolarni inobatga olganda, hujumchilaringiz qarshi hujumlarda bir qator vaziyatlardan foydalana olmaganday tuyulmadimi?– Bu yerda gap aynan to'p bilan muomala qilish sifati haqida bormoqda. Biz "Dinamo" tarkibida kuchli futbolchilar borligini bilardik. Albatta, raqib juda yuqorida o'ynab, ortida bo'sh hudud qoldirganida, bizda ham ushbu hududlardan foydalana oladigan sifatli va texnik o'yinchilar mavjud. Keng maydonda ikkiga bir, uchga ikki – yani son jihatidan ustunlik – yoki birga bir vaziyatlar yuzaga kelganda, hatto eng yuqori darajadagi markaziy himoyachilarga ham bunday holatlarni bartaraf etish juda qiyin bo'ladi. Biroq fikringizga qo'shilaman – men doimo bundan ham ko'prog'ini kutaman. Hatto "Neftchi" va "Xorazm"ga qarshi bahslarda ham shunday vaziyatlar ko'p bo'lgan, ammo futbolchilarimiz ulardan maksimal darajada foydalana olishmagan edi.– Raqib o'yinini maqtadingiz, o'z jamoangiz harakatlarini qanday baholaysiz? Shogirdlaringizning o'yini sizga maqul keldimi?– Yana takrorlayman: bazan aynan shunday – ishtiyoq va xarakter evaziga o'ynashga to'g'ri keladi. Bugun nima sababdan orqaroqda harakatlanganimiz va barcha ichki muammolarimizni hozir oshkor eta olmayman, ammo ko'p narsa raqib darajasiga ham bog'liq. Bizning nima istashimiz – bir masala, raqibning nimaga yo'l qo'yib berishi esa – boshqa masala. Bugun raqib bizga o'zimiz rejalashtirgan futbolni ko'rsatishga imkon bermadi. Shunga qaramay, yaxshi jamoa turli uslublarda o'ynay olishi kerak. Aynan shuning uchun natijaning muhimligi futbolchilar harakatiga bilvosita ta’sir qilganini takidlayapman. Lekin men, shubhasiz, mamnunman: futbolchilar jangovar, xarakterli, tezkor va qarshi hujumlarga asoslangan futbol o'ynay olishlarini ham isbotlashdi va bu o'z natijasini berdi.
Teglar: boshkovich, agar, kuchingizni, maydonda, qoldirsangiz, futbol, sizdan, qarzdor, bolib, qolmaydi,
← OldingaOrqaga →

Bosh sahifaga
412