Sloveniyalik "Arsenal"dan ko'p narsa kutyapti
Arteta "Leypcig" hujumchisining o'yiniga befarq emasligini anchadan buyon ochiq aytib keladi. Londondagi sartaroshlar ham shaharga Sheshko kelishi ehtimoli yuqoriligini yaxshi bilishadi. Benyamin tanish "barberga" muzokaralar haqida aytib qo'ydi, u esa buni sir tutishni istamadi va o'zining tanishlariga malum qildi. Qator manbalar chindan ham muzokaralar ketayotgani haqida xabar bermoqda. Sheshko "Arsenal"ning ijtimoiy tarmoqlardagi sahifalariga obuna bo'ldi, bu esa odatda transfer masalasi hal degani. Biroq hozircha yakuniy kelishuv haqida malumot yo'q.
Yigirma ikki yoshli hujumchi "Arsenal"ni bolalikdagi orzusi deb bilmaydi, shuning uchun kafolatlar istamoqda. Kelishuvga u tovon puli bo'yicha band qo'shilishini talab qilmoqda. Ingliz klublari odatda bunday yo'ldan ketishmaydi, ispanlar esa iqtidorli futbolchisining tovon pulini bir milliard evro qilib belgilab qo'yadi va qarabsizki, shartnomada tovon puli bor, ammo agar klub futbolchi bilan xayrlashishni istamasa, undan aytarli naf yo'q. "Barselona" bir marta Neymarning otasi tomonidan uyushtirilgan hiylasiga uchib, 222 mln evroni hech kim to'lay olmasligiga ishonib, pand egandi. O'shanda PSJ nafaqat iqtidorli braziliyalik futbolchini, balki istalgan raqib himoyasini yorib o'tayotgan "Barselona" triosini "yo'q qilgandi". Neymarning oilasi esa chamasi, avvaldan shunga yaqinroq reja bilan harakat qilgan.
Sheshko "Arsenal"da omadli o'yin ko'rsatib, Benyaminni "Real", "Bavariya" va "Barselona" singari katta klublar chaqirsa, chiqish eshigi bo'lishini istamoqda. Bir necha yildan keyin Levandovski va Keyn istamasa ham nafaqaga yo'l oladi. Sheshko APLdan keyin balki ularning o'rnini egallashi mumkinligini tushunib turibdi. Hozirning o'zida esa u qanchalik iqtidorli bo'lmasin, Myunxen va Barselonada joy yo'q, shunday ekan "Arsenal" variantiga murojaat qilamiz. "Kanonirlar" Benyamin sodda, yosh yigitcha emasligini tushunib bo'ldi, futbolchi yaxshigina maosh so'ragan. Qizig'i, Arteta parallel ravishda Gyokeresh bo'yicha hisobotlarni o'rganib chiqmoqda.
Murabbiylar sloveniyalik va shveciyalik turli tipdagi o'yinchiligini takidlashmoqda. "Sporting" Portugaliya chempionatida ko'pincha birinchi raqam bo'lib harakat qilib, to'p bilan muomalada bo'lishiga qaramay, Viktor ko'pincha ofsayd chizig'ida o'ynaydi. Arteta "Arsenali" esa raqibni chalg'itib, himoya chizig'i bo'shashib, xotirjamlikka berilganda kutilmagan zarba berishni xush ko'radi. Hujumchi nozik harakatlar qila olsa va to'p bilan muomalada muammoga duch kelmasa, ayniqsa, to'pni nazorat qilish foydali bo'ladi. Gyokeresh kuchiga ko'proq tayanadi, Sheshko esa ko'proq yakkakurashga kirmay, raqibdan qochishni maqul ko'radi. Aytish mumkinki, Benyamin tana tuzilishi va ishonchli harakatlariga qaramay, o'zini nozik futbolda yaxshiroq his qiladi.
Maydonda Edegor, Rays va Saka uchun Sheshko dengizdagi mayoq vazifasini bajaradi
Osonlikcha fikridan qaytmaydigan Arteta hujumchilar masalasida Berta kabi sport direktoriga ega bo'ldi. Hozircha "Arsenal" faqatgina golkiper Kepa bilan kelishuvga erishdi, ispaniyalik darvozabon tibbiy ko'rikdan muvaffaqiyatli o'tishga ham ulgurdi. Endi jamoada darvozabonlar kollekciyasi bor, lekin bitta ham sof "to'qqizinchi raqam" yo'q. Berta avvalroq "Atletiko"da ishlagan va chinakam zo'r forvardlarni topishni biladi. "Arsenal" "Manchester Siti"dan Alvaresni ololmasdi, sababi argentinalik APLda "shaharliklar" raqiblari safida to'p tepishni istamadi.
Hozir Xulian Madridda o'zini yaxshi ko'rsata olgach, "Liverpul" va boshqa top klublar etiborini o'ziga qaratgan. Sheshko ham anchadan buyon shu kabi ro'yxatlarda qayd etiladi, lekin Benyamin ancha vaqt sovrinsiz jamoalar bilan muzokara o'tkazishni va ular bilan yo'llari kesishishini istamadi. O'tgan mavsum sloveniyalik uchun ayniqsa sinovli bo'ldi, "Leypcig" uchun ham qiyin kechgan mavsumda Bundesliga doirasida hujumchi 13 ta gol urdi. Bu qishda "Manchester Siti"ga ko'chib o'tgan Marmushdan 2 taga kam. Bo'ydor Sheshko "Red Bull" hujumida Openda va Simons bilan uchlikda harakat qildi.
