Kutilganidek, Braziliya terma jamoasi oltin medallarga ega chiqdi hamda o'z tarixida 7-bor chempionlikni qo'lga kiritdi.
10 may kungi yarim final uchrashuvlarida quyidagi natijalar qayd etildi:
Belarus - Senegal 5:2
Portugaliya - Braziliya 2:4
Senegal terma jamoasi ushbu mundialning kashfiyot jamoasi bo'lgani haqida aytib o'tgandik. Afrikaliklar yarim finalga qadar kelib chinakam shov-shuv ko'rsatishdi. Biroq finalga bir qadam qolganida Belarus terma jamoasi ularni 5:2 hisobida mag'lub etdi. Yarim finalning ikkinchi o'yinida Braziliya Portugaliyaga qarshi bahs olib borib, qiyinchiliksiz 4:2 hisobida zafar quchdi va ikkinchi finalchiga aylandi.
Kecha esa musobaqaning 3-o'rin uchun bahsi hamda hal qiluvchi final uchrashuvi o'tkazildi. Uchinchi o'rin uchun kechgan o'yinda Portugaliya Senegalni 3:2 hisobida mag'lub etib, bronza medallarni qo'lga kiritgan bo'lsa, final o'yinida Braziliya Belarusni 4:3 hsobida engib bosh sovringa ega chiqdi.
Musobaqa yakunida eng yaxshilar FIFA tomonidan taqdirlandi:
Oltin to'p - Rodrigo (Braziliya)
Kumush to'p - Ihar Brishtel (Belarus)
Bronza to'p - Be Martins (Portugaliya)
Oltin to'purar - Ihar Brishtel, 11 gol (Belarus)
Kumush to'purar - Andre Lourenso, 8 gol (Portugaliya)
Bronza to'purar - Rodrigo, 7 gol (Braziliya)
Oltin qo'lqop - Mixail Avgustov (Belarus)
Feyr pley sovrini - Yaponiya terma jamoasi
Malumot: Plyaj futboli bo'yicha Jahon chepmpionatida 32ta o'yin o'tkazilib, darvozalarga jami 288ta to'p kiritildi.
Iqtibos: "Men juda xursandman, hissiyotlarim ham bir olam. Bolaligimdan chempion bo'lishni orzu qilardim. Hisob 3:3 bo'lganidan keyin biroz xavotirga tushdik, lekin g'alaba qozondik. Jamoadoshim Rodrigoga gap yo'q. U dunyoning eng zo'r o'yinchisi". (Tanger, Braziliya terma jamoasi futbolchisi).
Iqtibos: "Biz Braziliyani mag'lub etishni xohlagandik, ammo buning uddasidan chiqa olmadik. Lekin ikkinchi o'rinni bo'lsa ham qo'lga kiritganimizdan xursandman. Bu tarixiy natija. Bu Belarus futboli uchun juda katta yutuq". (Ihar Brishtel, Belarus terma jamoasi futbolchisi)
Iqtibos: "Sport shunaqa, mag'lublarni kechirmaydi. Himoyaga qattiq urg'u berganimiz bilan gollar o'tkazdik. Men Portugaliyani uchinchi o'rinni qo'lga kiritgani bilan tabriklayman. Ular buyuk jamoa". (Oumar Silla, Senegal terma jamoasi bosh murabbiyi)
Iqtibos: "Biz bu erga chempion bo'lish maqsadida kelgandik. Kubokni ko'tarishni har doimgidan ko'proq xohlagandik. Yakunda esa uchinchi bo'ldik. Hali yana qaytamiz va baribir chempion bo'lamiz". (Be Martins, Portugaliya terma jamoasi futbolchisi)
X.Xoliqov.
Bosh sahifaga
195
