«Real» klubining sobiq futbolchisi, hozirda «PSJ» sharafini himoya qilayotgan Xese Rodriges ijara asosida «Las-Palmas»ga o'tadigan bo'ldi. Bu haqda Marca nashri xabar tarqatdi.

Manbaga ko'ra, tomonlar yakuniy qarorga kelishdi. Faqat bu transferni rasmiylashtirish qoldi. Xesening «Las-Palmas»ga o'tishi mavsum yakuniga qadar rasmiylashtirilishi kutilmoqda.

«Las-Palmas» prezidenti Migel Anxel Ramiresning ta'kidlashicha, Xese ispan jamoasiga o'tish uchun hech qachon bunchalar yaqin kelmagan.

Xese «PSJ» bosh murabbiyi Unai Emerining ishonchini qozona olmadi. Frantsiya chempionatining 22ta turidan keyin yarim himoyachi 9ta o'yinda maydonga tushgan bo'lsa, ulardan bittasida bahsni asosiy tarkibda boshlagan. Xese bu o'yinlarda bitta gol urdi.