Sloveniyalik ko'plab yurtdoshlari kabi basketbol muxlisi. Deyarli ikki metr bo'yli hujumchi ancha baland sakray olishi bilan ham etiboga tushgan. Kim biladi deysiz, balki zamonaviy futbolchilardan faqatgina Ronaldu undan balandroq sakray olar. Shunga qaramay, Benyamin doim ham faqatgina jarima maydonchasida havodan uzatilgan to'plarni kutmaydi. Artetani shu bilan birga Sheshkoning himoyaviy harakatlarda ishtirok etishni istamasligi o'ylantirmoqda. "Real"ning yangi bosh murabbiyi Xabi Alonso uning jamoasida hamma, hattoki Vinisius va Mbappe kabi super yulduzlar ham pressingda qatnashishi shartligini yuz marta takrorlab ulgurdi.
"Arsenal" ham ancha yuqori himoyalanadi, Arteta Sheshko maydonda shunchaki to'pni kutishiga jim qarab turmasligi aniq. "To'qqizlik" sotib olish fikri eskirib ham ulgurdi desak, mubolag'a bo'lmas. Biroq Sheshko varianti omadli chiqishi mumkin, ayniqsa, agarda sloveniyalik APL to'lqiniga tushib ololsa va ajoyib statistika ko'rsatsa. O'tgan mavsum hujum chizig'i vakillari jarohatidan keyin "Arsenal" bu nuqtada Merinoni o'ynatdi. Edegor, Rays va Saka oldinda markaziy forvard rolida Sheshko bo'lsa, assistlari sonini oshirishi ancha osonlashadi.
Artetaning ikkilanishi jamoani chempionlikdan uzoqlashtirmoqda
Oxirgi yillarni umumiy olsak, "Arsenal" Slotning "Liverpuli"dan yomon ko'rinmayapti. PSJga qarshi Arteta shogirdlari "qizillar"dan yomon o'ynamadi. Chempionlar Ligasining bo'lajak g'olibiga qarshi imtihondan muvaffaqiyatli o'ta oldi. Bundan tashqari "Arsenal" "Real"ni musobaqadan chiqarib yubordi. Pley-offda buni kuchsiz jamoalar amalga oshira olmaydi. Himoyadagi o'yin tartibga solingandek, faqatgina markaziy hujumchi etishmayapti. Arteta esa hamon xato qilishdan qo'rqmoqda. Jamoa Sheshko bilan shartnoma tuzsa-yu, APLda liganing boshqa "mehmoni" Gyokeresh gollar urishni boshlasa-chi?
Viktor "Manchester Yunayted" va "Arsenal"dan oxirgi qadamni kutmoqda. Sheshko "kanonirlar" tomonidan qiziqish anchadan buyon borligini yaxshi biladi, lekin "Leypcig" narxni tushirmoqchi emas. Nemislar hujumchi transferidan 80 million evro ishlab olmoqchi. Bunday narxga APLga turli forvardlar kelgan. Londonliklar o'zining Darvin Nunesini "topishni istamayapti". Angliyadagilar "Liverpul" "Nyukasl" bilan Isaak bo'yicha og'ir o'tgan muzokaralardan keyin bor etiborini Gyokereshga qaratgani haqida aytishmoqda. Slotga ham yangi "to'qqizlik" kerak.
"Arsenal"ning oxirgi transferlarida hujum chizig'ini kuchaytiradigan futbolchi ko'rinmayapti, Sterling, Trossard va Martinelli esa Artetani APL qiroliga aylantira oladiganga o'xshamayapti. Sheshko esa Jezusdan kamida jismonan baquvvatroq. Braziliyalik ko'p jarohat oladi va hech qachon ikkinchi Aguero bo'la olmadi. Aynan shuning uchun Gvardiol Jezusni qo'yib yubordi va "Manchester Siti"ga Xolandni olib keldi. Xosepning Londondagi shogirdi shunga o'xshash yo'ldan ketadi chog'i. Arteta sovrin yutishi kerak, ularsiz amerikalik bossning "sabr kosasi" to'lishi aniq.
Tan olish zarur, Mikel sifatli jamoa qura oldi. Biroq agarda Parti ketib, Subimendi boshqa klubni tanlasa, tayanch zonada ham muammolar paydo bo'lishi mumkin. Shuningdek, "Barsa"ga orzu bo'lib qolgan Niko Uilyams varianti ham endi reallikdan ancha yiroq. APLda yaqqol favoritlar bor. Kuchlilar haqida gap ketganda Arteta Gvardiola va Slotdan yuqori turmaydi. "Arsenal" kuchli jamoaga aylana oldi, biroq keyingi darajaga ko'tarilish uchun Mikel nolishni bas qilib, chinakamiga kuchli transferlarni amalga oshirishi zarur. Artetaning ikkilanishi jamoani chempionlikdan uzoqlashtirmoqda, mana bir necha yildirki Londonda kuchli markaziy forvardni kutishmoqda.
Siz nima deb o'ylaysiz, "Arsenal"ga Gyokeresh kerakmi, yoki Sheshko?
TerminaTor tarjimasi
Bosh sahifaga
192
5 Iyul 2025, 17:03