Dortmundning «Borussiya» klubi yanvar oyida o'zining eng yaxshi hujumchisi bo'lmish Per-Emerik Obameyyangni sotishga tayyor, deb xabar bermoqda Bild nashri.

Nashr tarqatgan xabarga ko'ra, nemis klubi bunday ishni amalga oshirishga 28 yoshli futbolchining so'nggi kunlardagi o'zini tutishi sabab bo'lmoqda. «Borussiya» klubi futbolchi evaziga 60 million evro miqdorda narx belgilab qo'ygan va jamoa uning o'rniga futbolchi qidirishni boshlab yuborgan.

O'tgan hafta «Borussiya» jamoasi Bundesliga doirasida «Shtutgart»ga qarshi bahs yuritgan (1:2) va unda Obameyyang tarkibga kiritilmagan edi. Buning asosiy sababi etib futbolchining mashg'ulotlarga kechikishi ko'rilmoqda. Per 14:20da kelgan, mashg'ulotlar esa 14:00da boshlanishi rejalashtirilgan.

O'yinchi asosiy tarkibga Chempionlar Ligasi doirasida «Tottenxem» klubiga qarshi o'yinda qaytgan va bitta gol muallifi bo'ldi. Ushbu mavsum hujumchi Germaniya chempionatida 16 uchrashuvda maydonga tushib, 12ta gol va bitta golli uzatma amalga oshirgan.