Oliy liganing 5-turidan o'rin olgan «Navbahor» «Mash'al» uchrashuvidan so'ng mezbonlar bosh murabbiyi Ilhom Mo'minjonov o'z fikrlari bilan o'rtoqlashdi.
«Futbolchilarimiz bilan faxrlanaman. Ularga ko'rsatgan o'yinlari va qo'lga kiritilgan g'alaba uchun rahmat aytaman. Ular bor kuchlari va mahoratlarini ishga solishdi. Jamoadagi barcha futbolchilar «Navbahor»ni g'alabasi uchun bor kuchlarini berishga tayyor. Keyingi turlarni ham yuqori kayfiyatda davom ettirib, 2017 yilgi mavsum yakunida kuchlilar safida joy olishimiz kerak.
Turdan turga futbolchilarimiz o'yinlarini kuchaytirib borishmoqda. Bu holat har qanday murabbiyni xursand qiladi. Aynan shu sababli har bir uchrashuvda maydonga faqat g'alabani ko'zlagan holda tushmoqdamiz.
Oxirgi ikkita o'yinda tarkibda bir qator o'zgarishlarni amalga oshirmoqdamiz. Masalan «Dinamo»ga qarshi bahsda maydonga tushgan ikki futbolchimiz bugungi o'yinda ishtirok etishmadi. Ularning o'rnini boshqa o'yinchilarimiz to'ldirishdi. Ayni paytda ixtiyorimizda asosiy tarkibda 11 nafar futbolchi emas aksincha, 23 nafar futbolchi mavjud. Futbolchilarimiz bir-birlarini o'rnini bemalol to'ldira olishadi. Rahbarlarimiz deyarli teng kuchga ega bo'lgan tarkibni shakllantirishimiz uchun barcha sharoitlarni yaratib berishdi. Ko'plab jamoalarda ham bir xil kuchga ega bo'lgan ikkita tarkibni tuzish qiyin. Bizda esa bu borada muammo yo'q.
Joriy yilgi chempionatimiz ancha murosasiz o'tmoqda. Bir-ikki uchrashuvni inobatga olmaganda yirik hisoblar deyarli kuzatilmayapti. O'yinlar taqdirini ko'p hollarda bitta gol hal qilmoqda. Jamoamiz ham bitta to'p hisobidagi ustunlik bilan g'alabalarni qo'lga kiritmoqda. Futbolchilarimiz o'yinlar davomida maydonning har bir santimetri uchun kurashishmoqda.
Golga kelsak, mashg'ulotlar paytida standartlarni shu tarzda amalga oshirishga e'tibor qaratgandik. Oldinroq ham o'ylagan rejamiz amalga oshishi mumkin edi. Shunga qaramay ikkinchi urinishda maqsadga erishdik.
Samarqanddagi o'yindan keyin futbolchilarimiz uchun muxlislar bilan to'lib toshgan o'yingohda to'p surish yangilik emasligi haqida aytib o'tgandim. Negaki, Namangandagi o'yingohga 22 mingga yaqin muxlis sig'adi va ishqibozlarimiz bizni nafaqat uydagi balki safardagi uchrashuvlarda ham yolg'izlatib qo'yishmaydi. Joriy yilgi mavsumda ham muxlis yig'ish borasida etakchilik qilmoqdamiz. Bugun ishqibozlarimiz jamoani munosib tarzda qo'llashdi. Buning uchun muxlislarimizga rahmat aytaman», deya Mo'minjonovning so'zlarini keltiradi klub rasmiy sayti.
Bosh sahifaga
674