Dortmundning «Borussiya» klubi hujumchisi Per-Emerik Obameyang faoliyatini Xitoy klublaridan birida davom ettirish haqida o'ylamoqda.

Calciomercato tarqatgan xabarga ko'ra, Chin o'lkasining ikkita klubi gabonlik futbolchining xizmatlariga qiziqish bildirmoqda. Gap mamlakatning kuchli jamoalaridan biri «Guanjou Evergrand» va ushbu mavsum bronza medalini qo'lga kiritgan «Tyanjin Tsyuantszyan» haqida ketmoqda.

Har ikkala klub yanvar oyida futbolchini sotib olishga tayyor. Dortmundliklar rahbariyati futbolchiga nisbatan intizomiy jazo qo'llab, uni «Shtutgart»ga qarshi o'yindan chetlatgani uchun Obameyang ranjidi.

Yozda hujumchiga Angliyaning «Arsenal» va «Manchester Siti» jamoalari qiziqishgandi. Lekin Evropa klublari qishki transfer paytida uni sotib olishni rejalashtirishmayapti. Obameyang va «Borussiya» o'rtasidagi shartnoma 2020 yilga qadar tuzilgan.